ბათუმის შოთა რუსთაველის სახელმწიფო უნიევრსიტეტში ახალი საბაკალავრო საგანამანთლებლო პროგრამის „საჯარო მმართველობის“ შემუშავებისთვის შექმნილმა სამუშაო ჯგუფმა შეხვედრა გამართა პროგრამის პოტენციურ განმახორციელებელ პირებთან პროგრამის მიზნების, სწავლის შედეგებისა და მისი შეფასების მეთოდების გაცნობის მიზნით. შეხვედრაზე მხარეებმა ერთმანეთს გაუზიარეს მოსაზრებები პროგრამის სასწავლო კურსებში ჩართული სწავლისა და სწავლების სხვადასხვა მეთოდის გამოყენების დასაბუთების შესახებ. შეხვედრის შედეგად, საბოლოოდ განისაზღვრა სწავლება-სწავლის ის მეთოდები, რამაც ხელი უნდა შეუწყობს საგანმანთლებლო პროგრამის მიზნებით დასახული კომპტენციების ჩამოყალიბებას.

საზოგადოებრივ და პოლიტიკურ მეცნიერებათა დეპარტამენტის ასოცირებულმა პროფესორმა ლაშა ბაჟუნაიშვილმა 4-13 აპრილს ერასმუს +-ის პროგრამის ფარგლებში ზალცბურგის უნივერსიტეტის მიერ ორგანიზებულ და ევროპის სამეზობლო პოლიტიკის საკითხებისადმი მიძღვნილ საერთაშორისო კონფერენციასა და ექსპერტთა სემინარის მუშაობაში მიიღო მონაწილეობა. მკვლევარმა კონფერენციაზე წარაგენა მოხსენება თემაზე: „Limitrophes” as Cause of Contested Neighborhood“. პროექტის ფარგლებში ასევე ჩატარდა ტრენინგები უმაღლეს საგანმანათლებლო დაწესებულებებში სოციალურ და პოლიტიკურ მეცნიერებებში (ევროპისმცოდნეობის და საერთაშორისო ურთიერთობებში) კვლევაზე დაფუძნებული სწავლების დანერგვისა და წარმატებით განხორციელების შესახებ.

ბათუმის შოთა რუსთაველის სახელმწიფო უნივერსიტეტში შვეიცარიული სასწავლო ფსიქოთერაპიული პროგრამის „ბიოსინთეზის“ ფარგლებში სამდღიანი სემინარი ტარდება. კვალიფიკაციის ამაღლების პროგრამაში ჩართული არიან ბსუ-ს სოციალურ მეცნიერებათა დეპარტამენტის პროფესორ-მასწავლებლები, კლინიკური ფსიქოლოგიის მაგისტრები, ფსიქოლოგიის კლინიკის თერაპევტები, ფსიქოლოგიის სპეციალობის კურსდამთავრებულები. ტრენერი, ესპანელი ფსიქოთერაპევტი, ბიოსინთეტიკოსი პაზ კარდინი სემინარის მონაწილეებს თანამედროვე ფსიქოთერაპიის მიმდინარეობის აქტუალურ საკითხებს და მუშაობის სპეციფიკას აცნობს.

10-12 აპრილს, იტალიის ქალაქ ტურინში, ტურინის უნივერსიტეტში ევროპის იურიდიული ფაკულტეტების (ELFA) ყოველწლიური სამუშაო შეხვედრა და საერთაშორისო კონფერენცია „ინტეგრაცია და მრავალფეროვნება ევროპის იურიდიულ განათლებაში“ გაიმართა. კონფერენციის მუშაობაში მონაწილეობა მიიღეს ბსუ-ს იურიდიული და სოციალურ მეცნიერებათა ფაკულტეტის დეკანმა, ასოცირებულმა პროფესორმა ლევან ჯაყელმა და პროფესორმა ადამ მახარაძემ. სამუშაო შეხვედრებსა და კონფერენციაზე მონაწილეებმა განიხილეს თანამედროვე იურიდიული განათლების გამოწვევები, შედარებითი სამართალი ევროპის უმაღლეს სასამართლოში, ევროპული სამართლის იურისტი, აკადემიური კარიერა ცვალებად გარემოში, კიბერ უსაფრთხოებისა და პირადი უსაფრთხოების პრობლემები.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის უფროსმა მასწავლებელმა ინგა ცინცქილაძემ 8-12 აპრილს, პროგრამის Erasmus+-ის ფარგლებში ლექციები ჩაატარა პოლონეთში ნიკოლას კოპერნიკის სახელობის უნივერსიტეტში. ლექციები მოიცავდა ისეთ აქტუალურ საკითხებს, როგორიცაა: საქართველო-ევროკავშირის ურთიერთობები ევროპის სამეზობლო პოლიტიკის ჭრილში და ევროკავშირის სტრატეგიული პარტნიორობა, საერთაშორისო ურთიერთობები პოსტსაბჭოთა სივრცეში.