ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ბიბლიოთეკის სამკითხველო დარბაზში ისტორიისა და არქეოლოგიის განყოფილების მთავარმა მეცნიერმა თანამშრომელმა გიორგი თავამაიშვილმა ჩაატარა სემინარი თემაზე: „თამბაქო და გვიანი შუასაუკუნეების ოსმალური ჩიბუხები“. მკვლევარმა განიხილა აღმოსავლური (ე. წ. „ოსმალური“) თიხის ჩიბუხები, რომლებიც აღმოჩენილია როგორც დღევანდელი თურქეთის, ასევე, ყოფილი ოსმალეთის იმპერიის გავლენის ქვეშ მყოფი ქვეყნების ტერიტორიაზე. ამ ნაკეთობათა ათასობით ნიმუში ნაპოვნია საქართველოშიც, მეტწილად, სამხედრო-სტრატეგიული ობიექტების - ციხე-სიმაგრეების გათხრების დროს, სადაც კონკრეტულ პერიოდში ოსმალური ელემენტი იყო წარმოდგენილი.

ნიკო ბერძენიშვილის ინსტიტუტის მკვლევარებმა 2017 წელს, სტამბოლის ქართულ სავანეში განხორციელებული სამეცნიერო ექსპედიციების შედეგები წარმოადგინეს. ექსპედიციის წევრებმა ქართველ კათოლიკეთა სტამბოლის ეკლესია-მონასტერთან არსებულ ბიბლიოთეკასა და არქივში დღემდე უცნობი, თურქეთ-საქართველოს კულტურული ურთიერთობის უახლესი ისტორიისათვის საინტერესო წყაროები აღმოაჩინეს. მათგან აღსანიშნავია დამოუკიდებელი საქართველოს მთავრობის წარმომადგენელთა მიერ შექმნილი ოფიციალური ხასიათის ბარათები, მუსლიმან ქართველთა ლეგიონთან დაკავშირებული ისტორიული წყაროები, სიმონ მდივნის დღიურები და 1924 წლის აგვისტოს აჯანყების მომზადებასთან არსებული ჩანაწერები.

ბსუ-ს ნიკო ბერძენიშვილის ინსტიტუტის ბიბლიოთეკის სამკითხველო დარბაზში, ისტორიისა და არქეოლოგიის განყოფილების უფროსმა, ემერიტუს პროფესორმა ბიჭიკო დიასამიძემ ჩაატარა სემინარი თემაზე: „საქართველოს სამოციქულო მართლმადიდებელი ეკლესიის უწმინდესი სინოდის 2012 წლის 5 ივლისის განჩინება“.

ნიკო ბერძენიშვილის ინსტიტუტმა სამეცნიერო-პოპულარული და საზოგადოებრივი ჟურნალ „მაჭახელის“ მერვე ნომერი (რედაქტორი ისტორიის მეცნიერებათა დოქტორი ნოდარ კახიძე, რედაქტორის მოადგილე ისტორიის დოქტორი როინ მალაყმაძე) გამოსცა. ჟურნალში აღწერილია მაჭახლის ეროვნული პარკის საქმიანობა და აჭარის მაღალმთიან სოფლებზე. „მაჭახელი“ მკითხველს ასევე სთავაზობს სტატიებს სხვადასხვა ხეობის ისტორიაზე, ეთნოგრაფიის საკითხებზე, ღვაწლმოსილ ადამიანებსა და სხვა მნიშვნელოვან სიახლეებზე. ჟურნალი გლობალური გარემოსდაცვის ფონდის (GEF), გაეროს განვითარების პროგრამისა (UNDP), და საქართველოს გარემოსა და ბუნებრივი რესურსების დაცვის სამინისტროს „დაცული ტერიტორიების ეროვნული სააგენტოს“ ხელშეწყობით გამოიცა.

ბსუ-ს ნიკო ბერძენიშვილის ინსტიტუტის დირექტორი როინ მალაყმაძე სამეცნიერო მივლინებით ქალაქ სტამბოლში იმყოფებოდა. მკვლევარი 10 დღის განმავლობაში ქართველ მეცნიერებთან ერთად ქართველი საზოგადო მოღვაწის, მწერლის, პუბლიცისტის, გენერალ-ლეიტენანტ გიორგი ყაზბეგის საფლავის დასადგენად მუშაობდა. ექსპედიციის წევრებმა შეისწავლეს სტამბოლის კათოლიკური და მართლმადიდებლური საფლავები და არქივი. აღმოჩნდა მარმარილოს 5 საფლავის ქვა მხედრულით შესრულებული 5 ქართული ეპიტაფიით, რომლებიც წინასწარი მონაცემებით, მე-17-მე-19 საუკუნეებით თარიღდება. ინსტიტუტის არქივს მივლინების დორის გადაღებული ფოტოების ელექტრონული ვერსია გადაეცა.