2-7 აგვისტოს ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მთავარმა მეცნიერ-თანამშრომელმა გალინა მეფარიშვილმა და უფროსმა მეცნიერ-თანამშრომელმა ცისანა ცეცხლაძემ მონაწილეობა მიიღეს უკრაინის ქალაქ ჩერნოვცში გამართული საერთაშორისო სამეცნიერო კონფერენციის „ფიტოსანიტარული უსაფრთხოება მიწათმოქმედების ეკოლოგიზაციის პირობებში“ მუშაობაში. გალინა მეფარიშვილი სესიაზე მოხსენება წარადგინა თემაზე: „საკარანტინო დაავადებების შესწავლა საქართველოში“, ცისანა ცეცხლაძემ მოხსენება „პომიდვრის ჯიშების გამძლეობა მთავარი სოკოვანი დაავადებებისა და ბაქტერიული ჭკნობის მიმართ“ წაიკითხა.

26-28 ივნისს ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარების და წყლის ეკოსისტემების კონსერვაციის განყოფილების ხელმძღვანელმა იზოლდა მაჭუტაძემ მონაწილეობა მიიღო რომში გამართულ შეხვედრაში თემაზე: „შავი ზღვის აღმოსავლეთ სანაპირო ზოლის რეგიონების ტყეებსა და სასოფლო-სამეურნეო სავარგულებში გავრცელებული ინვაზიური მავნებლებისა და დაავადებების საფრთხეების თავიდან აცილების შესახებ ტექნიკურ ექსპერტთა საერთაშორისო სამუშაო შეხვედრა“. ჟენევის (2015), ბრნოს (2016) და ვენის (2017) სამუშაო შეხვედრების შემდგომ ღონისძიებაზე განხილული იყო შავი ზღვის აღმოსავლეთ სანაპირო რეგიონების აქტუალური საკითხები.

16-23 ივნისს ბსუ-ს ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსი ზოია სიხარულიძე და უფროსი მეცნიერ თანამშრომელი ქეთინო ნაცარიშვილი ჩინეთში (ქ. იანგლინი) ჩრდილო-დასავლეთის აგრარულ და სატყეო უნივერსიტეტში (Northwest A&F University) იმყოფებოდნენ. ვიზიტი მიზნად ისახავდა უნივერსიტეტის ლაბორატორიების გაცნობასა და სასოფლო სამეურნეო კულტურების ბიოლოგიური სტრესის ლაბორატორიასთან თანამშრომლობის გაღრმავებას. მკვლევარებმა ვიზიტის ფარგლებში NWAFU-ს პროფესორებისა და სტუდენტთათვის სემინარი ჩაატარეს. ზოია სიხარულიძემ სემინარის მონაწილეებს ბსუ-ს ფიტოპათოლოგიისა და ბიომრავალფეროვნების ინსტიტუტშის სამეცნიერო კვლევების შედეგები გააცნო, ხოლო ქეთინო ნაცარიშვილმა უნივერსიტეტის ისტორიასა და მიღწევებზე ისაუბრა.

19-20 ივნისს ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილების ხელმძღვანელმა იზოლდა მაჭუტაძემ მონაწილეობა მიიღო პოლონეთში, კორნიკში გამართულ საერთაშორისო კონფერენციაში თემაზე: „რელიქტური მერქნიანი მცენარეები - წარსული, აწმყო, მომავალი“. მსოფლიოში კლიმატის ცვლილებით გამოწვეულმა პროცესებმა მსოფლიო ფლორის რელიქტური მერქნიანი სახეობები საფრთხის წინაშე დააყენა. აუცილებელია ბუნებრივი სახით ტყეების აღდგენა და ამ მხრივ სამეცნიერო კვლევებისა და პროექტების განხორციელება. ფიტოპათოლოგიისა და ბიომრავალფეროვნების ინსტიტუტში იგეგმება რელიქტური კოლხური ტყის აღდგენის პროექტების განხორციელება, განსაკუთრებით საფრთხის ქვეშ მყოფი სახეობების - ლაფანის, ჰართვისის მუხის და კოლხური ბზის თანამონაწილეობით. მიმდინარეობს სამეცნიერო კვლევები შვეიცარიის ფრიბურგის უნივერსიტეტის მეცნიერებთან ერთად.

ბათუმის შოთ რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსმა ზოია სიხარულიძემ მონაწილეობა მიიღო მაროკოში, ქალაქ მარაკეში გამართულ მარცვლოვანთა ჟანგების გლობალური მონიტორინგის საერთაშორისო ვორკშოპში ( BGRI ). ერთი კვირის განმავლობაში 51 ქვეყნის 300 წარმომადგენელმა ხორბლისა და მისი ძირითადი დაავადებების კვლევები წარმოადგინა. ვორკშოპზე წარმოდგენილი იყო ინსტიტუტის გამძლეობის გენეტიკის განყოფილებისა და მინესოტას უნივერსიტეტის მარცვლოვანთა დაავადებების ლაბორატორიის ერთობლივი კვლევის შედეგები. ღონისძიების ფარგლებში კონკრეტულ საკითხებზე გაიმართა სამეცნიერო ტრენინგები, მკვლევართა შეხვედრები და განისაზღვრა სამომავლო თანამშრომლობის მიმართულებები.