ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების დირექტორმა გურამ მემარნემ, სამეცნიერო საბჭოს თავმჯდომარემ მარიამ მეტრეველმა და მცენარეთა დაავადებების მონიტორინგის, დიაგნოსტიკისა და მოლეკულური ბიოლოგიის განყოფილების ხელმძღვანელმა გალინა მეფარიშვილმა მონაწილეობა მიიღეს ბიოუსაფრთხოებისა და ბიოლოგიური დაცვის საკითხებისადმი მიძღვნილ სასწავლო კურსში. ერთკვირიანი სწავლება კონტროლისა და საზოგადოებრივი ჯანმრთელობის ეროვნული ცენტრის ბაზაზე ჩატარდა და მონაწილეები ბიოუსაფრთხოებისა და ბიოლოგიური დაცვის საკითხებს გაეცნენ. სასწავლო კურსი ევროკავშირის/გაეროს დანაშაულისა და სამართლის რეგიონთაშორისი ინსტიტუტის პროექტის „ბიოლოგიური უსაფრთხოების და ბიოლოგიური დაცვის რისკის მართვა საქართველოსთვის“ ფარგლებში გაიმართა. მონაწილეებს სერტიფიკატები გადაეცათ.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მთავარმა მეცნიერ-თანამშრომელმა, მარიამ მეტრეველმა და მეცნიერ-თანამშრომელმა, საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის დოქტორანტმა ნინო ქედელიძემ სტაჟირება გაიარეს ბელორუსიის მეცნიერებათა ეროვნული აკადემიის მინსკის მეხილეობის ინსტიტუტში. მეცნიერ-თანამშრომლები გაეცნენ მეხილეობის ინსტიტუტის სამეცნიერო განყოფილებების მუშაობის სპეციფიკას, სამაგისტრო და სადოქტორო პროგრამების განხორციელების თავისებურებებს, ინსტიტუტის საცდელ-საკოლექციო ნაკვეთებზე მიმდინარე სამუშაოებს. მკვლევრებმა კვალიფიკაცია აიმაღლეს ბიოტექნოლოგიის განყოფილებაში ლაბორატორიული აღჭურვილობის მომზადების, მცენარეთა მიკროგამრავლების, ციტოგენეტიკური და ბიოქიმიური კვლევების საკითხებზე. ბელორუსიის მეცნიერებათა ეროვნული აკადემიის მინსკის ცენტრალური ბოტანიკური ბაღის ადმინისტრაციასა და სამეცნიერო განყოფილებებში გამართულ შეხვედრებზე დაისახა სამომავლო თანამშრომლობის გეგმები.

ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსმა მეცნიერ - თანამშრომელმა, უნივერსიტეტის ტექნოლოგიური ფაკულტეტის დოქტორანტმა ქეთინო ნაცარიშვილმა, შოთა რუსთაველის ეროვნული სამეცნიერო ფონდის დოქტორანტურის საგანმანათლებლო პროექტის ფარგლებში, მარცვლოვანთა ჟანგებისა და ნაცრების მე-14 საერთაშორისო კონფერენციაში მიიღო მონაწილეობა. ქართველმა მკვლევარმა სამეცნიერო სესიაზე სასტენდო მოხსენება: „ხორბლის ჟანგების ვარიაბელურობის მონიტორინგი საერთაშორისო ხაფანგი სანერგეების გამოყენებით“ („Monitoring of variability in wheat rust pathogens by international trap nurseries“) წარადგინა. უცხოელი კოლეგები საქართველოში მიმდინარე მარცვლოვანთა ჟანგების კვლევებით დაინტერესდნენ და სამომავლო თანამშრომლობის სურვილი გამოთქვეს. ოთხდღიანი კონფერენცია აარჰუსის უნივერსიტეტის ორგანიზებით დანიის ქალაქ ჰელსინგორში ჩატარდა.

ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომელებმა მცენარეთა ჯანმრთელობის კლინიკა გამართეს. ტრადიციისამებრ, აქცია ითვალისწინებდა ფერმერების მიერ წარმოდგენილი დაავადებული მცენარეების ვიზუალურ დათვალიერება-შემოწმებას და კონსულტირებას. ღონისძიების მონაწილეებს გადაეცათ მცენარეთა დაავადებების წინააღმდეგ ბრძოლის ღონისძიებების საინფორმაციო ბუკლეტები. წარმოდგენილი 106 ნიმუშიდან მცენარეების 50 პროცენტი ძაღლყურძენასებრთა ოჯახს მიეკუთვნებოდა. მცენარეებს ჩაუტარდა როგორც ვიზუალური, ასევე ლაბორატორიული ანალიზი. მიღებული შედეგების პასუხები გადაეცათ ფერმერებს.

ქედის მუნიციპალიტეტში, გამგეობის შენობის მიმდებარე ტერიტორიაზე ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომლებმა მცენარეთა ჯანმრთელობის კლინიკა ჩაატარეს, რომელიც ითვალისწინებდა ადგილობრივი ფერმერებისათვის დაავადებული მცენარეების უფასო შემოწმებას. კლინიკას ფერმერებმა 35 დაავადებული მცენარის ნიმუში წარუდგინეს. მეცნიერებმა ვიზუალური დათვალიერებისა და შემდგომში, ლაბორატორიული ანალიზის საფუძველზე დაადგინეს დაავადებები. მიღებული შედეგების პასუხები ინდივიდუალურად გადაეცათ ფერმერებს.