ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის საერთაშორისო სამეცნიერო ელექტრონულ ჟურნალ „აღმოსავლეთმცოდნეობის მაცნეს“ (E-ISSN 2720-8168; ISSN 2587-490X) საერთაშორისო სამეცნიერო ინდე-ქსირების (ISI)/International Scientific Indexing ბაზაში მიენიჭა იმპაქტ ფაქტორის - 2.012 კოეფიციენტი (2024-2025). საერთაშორისო სამეცნიერო ჟურნალი აღმოსავლეთმცოდნეობის მაცნე დაარსდა 2018 წელს ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ბაზაზე.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტზე ევროპეისტიკის დეპარტამენტის პროფესორის ირინა გოშხეთელიანისა და ქართული ფილოლოგიის დეპარტამენტის ასოცირებული პროფესორის ლევან ხალვაშის 70 წლის იუბილესადმი მიძღვნილი შეხვედრა გაიმართა. შეხვედრა გახსნა ჰუმანიტარულ მეცნიერებათა ფაკულტეტის დეკანმა ასოცირებულმა პროფესორმა თეონა ბერიძემ, რომელმაც ხაზი გაუსვა მათ დამსახურებას უნივერსიტეტის წინაშე და მიულოცა საიუბილეო თარიღი.

ბათუმის შოთა რუსთაველის სახელმწიფო უნივერსიტეტში სამეცნიერო კონფერენცია ჩატარდა თემაზე: „ქართულ-პოლონური ურთიერთობები XIX-XX სს. (ისტორიული და სოციო-კულტურული ასპექტები)“. მკვლევრებმა კონფერენციაზე განიხილეს ქართულ-პოლონური ურთიერთობების მრავალმხრივი ასპექტები და ორი ერის საერთო ისტორიული, სოციო-კულტურული და ეკონომიკური კავშირები. ღონისძიების ფარგლებში გაიმართა ქეთევან მანიას წიგნის „პოლონური იდენტობა ქართულ ბეჭდურ მედიაში (XIX საუკუნის 60-იანი წლებიდან XX საუკუნის 40-იან წლებამდე)“ პრეზენტაცია.

ბათუმის შოთა რუსთაველის სახელმწიფო უნივერსიტეტში ქართული ფილოლოგიის დეპარტამენტის პროფესორის, ფილოლოგიის მეცნიერებათა კანდიდატის, მალხაზ ჩოხარაძის 60 წლის იუბილესადმი მიძღვნილი სხდომა და მისი დოკუმენტური ფილმის „ამბავი ჭოროხზე ნაოსნობისა“ ჩვენება გაიმართა. შეხვედრა გახსნა ქართული ფილოლოგიის დეპარტამენტის ხელმძღვანელმა, პროფესორმა მაია ბარამიძემ. იუბილარის ღვაწლზე ისაუბრა პროფესორმა მამია ფაღავამ. ღონისძიებაზე ბსუ-ს რექტორის მოადგილემ ანზორ ბერიძემ მკვლევარს იუბილე მიულოცა და წარმატებული სამეცნიერო და პედაგოგიური საქმიანობისთვის მადლობის სიგელი გადასცა. იუბილარის ღვაწლზე ისაუბრეს და წარმატებები უსურვეს ჰუმანიტარულ მეცნიერებათა ფაკულტეტის დეკანმა თეონა ბერიძემ, პროფესორებმა: ზაზა შაშიკაძემ, რამაზ ხალვაშმა, მურმან გორგოშაძემ, ჯემალ კარალიძემ, აჭარის მწერალთა კავშირის თავმჯდომარემ, პოეტმა დავით თედორაძემ, პოეტმა ვახტანგ ღლონტმა.

ბათუმის შოთა რუსთაველის სახელმწიფო უნივერსიტეტს გერმანული აკადემიური გაცვლის სამსახურის (DAAD) წარმომადგენელი გიგი ჭინჭარაული და ყოფილი სტიპენდიანტი ნინო დავითაძე ეწვივნენ. DAAD-ის წარმომადგენლებმა სასტიპენდიო პროგრამა (ერთთვიანი საზაფხულო კურსი გერმანიაში) ბაკალავრიატის საფეხურის მეორე და მესამე, ასევე მაგისტრატურის პირველი კურსის სტუდენტებს წარუდგინეს და მონაწილეობის პირობები გააცნეს. სასტიპენდიო პროგრამაში მონაწილეობის წინაპირობაა გერმანული ენის ცოდნის B1 დონე. ენის დონის განმსაზღვრელ ტესტირებას DAAD-ის წარმომადგენელი უფასოდ უზრუნველყოფს.