8-9-10 მარტს, ბათუმის წიგნისა და უმაღლესი განათლების მეორე საერთაშორისო გამოფენის „Batumi Book & Education Fair 2024“ ფარგლებში, ბსუ-ს ნიკო ბერძენიშვილის ინსტიტუტის მკვლევრებმა შეხვედრები გამართეს სხვადასხვა აკადემიურ და სამეცნიერო დაწესებულებათა წარმომადგენლებთან, მათ შორის, კორნელი კეკელიძის სახელობის საქართველოს ხელნაწერთა ეროვნული ცენტრის დირექტორთან, ზაზა აბაშიძესთან. შეხვედრისას შედგა შეთანხმება ერთობლივი პროექტების განხორციელებისა და სამეცნიერო ღონისძიებების ორგანიზების პერსპექტივებზე.

ბსუ-ს ნიკო ბერძენიშვილის ინსტიტუტს სამუშაო ვიზიტით მაქს ვებერის ფონდის საქართველოს ოფისის მკვლევარი, მიუნჰენის ლუდვიგ მაქსიმილიანის უნივერსიტეტის დოქტორი ჰელენა ჰოლზბერგერი ეწვია. ჰელენი ჰოლზბერგერი საბჭოთა საქართველოს საზღვაო ისტორიას იკვლევს, ამ მიმართულებით მომზადებული პროექტის განსახორციელებლად განსაკუთრებული მნიშვნელობა აქვს იმ საკითხების შესწავლას, რომლებიც დაკავშირებულია ბათუმთან – საქართველოს საზღვაო კარიბჭესთან და მდიდარი ისტორიის მქონე ნავსადგურთან. მკვლევარი კვლევას ბათუმში ნიკო ბერძენიშვილის ინსტიტუტის ბაზაზე განახორციელებს და კვლევების კოორდინატორი ინსტიტუტის უფროსი მეცნიერ-თანამშრომელი რუსლან ბარამიძე იქნება.

ბსუ-ში შოთა რუსთაველის საქართველოს ეროვნული სამეცნიერო ფონდის ფუნდამენტური კვლევების სახელმწიფო სამეცნიერო გრანტების კონკურსში გამარჯვებული საგრანტო პროექტის - „რა იგებს არჩევნებს" დასკვნითი პრეზენტაცია გაიმართა. პროექტის ხელმძღვანელმა, ბსუ-ს ნიკო ბერძენიშვილის ინსტიტუტის უფროსმა მეცნიერ თანამშრომელმა რუსლან ბარამიძემ ისაუბრა პროექტის მიმდინარეობაზე, ძირითად გამოწვებზე და წარადგინა მოხსნება საქართველოში წარმოსახვითი ერთობის, მეხსიერების ადგილების და საზოგადოებრივი ტრანსფორმაციების შესახებ პრეზიდენტების წინასაარჩევნო კამპანიებსა და საინაგურაციო მიმართვების მიხედვით. ბსუ-ს უფროსმა მასწავლებელმა მაია ბოლქვაძემ ისაუბრა საქართველოში საპრეზიდენტო კანდიდატების წინასაარჩევნო კამპანიებში გამოყენებული რიტორიკულ ხერხებზე და წარმოადგინა შესაბამისი ლინგივისტური ანალიზი.

თურქეთის რესპუბლიკის რეჯეფ ტაიფ ერდოღანის სახელობის რიზეს უნივერსიტეტის საბუნებისმეტყველო და საზოგადოებრივ მეცნიერებათა ფაკულტეტის ქართული ენისა და ლიტერატურის განყოფილებაში რუსთაველის სახელობის კაბინეტი გაიხსნა. ღონისძიებაში მონაწილეობა მიიღო ნიკო ბერძენიშვილის ინსტიტუტის დირექტორმა როინ მალაყმაძემ და კაბინეტს ინსტიტუტის უახლესი გამოცემები უსახსოვრა. ვიზიტის ფარგლებში სამომავლო სამეცნიერო და აკადემიური თანამშრომლობის თაობაზე შეხვედრები გაიმართა უნივერსიტეტის რექტორის მოადგილესთან და ფაკულტეტის დეკანთან. უნივერსიტეტის ჰუმანიტარულ მეცნიერებათა ფაკულტეტის ქართული ენისა და ლიტერატურის სასწავლო პროგრამას, რომელიც 2016 წლიდან ფუნქციონირებს ქალაქ ტრაპიზონში საქართველოს გენერალური საკონსულოს მხარდაჭერითა და ჩართულობით, 2023 წლის 24 თებერვალს, FEDEK-ის ხუთწლიანი აკრედიტაცია მიენიჭა.

ნიკო ბერძენიშვილის ინსტიტუტისა და აჭარის მწერალთა სახლის ორგანიზებით, ცნობილი მთარგმნელისა და საზოგადო მოღვაწის იბრაიმ გორაძისადმი მიძღვნილი შეხვედრა გაიმართა. შეხვედრის მიზანი აკადემიური წრეებისა და ფართო საზოგადოებისათვის იბრაიმ გორაძის საქმიანობისა და მოღვაწეობის გაცნობა იყო. ნიკო ბერძენიშვილის ინსტიტუტის ეგიდით მზადდება შესაბამისი მონოგრაფიაც, რომელიც უახლოეს მომავალში გამოიცემა. ღონისძიება მეცნიერების საერთაშორისო დღის ფარგლებში გაიმართა.