მიმდინარე წლის 11 თებერვალს განათლების სამინისტროში „მეცნიერ ქალთა და გოგონათა საერთაშორისო დღესთან დაკავშირებით შეხვედრა გაიმართა, ღონისძიების მიზანი იყო მეცნიერებით დაინტერესებულ ქალთა ხელშეწყობა და მეცნიერების, ინოვაციებისა და ტექნოლოგიების სისტემაში მათი მზარდი როლის მხარდაჭერა. აღნიშნულ ღონისძიებაზე საქართველოს განათლების, მეცნიერებისა და ახალგაზრდობის მინისტრმა ბატონმა ალექსანდრე წულაძემ 10 წარმატებული ქალი მეცნიერი და მოსწავლე-გამომგონებელი გოგონა დააჯილდოვა.

ბსუ-ს ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილება თურქმენეთის რესპუბლიკას ეროვნული პარკის დაარსებასა და მენეჯმენტის გეგმის შემუშავებაში დაეხმარება. პროექტი „Partnership for the Benefit of Water-Related Ecosystems“ „წყალთან დაკავშირებული ეკოსისტემების სარგებლობასთან დაკავშირებული თანამშრომლობა“ 2025 წლის აპრილიდან დაიწყება. პროექტი დაფინანსებულია ბიომრავალფეროვნების დაცვის ჩარჩო კონვენციის BBI (Bio Bridge Initiative) ფარგლებში, კორეის მთავრობის მიერ.

ბსუ-ს ფიტოპათოლოგიისა და ბიომრავალფეროვნების ინსტიტუტის მეცნიერ თანამშრომლებმა მზიური გაბაიძემ, სოსო მეფარიშვილმა და ნელი ხალვაშმა მესამე მისიის ფარგლებში საინფორმაციო შეხვედრა ჩაატარეს ქობულეთის მუნიციპალიტეტის სოფელ ლეღვას №1 და ქობულეთის №5 საჯარო სკოლის მოსწავლეებთან. შეხვედრაზე მომხსენებლებმა პრეზენტაცია გააკეთეს თემაზე „აჭარა-გურიის რეგიონის ციტრუსოვანთა პლანტაციებში არსებული ფიტოსანიტარული მდგომარეობა“.

ბათუმის შოთა რუსთაველის სახელმწიფო უნივერსიტეტსა და სოფლის მეურნეობის სამეცნიერო კვლევით ცენტრს შორის თანამშრომლობის მემორანდუმი გაფორმდა. დოკუმენტს ხელი ბსუ-ს რექტორის მოვალეობის შემსრულებელმა მერაბ ხალვაშმა და სოფლის მეურნეობის სამეცნიერო-კვლევითი ცენტრის დირექტორმა, ლევან უჯმაჯურიძემ მოაწერეს. შეთანხმება თანამშრომლობის გაღრმავებას, აგრარული მიმართულებით ერთობლივი პროექტებისა და კვლევების განხორციელებას, კონფერენციების, სემინარების, ტრენინგების ჩატარებას და ასევე ცენტრის საცდელ-სადემონსტრაციო და ლაბორატორიულ ბაზებზე სტუდენტების სტაჟირებას ითვალისწინებს.

23 ოქტომბერს, Interreg NEXT შავი ზღვის აუზის პროგრამის გრანტის CARE SEA ფარგლებში, ბსუ-ს საბუნებისმეტყველო და ჯანდაცვის ფაკულტეტის გეოგრაფიის დეპარტამენტში გაიმართა სემინარი თემაზე: „პლასტიკით და ნანოპლასტიკით დაბინძურების შესწავლისათვის ნიმუშების აღების სტრატეგია“. საუბარი შეეხო მდინარეებისა და შავი ზღვის სანაპირო ზოლის ნანოპლასტიკით დაბინძურების სახეებსა და წყაროებს, შესწავლის მეთოდს. თუ სად და როდის უნდა განხორციელდეს სამეცნიერო კვლევებისათვის ნანოპლასტიკის შესასწავლად ნიმუშების აღება, როგორ უნდა მოხდეს მიკროსკოპის საშუალებით ნანოპლასტიკის კლასიფიკაცია მისი წარმოშობის, ფერის და ფორმების მიხედვით.