ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის სამეცნიერო საბჭოს გაფართოებული სხდომა გაიმართა. საბჭოს წევრებს მთავარმა მეცნიერ-თანამშრომელმა მარიამ მეტრეველმა ინფორმაცია გააცნო ბელორუსიის რესპუბლიკაში, მინსკის მეხილეობის ინსტიტუტის ბიოტექნოლოგიის განყოფილებაში სტაჟირების შესახებ. გამძლეობის გენეტიკის განყოფილების ხელმძღვანელმა, მთავარმა მეცნიერ-თანამშრომელმა ზოია სიხარულიძემ ბორლაუგის ჟანგების გლობალური ინიციატივის (BGRI) ვორკშოპსა და ხორბლების საერთაშორისო კონფერენციაში მონაწილეობის შედეგები წარმოადგინა.

სიდნეიში, მცენარეთა სელექციის ინსტიტუტში გამართულ ჟანგების გლობალური მონიტორინგის ბორლაუგის ვორკშოპსა და ხორბლის IX საერთაშორისო კონფერენციაში მონაწილეობა მიიღო ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსმა, მთავარმა მეცნიერ-თანამშრომელმა ზოია სიხარულიძემ. მკვლევარმა სამეცნიერო კონფერენციებზე სასტენდო მოხსენებები წარადგინა თემებზე: „ღეროჟანგას ქართული პოპულაციისადმი გამძლე ხორბლის ინტროდუცირებული გენოტიპების გამოვლენა“ („Screening of introduced wheat germplasm for resistance to stem rust in Georgia“) და „ხორბლის ყვითელი ჟანგა საქართველოში 2010-2013 წლებში“ („Wheat yellow rust in Georgia in 2010-2013“). გარდა ამისა, სამეცნიერო სესიების მონაწილეები გამძლეობის გენეტიკის განყოფილების კოლაბორატორი მინესოტას უნივერსიტეტის მეცნიერების ნაშრომს გაეცნენ ხორბლის ღეროს ჟანგას ქართული პოპულაციის ერთობლივი კვლევის შედეგებზე.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების დირექტორმა გურამ მემარნემ, სამეცნიერო საბჭოს თავმჯდომარემ მარიამ მეტრეველმა და მცენარეთა დაავადებების მონიტორინგის, დიაგნოსტიკისა და მოლეკულური ბიოლოგიის განყოფილების ხელმძღვანელმა გალინა მეფარიშვილმა მონაწილეობა მიიღეს ბიოუსაფრთხოებისა და ბიოლოგიური დაცვის საკითხებისადმი მიძღვნილ სასწავლო კურსში. ერთკვირიანი სწავლება კონტროლისა და საზოგადოებრივი ჯანმრთელობის ეროვნული ცენტრის ბაზაზე ჩატარდა და მონაწილეები ბიოუსაფრთხოებისა და ბიოლოგიური დაცვის საკითხებს გაეცნენ. სასწავლო კურსი ევროკავშირის/გაეროს დანაშაულისა და სამართლის რეგიონთაშორისი ინსტიტუტის პროექტის „ბიოლოგიური უსაფრთხოების და ბიოლოგიური დაცვის რისკის მართვა საქართველოსთვის“ ფარგლებში გაიმართა. მონაწილეებს სერტიფიკატები გადაეცათ.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მთავარმა მეცნიერ-თანამშრომელმა, მარიამ მეტრეველმა და მეცნიერ-თანამშრომელმა, საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის დოქტორანტმა ნინო ქედელიძემ სტაჟირება გაიარეს ბელორუსიის მეცნიერებათა ეროვნული აკადემიის მინსკის მეხილეობის ინსტიტუტში. მეცნიერ-თანამშრომლები გაეცნენ მეხილეობის ინსტიტუტის სამეცნიერო განყოფილებების მუშაობის სპეციფიკას, სამაგისტრო და სადოქტორო პროგრამების განხორციელების თავისებურებებს, ინსტიტუტის საცდელ-საკოლექციო ნაკვეთებზე მიმდინარე სამუშაოებს. მკვლევრებმა კვალიფიკაცია აიმაღლეს ბიოტექნოლოგიის განყოფილებაში ლაბორატორიული აღჭურვილობის მომზადების, მცენარეთა მიკროგამრავლების, ციტოგენეტიკური და ბიოქიმიური კვლევების საკითხებზე. ბელორუსიის მეცნიერებათა ეროვნული აკადემიის მინსკის ცენტრალური ბოტანიკური ბაღის ადმინისტრაციასა და სამეცნიერო განყოფილებებში გამართულ შეხვედრებზე დაისახა სამომავლო თანამშრომლობის გეგმები.

ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსმა მეცნიერ - თანამშრომელმა, უნივერსიტეტის ტექნოლოგიური ფაკულტეტის დოქტორანტმა ქეთინო ნაცარიშვილმა, შოთა რუსთაველის ეროვნული სამეცნიერო ფონდის დოქტორანტურის საგანმანათლებლო პროექტის ფარგლებში, მარცვლოვანთა ჟანგებისა და ნაცრების მე-14 საერთაშორისო კონფერენციაში მიიღო მონაწილეობა. ქართველმა მკვლევარმა სამეცნიერო სესიაზე სასტენდო მოხსენება: „ხორბლის ჟანგების ვარიაბელურობის მონიტორინგი საერთაშორისო ხაფანგი სანერგეების გამოყენებით“ („Monitoring of variability in wheat rust pathogens by international trap nurseries“) წარადგინა. უცხოელი კოლეგები საქართველოში მიმდინარე მარცვლოვანთა ჟანგების კვლევებით დაინტერესდნენ და სამომავლო თანამშრომლობის სურვილი გამოთქვეს. ოთხდღიანი კონფერენცია აარჰუსის უნივერსიტეტის ორგანიზებით დანიის ქალაქ ჰელსინგორში ჩატარდა.