შოთა რუსთაველის დაბადებიდან 850 წლისადმი მიძღვნილი სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. ნიკო ბერძენიშვილის ინსტიტუტის ორგანიზებულ სესიაზე პროფესორ-მასწავლებლებმა მოხსენებები წარმოადგინეს ქართული ლიტერატურასა და საქართველოს ისტორიაზე. კონფერენციის მონაწილეებმა განიხილეს შემდეგი საკითხები: საქართველოს სოციალურ-ეკონომიკური და პოლიტიკური განვითარების ტენდენციები რუსთაველის ეპოქაში, ირაკლი აბაშიძის „რუსთაველის ნაკვალევზე“ და პალესტინური ციკლის ლექსები, სახარებისეული მოტივები „ვეფხისტყაოსანში“, ლექსიკური დიალექტიზმები „ვეფხისტყაოსანში“, გავლენის შიშის თეორია და „ვეფხისტყაოსანი“ და „ვეფხისტყაოსანი“ მითოლოგიური კრიტიკის თვალთახედვით.

კრებული - „აჭარა − ტურისტულ-მხარეთმცოდნეობითი რესურსები“ წარმოადგენს სახელმძღვანელოს ტურიზმის ფაკულტეტის სტუდენტებისათვის. წიგნი საშუალებას მისცემს მათ საფუძვლიანად გაეცნონ აჭარის, მისი ცალკეული მუნიციპალიტეტების ისტორიას, ეკონომიკას, ბუნებას, მოსახლეობის ეთნიკურ და კონფესიურ სტრუქტურას, ტრადიციულ მატერიალურ და სულიერ საუნჯეს, ფოლკლორს, მეცნიერებას, ხელოვნებასა და კულტურას, ისტორიისა და კულტურის ძეგლებს, ბუნების დაცულ ტერიტორიებს. სახელმძღვანელო ხელს შეუწყობს მაღალკვალიფიციური სპეციალისტთა მომზადებას, რომელთაც შეეძლებათ სათანადო მომსახურება გაუწიონ სტუმრად ჩამოსულ ტურისტებს და მიაწოდონ მათ საჭირო ინფორმაცია აჭარის შესახებ.

კრებულში „ჩვენი სულიერების ბალავარი“ შეტანილია VIII საერთაშორისო სამეცნიერო კონფერენციაზე – „ჩვენი სულიერების ბალავარი“ – წაკითხული მოხსენებები, რომლებიც ეხება ქრისტიანული ეკლესიის ისტორიის, რელიგიისა და კულტურის, ეთნიკური და რელიგიური ტოლერანტობის, კულტურათა დიალოგის, სწავლებისა და აღზრდის და სხვა საკითხებს. კრებულში სათანადო ადგილი აქვს დათმობილი მთლიანად სამხრეთ-დასავლეთ საქართველოს და კერძოდ, აჭარის ქრისტიანული საკულტო ძეგლების და ეპარქიის ისტორიის დაზუსტება-შესწავლას, შესაბამისი წყაროებისა და ლიტერატურის პოპულარიზაციას.

მკვლევარმა ირინე ვარშალომიძემ გამოსცა ნაშრომი „ბათუმის არქეოლოგიური მუზეუმის ნუმიზმატიკური საგანძური“. წიგნის შესავალში განხილულია სამონეტო მიმოქცევის თავისებურებანი სამხრეთ-დასავლეთ საქართველოს ტერიტორიაზე. შემდეგ წარმოდგენილია მუზეუმში დაცული ნუმიზმატიკური ძეგლების კატალოგი, აღწერილია 102 მონეტა, კოლხური თეთრი, სინოპური, ჩრდილოეთ შავიზრვისპირეთის ქალაქების, კიზიკინები, ალ. მაკედონელის, ეგინური, რომაული, ბიზანტიური,არაბული, სელჩუკური, მონღოლური, ევროპული მონეტები. მასალის დიდი ნაწილი გამოუქვეყნებელია და პირველად შედის სამეცნიერო მიმოქცევაში. ნაშრომი ორენოვანია − შესრულებულია ქართულ და ინგლისურ ენებზე.

დღეს, ბათუმის შოთა რუსთაველის სახელმწიფო უნივერსიტეტში „ბათუმობის’’ სახალხო დღესასწაულთან დაკავშირებით VII საერთაშორისო სამეცნიერო კონფერენცია გაიხსნა სახელწოდებით „ბათუმი-წარსული და თანამედროვეობა’’. სესიაზე 60-მდე მეცნიერი მოხსენებას წარმოადგენს შავიზღვისპირა ქალაქის ისტორიაზე, თანამედროვეობაზე, არქეოლოგიაზე, ეთნოგრაფიასა და ურბანული განვითარების ტენდენციებზე.