ახალი ამბები

ბათუმის შოთა რუსთაველის სახელმწიფო უნივერსიტეტში 9 აპრილისადმი მიძღვნილი დისკუსია გაიმართა თემაზე: „9 აპრილიდან 9 აპრილამდე“. სტუდენტებმა, პროფესორ-მასწავლებლებმა, ბათუმის ელიტური სკოლა „გორდას“, სკოლა „მონპარნასის“ პედაგოგებმა და მოსწავლეებმა 1989 წლის 9 აპრილს საქართველოს დამოუკიდებლობისათვის დაღუპული გმირები გაიხსენეს და 34 წლის წინ განვითარებულ მოვლენებზე იმსჯელეს. დისკუსიას მოდერატორობას უწევდნენ ბსუ-ს პროფესორები ჯემალ კარალიძე, ოთარ გოგოლიშვილი, ისტორიის დოქტორი ხათუნა დუმბაძე და ისტორიის საგანმანათლებლო პროგრამის მესამე კურსის სტუდენტი მარიამ ჭანკურიძე.

პოლ ვალერის უნივერსიტეტის მონპელიე III-ის მკვლევარმა ფაბიო შეტიმ „ერაზმუს+“-ის ფარგლებში, ბსუ-ში საჯარო ლექცია წაიკითხა თემაზე: „საფრთხეში მყოფი ენების ლექსიკოგრაფია და მიგრაციათა სოციოლინგვისტიკა“. მკვლევარმა წარმოადგინა ენათმეცნიერების კვლევების კრებული (უმცირესობისა და საფრთხის ქვეშ მყოფი ენების მოკლე ანალიზი), რომელიც დაიბეჭდა რომში ერთერთი სამეცნიერო პროექტის ფარგლებში. კრებულში შევიდა ბსუ-ს ასისტენტ-პროფესორების შოთა როდინაძის, ნათია აბაშიძის და დოქტორანტ ნინო თურმანიძის ნაშრომიც. ლექციის შემდეგ ფაბიო შეტიმ შეხვედრა გამართა აღნიშნული პრობლემით დაინტერესებულ ჯგუფებთან, სადაც ერთობლივად დაიგეგმა სამომავლო თანამშრომლობის პერსპექტივები.

ფრანკოფონიის დღეების ფარგლებში, ბათუმის შოთა რუსთაველის სახელმწიფო უნივერსიტეტში სტუდენტთა კონფერენცია „ფრანგული კულტურა და ცივილიზაცია“ გაიმართა. კონფერენციაზე უნივერსიტეტის ფრანკოფონმა სტუდენტებმა პრეზენტაციები წარმოადგინეს ფრანგული კულტურისა და ცივილიზაციის შესახებ. სესიაზე ბსუ-ს კურსდამთავრებულმა, მთარგმნელმა სოფიო ბარშოვამ ღონისძიების მონაწილეებს თავისი თარგმანები გააცნო და ისაუბრა თანამედროვე ფრანგული მხატვრული ნაწარმოებების თარგმანის შესახებ. კონფერენციას პროფესორ-მასწავლებლები, სტუდენტები და ქართულ-ამერიკული სკოლის მოსწავლეები ესწრებოდნენ.

ბათუმის შოთა რუსთაველის სახელმწიფო უნივერსიტეტში გაცვლითი პროგრამების წარდგენა გაიმართა. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსმა მარინე გიორგაძემ და დეპარტამენტის უფროსის მოადგილემ, „ერაზმუს+“-ის კოორდინატორმა ნანა ყურშუბაძემ სხვადასხვა ფაკულტეტის საბაკალავრო, სამაგისტრო და სადოქტორო პროგრამების სტუდენტებს 2023-2024 სასწავლო წლისთვის გამოცხადებული გაცვლითი პროგრამები გააცნეს. გაცვლითი პროგრამები ითვალისწინებს 1 სემესტრის (შემოდგომის/გაზაფხულის) განმავლობაში ევროპის უნივერსიტეტებში სწავლას. წარდგენის დასრულების შემდეგ, დეპარტამენტის წარმომადგენლებმა სტუდენტების შეკითხვებს უპასუხეს.

27-29 მარტს, „ერაზმუს+”-ის პროექტის - „საქართველოს უნივერსიტეტებში მესამე მისიის ხარისხის და რელევანტურობის გაძლიერება“ (SQUARE) ფარგლებში, ბსუ-ს რექტორის მოადგილე თამარ სირაძე და საზოგადოებასთან ურთიერთობის სამსახურის უფროსი ნინო დოლიძე სამუშაო ვიზიტით ქალაქ ბრიუსელში იმყოფებოდნენ. ვიზიტს მასპინძლობდა პროექტის პარტნიორი ორგანიზაცია EFMD – „მენეჯმენტის განვითარების ევროპული სააგენტო“. ვიზიტის მიზანი იყო მონაწილე მხარეს შექმნოდა მკაფიო წარმოდგენა ევროკავშირის პოლიტიკის შესახებ მესამე მისიის ფარგლებში და ფართო მასშტაბით გაეაზრებინა არსებული შესაძლებლობები. ასევე, საუკეთესო პრაქტიკის გაცვლა ევროპელ კოლეგებთან და პოტენციალის განხილვა შემდგომი თანამშრომლობისათვის.