ახალი ამბები

ბათუმის შოთა რუსთაველის სახელმწიფო უნივერსიტეტში კურსდამთავრებულთა გამოშვების საზეიმო ღონისძიება გაიმართა. მანტიებში გამოწყობილ კურსდამთავრებულებს უნივერსიტეტის რექტორის მოვალეობის შემსრულებელმა მერაბ ხალვაშმა, ადმინისტრაციის ხელმძღვანელმა მერაბ დიასამიძემ, რექტორის მოადგილეებმა თამარ სირაძემ და ანზორ ბერიძემ, ფაკულტეტების დეკანებმა, პროფესორ-მასწავლებლებმა და მოწვეულმა სტუმრება სწავლის დასრულება მიულოცეს, წარმატებები უსურვეს და სერტიფიკატები გადასცეს. ბსუ 2024 წელს ყველა საფეხურის საგანმანათლებლო პროგრამის 1200-მდე სტუდენტმა დაამთავრა.

ბსუ-ში ევროკავშირის მიერ დაფინანსებული ჟან მონეს კათედრის „უფრო ახლოს ევროკავშირთან“ ფარგლებში, ერთკვირიანი საზაფხულო სკოლა „ევროკავშირის კონკურენციის სამართალი“ გაიხსნა. საზაფხულო სკოლას ჟან მონეს კათედრის ხელმძღვანელი ბსუ-ს პროფესორი სოლომონ მენაბდიშვილი უძღვება და მასში მონაწილეობს საქართველოს სხვადასხვა უნივერსიტეტის 32 სტუდენტი. სწავლების მიზანია, სტუდენტებს მისცეს საბაზისო ცოდნა ევროკავშირის კონკურენციის სამართლის შესახებ. საზაფხულო სკოლის ფარგლებში განხილული იქნება ევროკავშირის კონკურენციის სამართლის შემდეგი საკითხები: კონკურენციის სამართალის წარმოშობა, მისი მიზნები, ეკონომიკური აგენტების შეთანხმებული მოქმედებები (კარტელები), კარტელის პასუხისმგებლობისაგან განთავისუფლების პირობები, ეკონომიკური აგენტების მიერ დომინანტური მდგომარეობის ფლობა.

აჭარის მთავრობის თავმჯდომარე თორნიკე რიჟვაძე ბათუმის შოთა რუსთაველის სახელმწიფო უნივერსიტეტში საქართველოს საჯარო უნივერსიტეტების სტუდენტური კლუბების წევრებს შეხვდა. თორნიკე რიჟვაძემ ახალგაზრდებს აჭარაში განხორციელებული და დაგეგმილი საგანმანათლებლო, ინფრასტრუქტურული, საინვესტიციო პროექტები გააცნო და მათთვის საინტერესო და მნიშვნელოვანი საკითხები განიხილა. სტუდენტურ კლუბებთან გამართულ შეხვედრას საქართველოს განათლების, მეცნიერებისა და ახალგაზრდობის მინისტრის მოადგილე ნოდარ პაპუკაშვილი, ახალგაზრდობის საქმეთა დეპარტამენტის უფროსი ნიკა ჩხარტიშვილი, ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელი მერაბ ხალვაში ესწრებოდნენ.

ბსუ-ში საზაფხულო სკოლა „ევროკავშირში გაწევრიანების პოლიტიკური კრიტერიუმები და ევროპეიზაცია“ გაიხსნა. სკოლა ტარდება „ერაზმუს+“-ის პროგრამის, ევროკავშირის მიერ დაფინანსებული ჟან მონეს მოდულის „ევროკავშირში გაწევრიანების პოლიტიკური კრიტერიუმები და საქართველოს, მოლდოვასა და უკრაინის ევროპეიზაციის“ ფარგლებში, რომელიც იურიდიული და სოციალურ მეცნიერებათა ფაკულტეტზე ხორციელდება 2023 წლიდან. მოდული მიზნად ისახავს ევროკავშირის ღირებულებების პოპულარიზაციას ევროკავშირის შესახებ კვლევებისა და სწავლების განვითარების ხელშეწყობის გზით. ჟან მონეს მოდულის კოორდინატორია ბსუ-ს პროფესორი, ჟან მონეს კათედრის ხელმძღვანელი მალხაზ ნაკაშიძე.

ბათუმის შოთა რუსთაველის სახელმწიფო უნივერსიტეტში რექტორის მოვალეობის შემსრულებლის არჩევნები გაიმართა. აკადემიური საბჭოს ათივე წევრმა მხარი დაუჭირა პროფესორ მერაბ ხალვაშის კანდიდატურას. კენჭისყრის დაწყებამდე კანდიდატმა მერაბ ხალვაშმა უმაღლესი საგანმანათლებლო დაწესებულების მართვის ორგანოს წევრებს მოკლევადიანი (ექვსთვიანი) სამოქმედო გეგმა გააცნო. რექტორის მოვალეობლის შემსრულებლის არჩევნებში მონაწილეობა აკადემიური საბჭოს მიერ განსაზღვრული კრიტერიუმის მიხედვით, დოქტორს ან მასთან გათანაბრებული აკადემიური ხარისხის მქონე პირებს შეეძლოთ.