სახალხო დღესასწაულის „ბათუმობის“ ფარგლებში ბათუმის შოთა რუსთაველის სახელმწიფო უნივერსიტეტში VIII საერთაშორისო სამეცნიერო კონფერენცია „ბათუმი - წარსული და თანამედროვეობა“ გაიხსნა. 60-მდე ქართველი და უცხოელი მკვლევარი სამეცნიერო მოხსენებებს წაიკითხავს ქალაქის წარსულსა და თანამედროვეობაზე, განიხილავენ ბათუმის განვითარების ტენდენციებსა და სხვა აქტუალურ საკითხებს. სამეცნიერო სესიაზე წარმოდგენილი იქნება ისეთი მნიშნელოვანი სტატიები, როგორიცაა: თანამედროვე ბათუმი: ინტერესთა კონფლიქტი და პერსპექტივა, ებრაელობა ბათუმის საქალაქო თვითმმართველობაში (1887-1917), ზნეობრივი ომი ხიმშიაშვილთა ოჯახის წინააღმდეგ, საქართველოს ევროპული რადიუსი და ბათუმის ურბანული პრიორიტეტები, ბრძოლები ბათუმის მიმართულებით 1877-1878 წლების რუსეთ-ოსმალეთის ომის პერიოდში, ტურიზმის განვითარების სტრატეგიული მიმართულებები ბათუმში.

23-29 აგვისტოს, ნიკო ბერძენიშვილის ინსტიტუტის თანამშრომლები მივლინებით იმყოფებოდნენ თურქეთის რესპუბლიკაში, კერძოდ ბორჩხის რაიონის დევსქელის ხეობის სოფლებში სანათისში, ბაგინში, დევსქელში, შუახევში, ებრიკაში, აგრეთვე ამ სოფლების იაილებში (თეთრიწყლის იაილები).

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის დირექტორი როინ მალაყმაძე გაეროს განვითარების პროგრამის (UNDP) პროექტის „აჭარის დაცული ტერიტორიების გაფართოება და მათი მართვის დახვეწა“ ფარგლებში, 19-23 ივლისს თუშეთის დაცულ ტერიტორიებზე სამუშაო შეხვედრებში მონაწილეობდა. გასვლითი ტურის მიზანი მაჭახელას ეროვნული პარკის დამხმარე ზონის თემების წარმომადგენლებისათვის და თანამშრომლებისათვის დაცული ტერიტორიის სარგებლის გაცნობა, გამოცდილების გაზიარება, დაცულ ტერიტორიებთან დაკავშირებული წარმატებული ბიზნეს მაგალითების ნახვა და ადგილობრივი ფოლკლორის, ეთნოლოგიის, ისტორიისა და კულტურის ძეგლების გაცნობა იყო.

14-18 ივლისს ნიკო ბერძენიშვილის მეცნიერ თანამშრომლები სამეცნიერო მივლინებით ქობულეთის რაიონის სოფლებში: ხუცუბანი, სამება, კოხი, ჭახათი, ზენითი, დაგვა, ჩაქვისთავი იმყოფებოდნენ. მკვლევარებმა აღრიცხეს ამ სოფლებში არსებული მატერიალური კულტურის ძეგლები, კარ-მიდამოები, ტრადიციული საცხოვრებელი და სამეურნეო ნაგებობები, ჭურჭელი, სამუშაო იარაღები, საგზაო ნაგებობები და ა.შ. ექსპედიციის მონაწილეებმა დააფიქსირეს და ჩაიწერეს მასალა ჩაქვისთავში მდებარე უნიკალური საცხოვრებელი სახლის ე.წ. ბეჟანიძეების სასახლის შესახებ. საინტერესო მასალა გამოვლინდა არამატერიალური კულტურის ისეთ ელემენტებზე როგორიცაა: ქორწინება (ნიშნობა, საქორწინო რიტუალი, ახალ პატარძალთან შეხვედრა, მზითeვი), ახალშობილის მოვლა, სახლის მშენებლობა (საძირკველში სხვადასხვა მაგიური ნივთის ჩაგდება, შესაწირავი, ბაირაღის აღმართვა, ნადი).

მალხაზ სიორიძის 60 წლის იუბილესადმი მიძღვნილი საერთაშორისო სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. ქართველმა, უკრაინელმა, პოლონელმა მკვლევრებმა სამეცნიერო ნაშრომი წარმოადგინეს ისტორიის აქტუალურ საკითხებზე და ბოლო პერიოდში წარმოებული კვლევის შედეგები შეაჯამეს. ასევე იმსჯელეს ისეთ თემებზე, როგორიცაა: 1921 წლის ყარსის ხელშეკრულება, ეროვნული საბჭოს მოღვაწეობა უმაღლესი საკანონმდებლო ხელისუფლების ორგანიზაციებისათვის (1918 წ. მაისი - 1919 წ. იანვარი), კონფესიური და ტერიტორიული პრობლემები ამიერკავკასიაში, ფლორიან ზელინსკი - XIX საუკუნეში კავკასიაში გადასახლებული პოლონელი შეთქმულნი, ევროკავშირის შექმნის სათავეებთან ქართველებიც იდგნენ და სხვ.