ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტზე საიუბილეო დღეებისადმი მიძღვნილი სტუდენტთა კონფერენცია გაიმართა. მოხსენებები ისეთ საკითხებს შეეხებოდა, როგორიცაა: „საქართველო რუსთაველის ეპოქაში“ (ნ. პატარაია, ხ. ფუტკარაძე), „ვეფხისტყაოსანი-ქართული კულტურისა და სულიერების საფუძველი“ (ლ. მახარაძე), „შუა საუკუნეების რენესანსი და ჰუმანიზმი: შოთა რუსთაველი და ალიგიერი“.

ბათუმის შოთა რუსთაველის სახელმწიფო უნივერსიტეტის სტუდენტთა თვითმმართველობის, სტუდენტთა სამეცნიერო ცენტრისა და თურქეთისმცოდნეობის სპეციალობის 20-მდე სტუდენტი ირანის ისლამური რესპუბლიკის გენერალური კონსულის ჰოსეინ მაშჰადის დაფინანსებით ქალაქ თავრიზში იმყოფებოდა. ერთი კვირის განმავლობაში სტუდენტები ირანულ კულტურას გაეცნენ და ქალაქის ღირსშესანიშნაობები დაათვალიერეს.

18-20 ნოემბერს, თესალონიკში „პონტოელ ბერძენთა მესამე საერთაშორისო კონგრესი“ გაიმართა, რომლის მუშაობაშიც მონაწილეობა მიიღეს ბსუ-ს პროფესორებმა მარინე გიორგაძემ და ემზარ კახიძემ.
ჰუმანიტარულ მეცნიერებათა ფაკულტეტის დეკანმა, ასოცირებულმა პროფესორმა მ. გიორგაძემ მოხსენება წაიკითხა თემაზე: „პონტოელი ბერძნები აჭარაში“ და წარადგინა სამეცნიერო პროექტი, რომელზეც 3 წელია ბსუ-ს მეცნიერთა ჯგუფი მუშაობს.

ჰუმანიტარულ მეცნიერებათა ფაკულტეტის -ისტორიის სპეციალობის სტუდენტების მიერ მოეწყო ინტელექტუალური თამაში სახელწოდებით “1453 წელი-კონსტანტინოპოლის დაცემა და მისი ალტერნატიული ისტორია“.
ღონისძიებაში მონაწილეობდა ისტორიის სპეციალობის სტუდენტებისგან დაკომპლექტებული გუნდები: „დიდგორი“ და „ალბატროსი“ . გუნდებს უნდა შეექმნათ და წარმოედგინათ კონსტანტინეპოლის დაცემის, როგორც რეალური, ასევე ალტერნატიული ისტორიის პრეზენტაცია. კონკურსის დასკვნით ეტაპზე გუნდებს დავალებული ჰქონდათ ეპოქის გაცოცხლება პერფორმანსით. გამარჯვებულ და მონაწილე გუნდებს გადაეცათ ფასიანი საჩუქრები - წიგნები და სიგელები. ასევე გამოვლინდა საუკეთესო მონაწილე.

ინგლისური ფილოლოგიის გაცვლითი პროგრამის სტუდენტებმა ყაზახეთიდან ჰუმანიტარულ მეცნიერებათა სტუდენტებისათვის პრეზენტაცია გამართეს, რომელიც ყაზახეთის დამოუკიდებლობის 25-ე წლისთავს მიუძღვნეს. სტუდენტებმა ასელ ბოკენმა, ამინა ხამითმა და ზაინულა აიგერიმმა ყაზახეთის ისტორიაზე, ეროვნულ იდენტობაზე, ღირსშესანიშნაობებსა და კულტურული ცხოვრების შესახებ ისაუბრეს.