ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტს ოთხდღიანი სამუშაო ვიზიტით დიდი ბრიტანეთის თავდაცვის სამინისტროს და სურსათისა და გარემოს კვლევის სააგენტოს (FERA) წარმომადგენლები რობერტ ბოლტონი და რიჩარდ ტვაიტესი ეწვივნენ. სტუმრებმა უნივერსიტეტის რექტორთან, პროფესორ ალიოშა ბაკურიძესთან, ინსტიტუტის თანამშრომლებთან და აჭარის სოფლის მეურნეობის სამინისტროს წარმომადგენლებთან გამართულ შეხვედრებზე ბოლო რამდენიმე წლის განმავლობაში განხორციელებული პროექტები შეაფასეს. 2002 წლიდან თანამშრომლობისა და კოლაბორაციის ეგიდით საერთაშორისო სამეცნიერო-ტექნიკური ცენტრის (ISTC) ორი სამეცნიერო და ერთი საკონფერენციო პროექტი განხორციელდა. სამეცნიერო პროგრამების ფარგლებში ინსტიტუტი აღიჭურვა თანამედროვე სამეცნიერო აპარატურითა და სხვა ტექნიკური საშუალებებით, შეიქმნა ახალი, მოლეკულური ბიოლოგიის ლაბორატორია, გაუმჯობესდა ინფრასტრუქტურა, მეცნიერ-თანამშრომლებმა გაიარეს სხვადასხვა სახის სამეცნიერო ტრენინგები დიდი ბრიტანეთის სამეცნიერო ცენტრებში.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომელმა ქეთინო ნაცარიშვილმა მარცვლოვანთა ჟანგების საწვრთნელ პროგრამაში მიიღო მონაწილეობა. ექვსკვირიანი საწვრთნელი პროგრამა მიზნად ისახავდა მარცვლეულის ჟანგების ბიოლოგიის, ეკოლოგიის, ეპიდემიოლოგიის, დიაგნოზისა და დაავადების მართვის სხვადასხვა მეთოდის გაცნობასა და შესწავლას. კურსი მოიცავდა ლაბორატორიულ, სასათბურე და საველე აქტივობებს, ლექციებსა და ჯგუფურ დისკუსიებს. პროექტი მინესოტას უნივერსიტეტში (აშშ) სტეკმენ-ბორლაუგის მარცვლოვანთა ჟანგების ცენტრისა (S-BCRC) და ჟანგების მიმართ ხორბლის გამძლეობის საერთაშორისო პროგრამის (DRWW) ორგანიზებითა და მხარდაჭერით განხორციელდა.

დიდი ბრიტანეთის გაერთიანებული სამეფოს თავდაცვის სამინისტროს წარმომადგენელი რობერტ ბოლტონი ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტს ეწვია. სამდღიანი ვიზიტის ფარგლებში რობერტ ბოლტონმა სამეცნიერო-კვლევითი დაწესებულების მკვლევარებთან ერთად, ბიოუსაფრთხოების სფეროში არსებული პრობლემები განიხილა. შეხვედრაზე დაიგეგმა ინსტიტუტში მიმდინარე კვლევების საერთაშორისო ასპარეზზე წარმოჩენა და თანამშრომლობის გაგრძელება. რობერტ ბოლტონის მხარდაჭერით 2004-2012 წლებში დიდი რვიანის გლობალური პარტნიორობის ფარგლებში ინსტიტუტში განხორციელდა საერთაშორისო სამეცნიერო ტექნიკური ცენტრის (ISTC) ორი პროექტი: ,,მცენარეთა დაცვის გაუმჯობესება საქართველოში დაავადებებისადმი გამძლეობის დონის ამაღლების, საკარანტინო დაავადებების შესწავლისა და კულტურათა ნაციონალური კოლექციის შექმნის გზით“ (№G 1093 p, მენეჯერი ზოია სიხარულიძე) და ,,საქართველოს სოფლის მეურნეობის განვითარების ხელშეწყობა: სასოფლო-სამეურნეო კულტურების წარმოების გაუმჯობესება მათი დაავადებებისადმი გამძლეობის დონის შესწავლის გზით საქართველოში და სამხრეთ კავკასიის სხვა ქვეყნებში” (№G-1775p, მენეჯერი გალინა მეფარიშვილი).

აჭარის უმაღლესი საბჭოს აგრარული და თვითმმართველობის საკითხთა კომისიის წევრები ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მეცნიერების მიერ 2013 წელს წარმოებული სამეცნიერო-კვლევითი მუშაობის შედეგებს გაეცნენ. ინსტიტუტის სამეცნიერო საბჭოს თავმჯდომარემ მარიამ მეტრეველმა და დირექტორმა გურამ მემარნემ აგრარული და თვითმმართველობის საკითხთა კომისიის სხდომაზე ბოლო პერიოდში შესრულებული სამუშაოები წარადგინეს და ხაზი გაუსვეს სამეცნიერო-კვლევითი დაწესებულების 54-წლიანი ისტორიის განმავლობაში განხორციელებული კვლევების მნიშვნელობას ქვეყნის ბიოუსაფრთხოებისა და ეკონომიკური წინსვლის თვალსაზრისით.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მეცნიერ-თანამშრომლებმა ქეთინო ნაცარიშვილმა და რუსუდან დუმბაძემ მექსიკაში, ქალაქ სიუდად-ობრეგონში გამართულ ნორმან ბორლაუგის ჟანგების გლობალური ინიციატივის (BGRI) ვორკშოპსა და ბორლაუგის სამიტში მიიღეს მონაწილეობა. შვიდდღიან ფორუმზე სხვადასხვა ქვეყნის 700-მდე წარმომადგენელმა მსოფლიოს მოსახლეობის დაავადებების მიმართ გამძლე ხორბლით უზრუნველყოფის საკითხი განიხილეს. ქართველმა მკვლევარებმა საერთაშორისო სესიაზე წარადგინეს სასტენდო პრეზენტაციები თემაზე: ,,საკოლექციო ხორბლის ჯიშების ღეროს ჟანგას მიმართ გამძლეობის შეფასება“ და ,,მარცვლოვანთა ჟანგები საქართველოში“. ფორუმის ფარგლებში ინსტიტუტის მეცნიერ-თანამშრომლები აშშ-ს მინესოტას უნივერსიტეტის მარცვლოვანთა დავადებების ლაბორატორიის ხელმძღვანელსა და წარმომადგენლებს შეხვდნენ. მხარეთა შეთანხმებით, ქართველი და ამერიკელი მკვლევარები ერთობლივად იმუშავებენ მარცვლოვანთა ჟანგის საკითხებზე. ფიტოპათოლოგიისა და ბიომრავალფეროვნების ინსტიტუტსა და აშშ-ს მინესოტას უნივერსიტეტის მარცვლოვანთა დავადებების ლაბორატორიას შორის 2007 წელს დაწყებული თანამშრომლობა კიდევ უფრო გაფართოვდება და გაღრმავდება.