რსუ-ს რექტორი, პროფესორი ალიოშა ბაკურიძე საქმიანი ვიზიტით გერმანიას, საბერძნეთსა და იტალიას ეწვია. ხელი მოეწერა ურთიერთთანამშრომლობის მემორანდუმს რომუალდო დელ ბიანკოს ფონდთან. მომზადდა მემორანდუმი ინდიანაპოლისის, ათენის და მიუნხენის ლუდვიგ მაქსიმილიანის უნივერსიტეტებთან გასაფორმებლად. დაიგეგმა სტუდენტთა და პროფესორ-მასწავლებელთა გაცვლითი პროგრამები, ერთობლივი სამეცნიერო კონფერენციები, სიმპოზიუმები და შემოქმედებითი ღონისძიებები.
რესპუბლიკური სამეცნიერო კონფერენცია ,,რუსეთ-საქართველოს 1921 წლის თებერვალ-მარტის ომი: ბრძოლა ბათუმისათვის“ რსუ-სა და საქართველოს პოლიტოლოგიის ინსტიტუტის ორგანიზებით ჩატარდა. კონფერენცია მსოფლიოს წამყვანი სახელმწიფოებისათვის ბათუმის გეოსტრატეგიული მნიშვნელობის ჩვენებასა და რუსეთის აგრესიული ქმედებების სამართლებრივ-პოლიტიკურ შეფასებას ისახავდა მიზნად. მეცნიერებმა პატივი მიაგეს ქვეყნის დაცვისას დაღუპულ გმირებს და იუნკერთა მემორიალი ყვავილებით შეამკეს.
შოთა რუსთაველის სახელმწიფო უნივერსიტეტს ამერიკის შეერთებული შტატების საელჩოს კულტურის საქმეთა ოფიცერი საულ ჰერნანდესი და ,,New York Times Magazine” - ის ყოფილი რედაქტორი ქეთრინ ბუტონი სტუმრობდნენ. ცნობილი გამოცემის რედაქტორმა ჰუმანიტარულ მეცნიერებათა ფაკულტეტის ინგლისური ენისა და ლიტერატურის სპეციალობის სტუდენტებისათვის წაიკითხა ღია ლექცია თემაზე: ,,თანამედროვე ამერიკული ლიტერატურა“.
აიოვას სახელმწიფო უნივერსიტეტისა (აშშ) და ართვინის ჭოროხის უნივერსიტეტის (თურქეთი) პროფესორ-მასწავლებლები რსუ-ს რექტორსა და ფაკულტეტის დეკანებს შეხვდნენ. მხარეები სტუდენტური გაცვლითი პროგრამების განხორციელებაზე, ერთობლივად მაგისტრანტებისა და დოქტორანტების მომზადებასა და სამეცნიერო კონფერენციების ჩატარებაზე შეთანხმდნენ. უახლოეს მომავალში აიოვას სახელმწიფო უნივერსიტეტთან ურთიერთთანამშრომლობის მემორანდუმი გაფორმდება.
სოციალურ მეცნიერებათა, ბიზნესისა და სამართალმცოდნეობის ფაკულტეტთან არსებულმა ფოტო-ვიდეო სტუდიამ და სტუდენტურმა თვითმმართველობამ ერთობლივი პროექტების შედეგები წარმოადგინეს. საანგარიშო გამოფენაზე ფოტოებთან ერთად ნაჩვენები იყო ,,აჭარის ქრისტიანული ძეგლების“ სერიიდან ფილმები: ,,ხიხანი“ და ,,აიდიო“. დოკუმენტური ფილმების პრეზენტაციის შემდეგ ნამუშევრების განხილვა მოეწყო.
