ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებს კოორდინატორმა გიგლა მიქაუტაძემ პროექტი „რეფორმეტრის“ წარუდგინა. ღონისძიების ფარგლებში თსუ-ს ეკონომიკის საერთაშორისო სკოლისა (ISET) და ISET-ის კვლევითი ინსტიტუტის კომუნიკაციების მენეჯერმა გურანდა დარჩიძემ ახალგაზრდებს ასევე ISET-ისა და ISET-ის კვლევითი ინსტიტუტის საქმიანობა გააცნო. პროექტი „რეფორმეტრი“ USAID G4G-ის მხარდაჭერით ხორციელდება და ამჟამად აფასებს ხუთ რეფორმას, კერძოდ: სოფლის მეურნეობის განვითარების, პროფესიული განათლების, მცირე და საშუალო ბიზნესის განვითარების, კაპიტალის ბაზრის განვითარებისა და დაგროვებითი საპენსიო სქემის რეფორმას.

გამოიცა ბსუ-ს ეკონომიკისა და ბიზნესის ფაკულტეტის ასოცირებული პროფესორის ბესიკ ბოლქვაძის წიგნი „ფინანსური მენეჯმენტი: კონცეპტუალური საფუძვლები, ფუნქციონალური ქვესისტემები, ანალიტიკური ინსტრუმენტები“. სახელმძღვანელოში განხილულია ფინანსური მენეჯმენტის თეორიული საფუძვლები და პრაქტიკული მნიშვნელობის საკითხები. მასში დეტალურად და ლოგიკური თანმიმდევრობით არის გაანალიზებული ფინანსების მართვასთან დაკავშირებული ყველა საკვანძო ასპექტი. თეორიულ კონსტრუქციებთან ერთად, ნაშრომი გაჯერებულია ფინანსური გადაწყვეტილებების მიღებისათვის საჭირო ინსტრუმენტთა ნაკრებით. წიგნი განკუთვნილია ეკონომიკური პროფილის სტუდენტებისათვის.

18-22 თებერვალს ბათუმის შოთა რუსთაველის სახელმწიფო უნივერსიტეტს „ერაზმუს+“-ის აკადემიური/ადმინისტრაციული პერსონალის გაცვლითი პროგრამის ფარგლებში ვროცლავის უმაღლესი საბანკო სკოლის (პოლონეთი) დელეგაცია ეწვია. ხუთდღიანი ვიზიტის ფარგლებში პოლონელმა პროფესორებმა სამუშაო შეხვედრები გამართეს ეკონომიკისა და ბიზნესისა და ტურიზმის ფაკულტეტებზე. ეკონომიკისა და ბიზნესის ფაკულტეტის სტუდენტებმა და პროფესორ-მასწავლებლებმა პოლონელ კოლეგებთან ერთად საჯარო ლექციებზე სწავლის/სწავლების თანამედროვე მეთოდები და ევროკომისიის მიერ დაფინანსებული საგრანტო პროექტების წარდგენის პროცედურები განიხილეს.

26-28 იანვარს, ეკონომიკისა და ბიზნესის ფაკულტეტის ასოცირებულმა პროფესორმა, ეკონომიკის დეპარტამენტის ხელმძღვანელმა მურმან ცეცხლაძემ და ამავე ფაკულტეტის ეკონომიკის საბაკალავრო საგანმანათლებლო პროგრამის მე-4 სასწავლო წლის სტუდენტმა, შოთა რუსთაველის სახელობის სტიპენდიანტმა ხათუნა თურმანიძემ მონაწილეობა მიიღეს მინსკის სასულიერო აკადემიაში გამართულ მე-3 საერთაშორისო სამეცნიერო-პრაქტიკულ კონფერენციაში „სოციუმი და ქრისტიანობა“. კონფერენცია მინსკის სასულიერო აკადემიის, ბელორუსიის სახელმწიფო უნივერსიტეტის, ევროპული კვლევითი ასოციაციის ”Oikonomos”, საზოგადოებრივი საქველმოქმედო გააერთიანების „ოჯახური და სამშობიარო დახმარების ცენტრი Матуля“-სა და ბელორუსიის სახელმწიფო უნივერსიტეტის თეოლოგიის ინსტიტუტის ორგანიზებით ჩატარდა.

წარმატებით გაიარა პროგრამული აკრედიტაცია ბსუ-ს ბიზნესის ადმინისტრირების სადოქტორო საგანმანათლებლო პროგრამამ („ფინანსები, ფულის მიმოქცევა და კრედიტი“; „ბიზნესის ადმინისტრირება“). ვულოცავთ ფაკულტეტის სტუდენტებსა და პროფესორ-მასწავლებლებს ამ მნიშვნელოვან გამარჯვებას.