ზედიზედ მეორედ, ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის საბაკალავრო საგანმანათლებლო პროგრამის სტუდენტი დიეგო ჩხიკვაძე ევროპის ჩემპიონი გახდა. ქართველმა ფალავანმა ევროპის ბერძნულ-რომაული სტილით 23-წლამდელ მოჭიდავეთა ფინალში თურქი მუსტაფა ილდირიმი დაამარცხა. ბათუმის შოთა რუსთაველის სახელმწიფო უნივერსიტეტი ულოცავს დიეგო ჩხიკვაძეს დამსახურებულ გამარჯვებას და წარმატებებს უსურვებს!
„ჰორიზონტ ევროპის“ საინფორმაციო შეხვედრა გაიმართა ბათუმის შოთა რუსთაველის სახელმწიფო უნივერსიტეტში. პროფესორ-მასწავლებლებს, მკვლევრებს, დოქტორანტებსა და ადმინისტრაციის წარმომადგენლებს პროგრამის ეროვნულმა საკონტაქტო პირებმა (NCP) ისეთი მნიშვნელოვანი საკითხები გააცნეს, როგორებიცაა: მარია სკლადოვსკა კიურის აქციების ფარგლებში დაგეგმილი სამეცნიერო საგრანტო დაფინანსებების შესაძლებლობები, ჰორიზონტ ევროპის II სვეტის კლასტერები, კერძოდ, ჯანდაცვის, კულტურის, სამოქალაქო უსაფრთხოების, დიგიტალური ტექნოლოგიების, კლიმატის, სურსათის, სოფლის მეურნეობის და სხვა მიმართულებები.
ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა და „საქართველოს მწვანეთა მოძრაობა - დედამიწის მეგობრები - საქართველოს“ თავმჯდომარემ ნინო ჩხობაძემ თანამშრომლობის მემორანდუმს მოაწერეს ხელი. ხელშეკრულება მიზნად ისახავს ეკოლოგიური, გარემოსდაცვითი და მდგრადი განვითარების მიზნების მისაღწევად ერთობლივი საგანმანათლებლო-სამეცნიერო პროექტების განხორციელებას. დაიგეგმა ახალგაზრდული ფორუმის - მდგრადი განვითარებისა და ევროინტეგრაციისთვის - ღონისძიებებში მონაწილეობა და თანამშრომლობა. მემორანდუმი ასევე ითვალისწინებს ერთობლივი სამეცნიერო და საგანმანათლებლო გამოცემების მომზადებას, კონფერენციების ჩატრებას, გამოცდილების გაზიარებას და საერთაშორისო კონტაქტების განვითარებას ერთობლივი პროექტების განხორციელების მიზნით.
ბსუ ევროკომისიის მიერ 2022 წელს დაფინანსებული პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში“ (Responsible Conduct of Research – Research Integrity and Ethics in Georgian Universities - ETHICS) პარტნიორია. 1 მარტს ილიას სახელმწიფო უნივერსიტეტში გამართულ პროექტის პირველ ეროვნულ შეხვედრაში მონაწილეობა მიიღო ბსუ-დან პროექტში ჩართულმა პერსონალმა - ხარისხის უზრუნველყოფის სამსახურის ხელმძღვანელმა ვლადიმერ ღლონტმა, ჰუმანიტარულ მეცნიერებათა ფაკულტეტის ასოცირებულმა პროფესორმა მანუჩარ ლორიამ და ზუსტ მეცნიერებათა და განათლების ფაკულტეტის ასოცირებულმა პროფესორმა ნანა მაკარაძემ.
ბათუმის შოთა რუსთაველის სახელმწიფო უნივერსიტეტს საქართველოში თურქეთის რესპუბლიკის საელჩოს მრჩეველი განათლების საკითხებში, პროფესორი სუათ ქოლუქირიქი ეწვია. ბსუ-ს რექტორთან, პროფესორ მერაბ ხალვაშთან გამართულ შეხვედრაზე მხარებმა ერთობლივი საგანმანათლებლო და სამეცნიერო პროექტების განხორციელებასა და სამომავლო თანამშრომლობის გეგმებზე ისაუბრეს. შეხვედრას ესწრებოდნენ სტრატეგიული განვითარებისა და საგარეო ურთიერთობათა დეპარტამენტის უფროსი, პროფესორი მარინე გიორგაძე, აღმოსავლეთმცოდნეობის დეპარტამენტის ხელმძღვანელი, პროფესორი ემზარ მაკარაძე და ასოცირებული პროფესორი ლია ჭყონია.
