19 მარტს, ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული ‘’ფრანკოფონია-2017’’ გაიხსნა. კვირეული ფრანგულ ენაში კალიგრაფიის კონკურსითა და რეგიონული ფრანგული ენის ტესტირებით დაიწყო. კონკურსში, სახელწოდებით ‘’Bonjour la France’’ რეგიონის საჯარო და კერძო სკოლის მოსწავლეები მონაწილეობდნენ. გამარჯვებულ მოსწავლეებს სერტიფიკატები კვირეულის დასკვნით ცერემონიაზე გადაეცემათ.

შოთა რუსთაველის დარბაზში საერთაშორისო სადოქტორო სკოლის „დიგიტალური ჰუმანიტარია’’ პირველი შესარჩევი ტური დაიწყო. საერთაშორისო პროექტს გოეთეს სახელობის უნივერსიტეტი ბათუმის შოთა რუსთაველის სახელმწიფო უნივერსიტეტთან და ივანე ჯავახიშვილის სახელობის თბილისის სახელმწიფო უნივერსიტეტთან ერთად ახორციელებს. პროექტის მიზანია ჰუმანიტარულ მეცნიერებებში კვლევის უახლესი მეთოდების შემოტანა, დანერგვა და ახალგაზრდა სამეცნიერო კადრების მომზადება, რაც ხელს შეუწყობს საქართველოში დიგიტალური ჰუმანიტარიის განვითარებას. ღონისძიების ფარგლებში ასევე გაიხსნა დიგიტალური ჰუმანიტარიის ცენტრი.

ჰუმანიტარულ მეცნიერებათა ფაკულტეტის ბაკალავრიატისა და მაგისტრატურის 13 სტუდენტი მიმდინარე სემესტრში სწავლას უცხოეთის უნივერსიტეტებში გააგრძელებს ერაზმუს+ -ის და სხვა გაცვლითი პროგრამების ფარგლებში.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის, ქართული ფილოლოგიის დეპარტამენტებისა და ისტორიის სტუდენტური კლუბის ორგანიზებით დავით აღმაშენებლისადმი მიძღვნილი სტუდენტთა კონფერენცია გაიმართა. სესიაზე ისტორიისა და ქართული ფილოლოგიის სტუდენტებმა ანა ბაგრატიონმა, თათული მოწყობილმა და თათია დევაძემ მოხსენებები წარმოადგინეს თემებზე: „დავით აღმაშენებელი - ცხოვრება და მოღვაწეობა“, „დავით აღმაშენებლის ციკლის საისტორიო ზეპირსიტყვიერება“ წარმოადგინეს. ახალგაზრდებმა კონფერენციაზე კიდევ ერთხელ შეაჯამეს დავით აღმაშენებლის ცხოვრება და მის მიერ გატარებული რეფორმები.

ჰუმანიტარულ მეცნიერებათა ფაკულტეტის ისტორიის სპეციალობის IV კურსის სტუდენტებმა შემაჯამებელი ღონისძიება გამართეს თემაზე: აზიისა და აფრიკის ქვეყნების ახალი და უახლესი ისტორია.
ღონისძიების მიზანი აზიისა და აფრიკის ქვეყნების ისტორიის განვლილი სასწავლო კურსის შეჯამება და აღნიშნული ქვეყნების პოლიტიკური სისტემის, საგარეო და საშინაო პოლიტიკის განხილვა იყო.