თურქეთის რესპუბლიკის გენერალური კონსული მაქბულე ქოჩაკი ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინტიტუტის დირექტორს როინ მალაყმაძეს, ბსუ-ს სამეცნიერო კვლევების სამსახურის უფროსს თამარ მაჭუტაძესა და ფოლკლორის, დიალექტოლოგიის და ემიგრანტული ლიტერატურის კვლევის განყოფილების ხელმძღვანელს შუშანა ფუტკარაძეს შეხვდა. დიპლომატიური კორპუსის წარმომადგენელი გაცნობითი ხასიათის შეხვედრაზე ინსტიტუტის მუშაობის სპეციფიკას, სტრატეგიული განვითარების გეგმასა და სამომავლო თანამშრომლობის მიმართულებებს გაეცნო. მხარეთა შეთანხმებით, დაიგეგმა ერთობლივი კონფერენციების, სიმპოზიუმების, ტრენინგების ჩატარება და თურქეთის უმაღლეს საგანმანათლებლო დაწესებულებებთან არსებულ სამეცნიერო ინსტიტუტებთან თანამშრომლობის მემორანდუმის გაფორმება.

აკადემიკოს არნოლდ ჩიქობავას დაბადების 120 წლისადმი მიძღვნილი XXXVIII რესპუბლიკური დიალექტოლოგიური სამეცნიერო სესია გაიხსნა ბათუმის შოთა რუსთაველის სახელობის სახელმწიფო უნივერსიტეტში. ორი დღის განმავლობაში ქვეყნის სხვადასხვა სამეცნიერო ინსტიტუტისა და უმაღლესი საგანმანათლებლო დაწესებულების 50-ზე მეტი მკვლევარი და პროფესორ-მასწავლებელი სამეცნიერო მოხსენებას წარმოადგენს ქართული ენის დიალექტთა ლექსიკის სხვადასხვა აქტუალურ საკითხზე. სესია ოთხ სექციად იმუშავებს, განიხილება დიალექტოლოგიის ფუნდამენტური საკითხები, რაც ხელს უწყობს ქართველური ენებისა და დიალექტების კიდევ უფრო ღრმა შესწავლა-ანალიზს.

16-23 ოქტომბერს, ნიკო ბერძენიშვილის ინსტიტუტის დირექტორი როინ მალაყმაძე და სპეციალისტი სულხან მამულაძე ოფიციალური ვიზიტით რუმინეთის კონსტანცას ოვიდიუსის უნივერსიტეტში იმყოფებოდნენ. ვიზიტის ფარგლებში გაფორმდა თანამშრომლობის მემორანდუმი ნიკო ბერძენიშვილის ინსტიტუტსა და კონსტანცას ოვიდიუსის უნივერსიტეტის სამ მონოთეისტური რელიგიის კვლევით ცენტრს შორის. მემორანდუმის ფარგლებში დაიგეგმა ერთობლივი სამეცნიერო ღონისძიებებისა და საერთაშორისო პროექტების განხორციელება, პუბლიკაციების, მონოგრაფიებისა და სახელმძღვანელოების გამოცემა.