ღვაწლმოსილი მეცნიერის, ცნობილი ეთნოლოგის, ბსუ-ს ნიკო ბერძენიშვილის ინსტიტუტის უფროსი მეცნიერ თანამშრომლის ნოდარ კახიძის 90 წლისადმი მიძღვნილი საიუბილეო სხდომა გაიმართა შოთა რუსთაველის სახელმწიფო უნივერსიტეტში. მკვლევარს იუბილე მიულოცეს, წარმატებები უსურვეს, სამახსოვრო საჩუქრები გადასცეს და მის ღვაწლზე ისაუბრეს უნივერსიტეტის რექტორმა მერაბ ხალვაშმა, ინსტიტუტის დირექტორმა როინ მალაყმაძემ, საქართველოს პარლამენტის ვიცე სპიკერმა ილია ნაკაშიძემ, აჭარის ა.რ. უმაღლესი საბჭოს თავმჯდომარის მოადგილემ მერაბ კარანაძემ, აჭარის ა.რ. განათლების, კულტურისა და სპორტის მინისტრმა მაია ხაჯიშვილმა, თსუ-ს ივანე ჯავახიშვილის ისტორიისა და ეთნოლოგიის ინსტიტუტის მთავარმა მეცნიერ თანამშრომელმა როლანდ თოფჩიშვილმა და საზოგადოების წარმომადგენლებმა. საიუბილეო საღამოზე ნოდარ კახიძე მეცნიერების განვითარებაში შეტანილი წვლილისათვის ბსუ-ს რექტორმა მერაბ ხალვაშმა შოთა რუსთაველის მედლით დააჯილდოვა და აჭარის ა.რ. უმაღლესი საბჭოს თავმჯდომარის მოადგილემ მერაბ კარანაძემ აჭარის ა.რ. უმაღლესი საბჭოს საპატიო სიგელი გადასცა.

ბსუ-ს ნიკო ბერძენიშვილის ინსტიტუტის ისტორიისა და არქეოლოგიის განყოფილების უფროსმა მეცნიერი თანამშრომელმა ოლეგ ჯიბაშვილმა სემინარი ჩაატარა თემაზე: „ლევან ბატონიშვილის მკვლელობის საკითხისათვის“. ბატონიშვილი ლევანი (ლეონი) ერეკლე მეფისა და დარეჯან დედოფლის უფროსი ვაჟი იყო. იგი დაიბადა 1756 წელს. იცხოვრა ხანმოკლე, მაგრამ ღირსეული ცხოვრებით და დაიღუპა 25 თუ 26 წლის ასაკში ფრიად დამაფიქრებელ ვითარებაში. ლევან ბატონიშვილის სიკვდილთან დაკავშირებით არსებობს რადიკალურად განსხვავებული აზრები და გადმოცემები.

წმიდა დიაკონი სევერიანეს - აჭარელი აღმსარებლისადმი მიძღვნილი საერთაშორისო სამეცნიერო კონფერენცია „ჩვენი სულიერების ბალავარი“ გაიხსნა ბათუმის შოთა რუსთაველის სახელმწიფო უნივერსიტეტში. რიგით XI სამეცნიერო სესიაზე ქართველი და უცხოელი მკვლევარები ბოლო ერთი წლის განმავლობაში წარმოებული სამეცნიერო კვლევა-ძიების შედეგებს შეაჯამებენ. ორდღიან სამეცნიერო ფორუმზე წარმოდგენილი იქნება 40-მდე მოხსენება. კონფერენციის მონაწილეები იმსჯელებენ ისტორიის, ეროვნული ცნობიერების, პოლიტიკის, ფილოსოფიის, ფსიქოლოგიის, ფილოლოგიის, ფოლკლორის, ტოპონიმიკის, ეკლესიის ისტორიის და სხვა სამეცნიერო დარგის აქტუალურ საკითხებსა და პრობლემებზე რელიგიური ასპექტების გათვალისწინებით.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტმა მონაწილეობა მიიღო გამოფენა-კონცერტში „ერთი ხეობის ფოლკლორი – ჭვანა“. სცენაზე გაცოცხლდა 1930-იან, 50-იან და 70-იან წლებში ჭვანის ხეობაში ჩაწერილი ტრადიციული მრავალხმიანი სიმღერები, რომლებიც დაცულია ინსტიტუტის ფონდებსა და სხვადასხვა დაწესებულებაში. შესრულდა ბსუ-ს ნიკო ბერძენიშვილის მკვლევარების მიერ აღდგენილი 8 ხალხური სიმღერა. ღონისძიებაზე წარმოდგენილი იყო ჭვანის ხეობის ისტორიისა და ყოფა-ცხოვრების ამსახველი ექსპონატები – ეთნოგრაფიული მასალა, მკვლევართა ჩანაწერები, არქეოლოგიური არტეფაქტები, ბსუ-ს ნიკო ბერძენიშვილის ინსტიტუტის საფონდო ჩანაწერები, აუდიო არქივი, ფოტომასალა. ინსტიტუტის დირექტორმა როინ მალაყმაძემ კონცერტზე სიტყვით გამოსვლისას ღონისძიებისა და ინსტიტუტის არქივში დაცული მასალების მნიშვნელობაზე ისაუბრა.

ბსუ-ს ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარმა მეცნიერმა თანამშრომელმა ნარგიზ ახვლედიანმა მონაწილეობა მიიღო 4-7 ნოემბერს, თბილისის სახელმწიფო უნივერსიტეტში გამართულ კავკასიოლოგთა V საერთაშორისო კონგრესში: „საქართველო კავკასიის კულტურულ-ცივილიზაციურ კონტექსტში (ისტორია, თანამედროვეობა და პერსპექტივები)“. მკვლევარმა კონგრესზე მოხსენება წაიკითხა თემაზე: „ერთი დავიწყებული ტოპონიმის ისტორიისათვის აჭარულში“. ფორუმის მუშაობაში 170-მდე დელეგატი იყო ჩართული ჩრდილო-კავკასიისა და ევროპის სხვადასხვა ქვეყნიდან.