ბათუმის შოთა რუსთაველის სახელმწიფო უნივერსიტეტსა და ვროცლავის მერიტო უნივერსიტეტს (WSB MERITO UNIVERSITY IN WROCŁAW) შორის დადებული თანამშრომლობის მემორანდუმის ფარგლებში, აჭარის ა.რ. განათლებისა და სპორტის სამინისტროს და ბსუ-ს ფინანსური მხარდაჭერით, ვროცლავის მერიტო უნივერსიტეტის ბიზნესის კვირეულში მონაწილეობა მიიღო ბსუ-ს ეკონომიკისა და ბიზნესის ფაკულტეტის ხუთმა სტუდენტმა - ანანო კუკულაძემ, გვანცა ზოიძემ, მარი თურმანიძემ, ანი ართმელაძემ და ნიკო ლეონიძემ. ბათუმის შოთა რუსთაველის სახელმწიფო უნივერსიტეტის რექტორი, ტიტე აროშიძე გამგზავრებამდე პროექტში მონაწილე სტუდენტებსა და მენტორს, ასისტენტ ნინო კონცელიძეს შეხვდა და წარმატებები უსურვა.

საქართველოს ეროვნული ბანკის ორგანიზებით, თბილისისა და რეგიონების უმაღლესი სასწავლებლების სტუდენტებისთვის ფინანსური განათლების თემაზე სემინარი გაიმართა. სემინარში ბსუ-ს ეკონომიკისა და ბიზნესის ფაკულტეტის სტუდენტებმა: საბა ვარშანიძემ და საბა თურმანიძემ მიიღეს მონაწილეობა. შეხვედრის მიზანი სტუდენტებისთვის სებ-ის ფუნქციების, მიმართულებებისა და საფინანსო სექტორის საქმიანობის უკეთ გაცნობა იყო. სემინარის ფარგლებში ჩატარდა სესიები ისეთ თემებზე, როგორებიცაა - ფინანსური ბაზრების სტაბილურობა, მომხმარებელთა უფლებები, ფინანსური რეზერვების მართვა, ფულის გათეთრებასთან ბრძოლა, საბანკო და არასაბანკო ზედამხედველობის რეგულირება და სხვა.

ბათუმის შოთა რუსთაველის სახელმწიფო უნივერსიტეტის ბიზნესისა და ადმინისტრირების კლასტერმა, რომელშიც გაერთიანებულია 3 საბაკალავრო, 4 სამაგისტრო და სადოქტორო საგანმანათლებლო პროგრამა, შვიდი წლით აკრედიტაცია მოიპოვა. ამასთან აღსანიშნავია, რომ ბიზნესის ადმინისტრირების, ფინანსებისა და საჯარო მმართველობის საბაკალავრო საგანმანათლებლო პროგრამები სამწლიანია.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის აკადემიური პერსონალი 2024 წლის 10-12 დეკემბერს, რიგის გამოყენებით მეცნიერებათა უნივერსიტეტის (ISMA) მიერ ორგანიზებულ ტრენინგების კურსს დაესწრო. კურსზე განხილულ იქნა ხელოვნური ინტელექტის გამოყენების სფეროები, პრობლემები და პერსპექტივები. კერძოდ, ციფრული ინოვაცია და AI (ხელოვნური ინტელექტი), უმაღლესი განათლების პედაგოგებისთვის "სწავლების სტრატეგიების გაძლიერება, “გადაწვის” მართვა და AI-ის ადაპტაცია განათლებაში".

ბათუმის შოთა რუსთაველის სახელმწიფო უნივერსიტეტში გაიმართა შოთა რუსთაველის საქართველოს ეროვნული სამეცნიერო ფონდის ახალგაზრდა მეცნიერთა საგრანტო კონკურსში გამარჯვებული პროექტის „მცირე და საშუალო ბიზნეს სუბიექტების კრიზისი და მისი პრევენცია პოსტ-პანდემიურ პერიოდში საქართველოში“ (პროექტის ხელმძღვანელი ასისტენტ-პროფესორი გიორგი ქათამაძე) დასკვნითი, შემაჯამებელი ღონისძიება და მონოგრაფიის პრეზენტაცია.