ახალი ამბები

აბიტურიენტთა მოზიდვის პროექტის ფარგლებში, წმიდა მეფე დავით აღმაშენებლის ხსენების დღისადმი მიძღვნილი ინტელექტუალური თამაში გაიმართა. შეჯიბრში ბათუმის 28 საჯარო და კერძო სკოლის მოსწავლეები მონაწილეობდნენ. პირველობა ანდრია პირველწოდებულის სახელობის სკოლის გუნდმა „მიუწვდომელმა“ მოიპოვა, მეორე - რ. შახინის მეგობრობის ლიცეუმის გუნდს „მწიგნობარს“ ერგო, მესამე კი - №9 საჯარო სკოლის გუნდმა „მამულიშვილმა“ დაიკავა. ორგანიზატორებმა ყველა მონაწილეს სერტიფიკატი და გამარჯვებულ გუნდებს უნვერსიტეტის ადმინსიტრაციისა და პროფესორ-მასწავლებლების მიერ დაწესებული პრიზები გადასცეს, ხოლო პროექტის მხარდამჭერმა აჭარის ავტონომიური რესპუბლიკის სპორტისა და ახალგაზრდობის დეპარტამენტმა - ზამთრის კურორტ გომარდულის საგზურით დააჯილდოვა. ინტელექტუალური თამაში ყოველწლიურად რსუ-ს სტუდენტთა მომსახურებისა და მხარდაჭერის სამსახურისა და სტუდენტთა სამეცნიერო ცენტრის ორგანიზებით იმართება.

ცნობილი მეცნიერის, ფსიქოლოგიის მეცნიერებათა დოქტორის, ღვაწლმოსილი პროფესორის, შოთა რუსთაველის სახელმწიფო უნივერსიტეტის სოციალურ მეცნიერებათა დეპარტამენტის ხელმძღვანელის გურამ ჩაგანავას 70 წლისადმი მიძღვნილი საიუბილეო სხდომა გაიმართა. მკვლევრის ცხოვრებაზე, სამეცნიერო და პედაგოგიურ მიღწევებზე უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს თავმჯდომარემ, პროფესორმა მიხეილ მახარაძემ, სოციალურ მეცნიერებათა, ბიზნესისა და სამართალმცოდნეობის ფაკულტეტის დეკანმა ადამ მახარაძემ, პროფესორებმა ნოდარ ბარამიძემ, ილია კეჭაყმაძემ, ნოდარ კახიძემ, კოლეგებმა, სტუდენტებმა და მეგობრებმა ისაუბრეს. გურამ ჩაგანავა ავტორია ასზე მეტი სტატისა და ოთხი მონოგრაფიისა, მას მნიშვნელოვანი წვლილი მიუძღვის ქართული ფსიქოლოგიური სკოლის განვითარებისა და მომავალი თაობის აღზრდის საქმეში.

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და რიზეს უნივერსიტეტის რექტორმა, პროფესორმა არიფ ილმაზიმ ხელი მოაწერეს თანამშრომლობის მემორანდუმს. ხელშეკრულება ითვალისწინებს ერთობლივი საგანმანათლებლო პროგრამებისა და სამეცნიერო პროექტების განხორციელებას. ერთობლივად ჩატარდება კონფერენციები, სიმპოზიუმები და სემინარები. მემორანდუმის ფარგლებში შესაძლებელი იქნება პროფესორ-მასწავლებლების, მკვლევრებისა და სტუდენტების გაცვლითი პროგრამების ამოქმედება, ონლაინ ბიბლიოთეკით სარგებლობა, საგანმანათლებლო, მეცნიერული და მეთოდოლოგიური ლიტერატურის გაცვლა და გაზიარება. ასევე განხორციელდება კულტურული, სპორტული და სხვა ერთობლივი ღონისძიებები.

თიბისი გალერეაში სამეცნიერო-პოპულარული და საზოგადოებრივი ჟურნალ „მაჭახლის“ №5 და მაჭახლის ხეობის თემატიკაზე შექმნილი კლიპების წარდგინება გაიმართა. ჟურნალი შოთა რუსთაველის სახელმწიფო უნივერსიტეტის სამეცნიერო ცენტრის ნიკო ბერძენიშვილის ჰუმანიტარულ და სოციალურ მეცნიერებათა მიმართულებამ გამოსცა და „მაჭახლობის“ სახალხო დღესასწაულს ეძღვნება. „მაჭახელი“ მკითხველს სიახლით გამორჩეულ სხვადასხვა თემატიკის სტატიებს, წერილებს, ინტერვიუებსა და ხეობის ცხოვრების ამსახველ მასალებს სთავაზობს. წარმოდგენილი ნომერი ორად გაყოფილი მაჭახლის ისტორიასა და ეთნოგრაფიას, მატერიალური და სულიერი კულტურის საკითხებს, XIX საუკუნის მეორე ნახევარში თურქეთში მოღვაწე და ქართული საზოგადოებისათვის დღემდე უცნობ მაჭახლელებსა და 1951 წლის რეპრესირებულებს ეთმობა.

ამერიკის სახელმწიფო დეპარტამენტისა და საელჩოს ორგანიზებით, შოთა რუსთაველის სახელმწიფო უნივერსიტეტს კალიფორნიის უნივერსიტეტის კოლინსის კოლეჯის ტურიზმის მენეჯმენტის ფაკულტეტის დეკანი ენდი ფეინშტეინი ეწვია. ტურიზმის ფაკულტეტის პროფესორ-მასწავლებლებთან გამართული შეხვედრის შემდეგ ამერიკელმა ექსპერტმა საჯარო ლექცია წაიკითხა თემაზე: „საერთაშორისო ტურიზმის განვითარების ტენდეციები“. სტუმარმა სტუდენტებს ტურიზმის განვითარების ტენდენციები და პერსპექტივები გააცნო და მრავალწლიანი მუშაობის გამოცდილება გაუზიარა. დოქტორმა ენდი ფეინშტეინმა ასევე ისაუბრა შოთა რუსთაველის სახელმწიფო უნივერსიტეტისა და კალიფორნიის უნივერსიტეტის სამომავლო თანამშრომლობაზე. საჯარო ლექციის დასასრულს, ტურიზმის ფაკულტეტის სტუდენტებმა ტურიზმის მენეჯმენტზე, აჭარის ტურისტულ პოტენციალსა და სამთო ტურიზმის განვითარების საკითხებზე მოხსენებები წარმოადგინეს.