დასრულდა მუშაობა ბსუ-ს ნიკო ბერძენიშვილის ინსტიტუტის მიერ სტამბულის ქართულ სავანეში მოპოვებული მასალების გარკვეულ ნაწილზე. მომზადდა მასალათა კრებული „სტამბოლის ქართული სავანის ეპისტოლური და მემუარული მემკვიდრეობა“. წინამდებარე კრებულში (ტომი მეორე) წარმოდგენილია ქალაქ სტამბოლში, ქართველ კათოლიკეთა ეკლესია-მონასტერთან არსებულ ბიბლიოთეკასა და არქივში საიმედოდ დაცული და შემონახული ქართული კულტურული მემკვიდ-რეობის შესანიშნავი ნიმუშები, როგორიცაა: პუბლიცისტური და კერძო წერილები, მემუარული ჩანაწერები, ემიგრაციაში მყოფი საქართველოს რესპუბლიკის ეროვნული მთავრობის საქმიანობის ამსახველი, სხვადასხვა შინაარსისა და დანიშნულების მქონე ისტორიული წყაროები.

კრებული შედგება რვა კარისაგან. კრებულის პირველ კარში მოცემულია აღნიშნული საგრანტო პროექტის ფარგლებში შესრულებული ნაშრომები და სტამბოლის ქართული სავანის ახალ¬გაზრდა მეცნიერ-მკვლევართა – პაულა და პავლე ზაზაძეების თანაავტორობით შესრულებული ის სტატიები, რომლებიც მათ წაიკითხეს ვატიკანში  გამართულ პეტრე ხარისჭირაშვილის (1861 წელს სტამბოლში ქართველ კათოლიკეთა ეკლესია-მონასტრის დამაარსებლის) დაბადებიდან 200 წლისადმი მიძღვნილ სამეცნიერო კონფერენციაზე.

წიგნში წარმოდგენილი საზღვარგარეთ, თურქეთის რესპუბლიკის ქალაქ სტამბოლში, შემონახული ქართული კულტურული მემკვიდრეობის შესანიშნავი ნიმუშები მხოლოდ მცირე ნაწილია იმ სულიერი საუნჯისა, რომელიც დაცულია სტამბოლის ქართველ კათოლიკეთა ეკლესია-მონასტერთან არსებულ ბიბლიოთეკასა და არქივში.

წინამდებარე კრებული „წერილები სტამბოლის ქართული სავანიდან“, ტომი მეორე, საინტერესო წიგნი იქნება მკითხველთა ფართო წრისათვის; იგი ბევრ ახალ ცნობას მიაწვდის საქართველოს ისტორიის, ეთნოგრაფიის, ენათმეცნიერების (დიალექტოლოგიის), ლიტერატურათმცოდნეობის, თურქეთ-საქართველოს კულტურული ურთიერთობის უახლესი ისტორიის საკითხებით დაინტერესებულ მკვლევარებსა და მკითხველ საზოგადოებას.

კრებულის ავტორები: როინ მალაყმაძე, მთავარი მეცნიერი თანამშრომელი, ისტორიის დოქტორი, ნიკო ბერძენიშვილის ინსტიტუტის დირექტორი,შუშანა ფუტკარაძე, ფილოლოგიის მეცნიერებათა დოქტორი, ემერიტუს-პროფესორი ,ელზა ფუტკარაძე, მთავარი მეცნიერი თანამშრომელი, ფილოლოგიის დოქტორი, შორენა ფუტკარაძე, დოქტორანტი.

წიგნის რეცენზენტები: პროფესორები – იზა ჩანტლაძე, ტარიელ ფუტკარაძე, ავთანდილ ნიკოლეიშვილი.

რეზიუმისა და სტატიების თარგმანი ეკუთვნის პროფესორ თამარ სირაძეს.

წიგნი ეძღვნება სტამბოლის ქართული სავანის ამაგდარი პიროვნებების მამა-შვილ
პავლე და სიმონ ზაზაძეების ხსოვნას.
კრებულს თან ერთვის უნიკალური საარქივო მასალისა და მეცნიერთა მუშაობის ამსახველი ფოტო ილუსტრაციები.

კრებულის პირველი ტომი დაიბეჭდა რუსთაველის ეროვნული სამეცნიერო ფონდის მიერ დაფინანსებული საგრანტო პროექტის ფარგლებში.