ბათუმის შოთა რუსთველის სახელმწიფო უნივერსიტეტში სამეცნიერო-საგანმანათლებლო ღონისძიების „შავი ზღვის ლურჯი პოლიტიკა“ ფარგლებში, ორდღიანი საერთაშორისო სამეცნიერო კონფერენცია: „შავიზღვისპირეთი ცივილიზაციათა გზაჯვარედინზე“ გაიხსნა. სესიაზე წარმოდგენილი იქნება მოხსენებები შავი ზღვის რეგიონის ისტორიის, არქეოლოგიის, ეთნოლოგიის, ფილოლოგიის, ენათმეცნიერების, ფოლკლორის, ტურიზმის, ეკოლოგიის, ტოპონიმიკის, რელიგიათმცოდნეობის, ფილოსოფიის, არქიტექტურის, სამართალის და სხვა მიმართულებით. კონფერენციის მუშაობაში მონაწილეობას იღებს 14 ქვეყნის (აშშ, დიდი ბრიტანეთი, იტალია, გერმანია, პოლონეთი, საბერძნეთი, რუმინეთი, უკრაინა, თურქეთი და სხვ.) 200-ზე მეტი მონაწილე.

27-29 მაისს, ივანე ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებით გაიმართა ახალგაზრდა მეცნიერთა IV საერთაშორისო სიმპოზიუმი ჰუმანიტარულ მეცნიერებებში, რომელშიც მონაწილეობა მიიღო ნიკო ბერძენიშვილის ინსტიტუტის მეცნიერ-თანამშრომელმა სულხან მამულაძემ. სიმპოზიუმის მუშაობაში ჩართული იყო მსოფლიოს 10-ზე მეტი ქვეყნის სხვადასხვა უნივერსიტეტის წარმომადგენელი, მათ შორის ოქსფორდის, ლონდონის სამეფო კოლეჯის, კემბრიჯის, ჯორჯთაუნის, ედინბურგის, აარუსის, მილანის, თბილისის, ბათუმის და სხვ.

დასრულდა ბსუ-ს ნიკო ბერძენიშვილის ინსტიტუტის ფონდებში დაცული უნიკალური ფოლკლორული ნიმუშების, საექსპედიციო აუდიოჩანაწერების გაციფრულება, აუდიომასალებისა და აღწერილობის დამუშავება-კატალოგიზაცია. პროექტის მიზანი ქართული არამატერიალური კულტურული მემკვიდრეობის შენარჩუნება და ტრადიციული მრავალხმიანობის საარქივო ნიმუშების პოპულარიზება გახლდათ. არქივში დაცული იყო 1958 წლიდან ჩაწერილი 107 ფირი და 65 აუდიოკასეტა. მიღებული იქნა 172 მზა მასალა და 400-ზე მეტი ნიმუში. მასალა განთავსდება ბიბლიოთეკებსა და ინტერნეტ-სივრცეში, რომელიც შიდა რეგულაციების დაცვისა და მოქმედი კანონმდებლობის თანახმად, ხელმისაწვდომი იქნება სამეცნიერო კვლევებისთვისაც. სამომავლოდ, შესაძლებელია საბოლო შედეგების სათანადოდ გამოცემაც.

დედა ენის დღისადმი მიძღვნილი ღონისძიებების ფარგლებში ნიკო ბერძენიშვილის ინსტიტუტის დირექტორი, მთავარი მეცნიერ-თანამშრომელი, როინ მალაყმაძე, ფოლკლორის, დიალექტოლოგიისა და ემიგრანტული ლიტერატურის განყოფილების ხელმძღვანელი, მთავარი მეცნიერ-თანამშრომელი ელზა ფუტკარაძე, ამავე განყოფილების მთავარი მეცნიერ-თანამშრომელი ნაილე მიქელაძე და ეთნოლოგიისა და სოციოლოგიური კვლევის განყოფილების უფროსი მეცნიერ-თანამშრომელი ნაილა ჩელებაძე ქედის მუნიციპალიტეტში საზოგადოების წარმომადგენლებსა და გეგელიძეების საჯარო სკოლის პედაგოგებს შეხვდნენ. საჩუქრად გადასცეს ინსტიტუტის მიერ გამოცემული ბეჭდური მასალები და ესაუბრნენ ქართული ენის მნიშვნელობასა და ღირებულებაზე; ქართული ენის სახელმწიფო ენად გამოცხადების საკითხზე; ფრიდონ ხალვაშის მოღვაწეობასა და მის დამოკიდებულებაზე „ნენეს ენის“ მიმართ.

ბსუ-ს ნიკო ბერძენიშვილის ინსტიტუტი ღრმა მწუხარებას გამოთქვამს ეკონომიკის მეცნიერებათა კანდიდატის, ინჟინერ-ტექნოლოგის ჟანი მიქაშავიძის გარდაცვალების გამო. ჟანი მიქაშავიძე წლების განმავლობაში ნიკო ბერძენიშვილის ინსტიტუტში მუშაობდა, იყო მეცნიერ-თანამშრომელი, სამეცნიერო საბჭოს წევრი, ინსტიტუტის ეკონომიკური და სოციოლოგიური კვლევის განყოფილების უფროსი. იგი ყოველთვის აქტიურად მონაწილეობდა ინსტიტუტის სამეცნიერო საკითხების შემუშავებასა და განხორციელებაში. მისი სამეცნიერო ინტერსების სფერო მოიცავდა ეკოლოგიურ ტურიზმს, ბუნებრივ-რეკრეაციულ და ისტორიულ-კულტურულ რესურსებს, ტურიზმის განვითარების პრობლემებს საქართველოში. ბატონ ჟანის გამოქვეყნებული ჰქონდა რამდენიმე ათეული სამეცნიერო ნაშრომი და მონოგრაფია.