ადამიანის უფლებათა საუნივერსიტეტო კვირეულის ფარგლებში ბათუმის შოთა რუსთაველის სახელმწიფო უნივერსიტეტში შეხვედრა გაიმართა. ბსუ-ს იურიდიული და სოციალურ მეცნიერებათა ფაკულტეტის ლექტორმა, საქართველოს საკონსტიტუციო სასამართლოს უფროსმა მრჩეველმა ზურაბ კვირკვაიამ საჯარო ლექცია წაიკითხა თემაზე: „ადამიანის უფლებების საერთაშორისო და ეროვნული სტანდარტები - გამოწვევები და პერსპექტივები“. სამთავრობო და არასამთავრობო ორგანიზაციების წარმომადგენლებმა ისაუბრეს თუ რა გავლენას ახდენს ადამიანის უფლებების საერთაშორისო სტანდარტები ეროვნულ კანონმდებლობასა და პრაქტიკაზე და განიხილეს ევროპული კონვენციის იმპლემენტაციის პროცესი - გამოწვევები და მიღწევები. შეხვედრა კითხვა-პასუხის რეჟიმში გაგრძელდა და მომხსენებლებმა სტუდენტების შეკითხვებს უპასუხეს.

ახალგაზრდა იურისტთა განვითარების ასოციაციის ორგანიზებით ბათუმის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სტუდენტებისათვის ბსუ-ს მოწვეულმა ლექტორმა გიგა ფარტენაძემ ტრენინგი ჩაატარა თემაზე: „დებატების ხელოვნება“. შეხვედრაზე განხილული იყო დებატების მნიშვნელობა და აქტუალობა საზოგადოებაში. გიგა ფარტენაძემ ასევე ისაუბრა დებატების განსხვავებულ ფორმატებზე, რომლთაგან შეარჩიეს ერთ-ერთი ოპტიმალური ვარიანტი შემდგომში დებატების პრაქტიკულად განხორციელებისათვის.

საინფორმაციო სასწავლო პროგრამის „ინფორმირებული ახალგაზრდა ამომრჩეველი“ ფარგლებში ცენტრალური საარჩევნო კომისიის საარჩევნო სისტემების განვითარებისა და რეფორმების ცენტრის ტრენერმა დავით თოდრიამ იურიდიული და სოციალურ მეცნიერებათა ფაკულტეტის სტუდენტებისათვის სემინარი ჩაატარა. ტრენერი ახალგაზრდებს ესაუბრა არჩევნების არსსა და მის მნიშვნელობაზე ქვეყნის დემოკრატიზაციის პროცესში, არჩევნების საერთაშორისო სტანდარტებსა და პრინციპებზე. დავით თოდრიამ ყურადღება გაამახვილა ასევე არჩევნებში ჩართულ მხარეებსა და მათ როლზე საარჩევნო პროცესში, აქტიურ მოქალაქეობასა და არჩევნებში მონაწილეობის მნიშვნელობაზე.

„საქართველოს დამფუძნებელი კრება, სხდომის ოქმების“ პრეზენტაცია გაიმართა ბათუმის შოთა რუსთაველის სახელმწიფო უნივერსიტეტში. ისტორიის მეცნიერებათა დოქტორმა, საქართველოს პარლამენტის არქივის დირექტორმა ირაკლი იაკობაშვილმა სტუდენტებსა და პროფესორ-მასწავლებლებს სხდომების სტენოგრაფიული ანგარიშების შვიდტომეული ტომეული წარუდგინა და მოხსენება წაიკითხა თემაზე: „დამფუძნებელი კრების სტენოგრაფიული ანგარიში და მისი მნიშვნელობა საქართველოს დემოკრატიული რესპუბლიკის (1918-1921) ისტორიის შესწავლის საქმეში.

საქართველოს პარლამენტარიზმის ასი წლის იუბილესადმი მიძღვნილი სამეცნიერო კონფერენცია „ქართული პარლამენტარიზმი: წარსული და თანამედროვეობა“ გაიმართა ბათუმის შოთა რუსთაველის სახელმწიფო უნივერსიტეტში. სესიაზე საქართველოს სხვადასხვა უნივერსიტეტის მკვლევარებმა მოხსენებები წარმოადგინეს თანამედროვე ქართული პარლამენტარიზმის განვითარების ევოლუციაზე, მის პოლიტიკურ და სამართლებრივ საფუძვლებზე, რეგიონალური პარლამენტარიზმის ჩამოყალიბებასა და მისი ტრანსფორმაციის თავისებურებებზე.