ახალი ამბები

ბათუმის შოთა რუსთაველის სახელმწიფო უნივერსიტეტში სტუდენტური პროექტების კონკურსში გამარჯვებული პროექტის ფარგლებში, ღონისძიება „სტუდენტური ახალი წელი" გაიმართა. საახალწლო ღონისძიებაზე სხვადასხვა ნომინაციაში გამარჯვებული სტუდენტები დაჯილდოვნდნენ. საღამო მუსიკალურად გააფორმეს ბენდებმა: „Aura/აურა“, „Last Station/ბოლო გაჩერება“, Dj Cheeky, სტუდენტებმა დათუნა მჟავანაძემ და მარიამ მოსეშვილმა. პროექტის „სტუდენტური ახალი წელი (საახალწლო ღონისძიებები)” ავტორია ეკონომიკისა და ბიზნესის ფაკულტეტის ბიზნესის ადმინისტრირების საბაკალავრო საგანმანათლებლო პროგრამის სტუდენტი ანუკი ახვლედიანი და ხორციელდება სტუდენტურ კლუბ „რუსთაველის“ ორგანიზებით.

საქართველოს განათლებისა და მეცნიერების მინისტრის გიორგი ამილახვარის ხელმძღვანელობით, საქართველოს ტექნიკურ უნივერსიტეტში, რექტორთა კონფერენცია გაიმართა. კონფერენციაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა. მინისტრმა გიორგი ამილახვარმა შეხვედრისას უმაღლესი განათლების მიმართულებით არსებული გამოწვევები და სხვადასხვა აქტუალური საკითხი განიხილა. მათ შორის, საუბარი შეეხო ისეთ მნიშვნელოვან თემებს, როგორებიცაა: უმაღლესი განათლების მიმართულებით საკანონმდებლო ცვლილების პაკეტი, საქართველოში უცხოელი სტუდენტების მოზიდვა, სამწლიანი საბაკალავრო პროგრამების შემუშავება, სადოქტორო საგანმანათლებლო პროგრამებისა და სამეცნიერო-კვლევითი საქმიანობის ხარისხის უზრუნველყოფის მექანიზმები, უმაღლესი საგანმანათლებლო დაწესებულებების პრიორიტეტული მიმართულებების განსაზღვრა/დაგეგმვა და სხვა.

საქართველოს თავდაცვის ძალების გენერალური შტაბის სტრატეგიული დაგეგმვის დეპარტამენტის სამხედრო სტრატეგიის სამმართველოს უფროსმა პოლკოვნიკმა ლაშა დავითაძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ნდობაზე დაფუძნებული ლიდერობა”. მომხსენებელი ახალგაზრდებს ნდობისა და ლიდერობის აქტუალურ საკითხებზე ესაუბრა და საკუთარი გამოცდილება გაუზიარა. ლექციის დასრულების შემდეგ დისკუსია გაიმართა და პოლკოვნიკმა ლაშა დავითაძემ სტუდენტების აქტუალურ შეკითხვებს უპასუხა. ღონისძიება IEC ინოვაციური განათლების ცენტრის ორგანიზებით ჩატარდა.

ბსუ-ში კლიმატის ცვლილების კანონის „თეთრი წიგნის“ პრეზენტაცია და საჯარო განხილვა გაიმართა. ღონისძიება გახსნეს და მონაწილეებს სიტყვით მიმართეს საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ, გარემოს დაცვისა და სოფლის მეურნეობის მინისტრის პირველმა მოადგილემ ნინო თანდილაშვილმა, აჭარის ა.რ. სოფლის მეურნეობის მინისტრმა ზაზა შავაძემ, ბსუ-ს რექტორის მოადგილემ ანზორ ბერიძემ და ვესტმინსტერის დემოკრატიის ფონდის წარმომადგენლობის ხელმძღვანელმა ლაშა ნაკაშიძემ. შემაჯამებელ შეხვედრას ბსუ-ს სტუდენტები, დარგის მიმართულების პროფესორ-მასწავლებლები და საზოგადოების წარმომადგენლები ესწრებოდნენ.

აჭარის ხელოვნების მუზეუმში წარჩინებულ სტუდენტთა დაჯილდოება გაიმართა. შეხვედრაზე აჭარის ა.რ. განათლების, კულტურისა და სპორტის სამინისტროს „სტუდენტთა დახმარების“ პროგრამის მონაწილე ბათუმის შოთა რუსთაველის სახელმწიფო უნივერსიტეტის 24 წარჩინებული სტუდენტი დაჯილდოვდა. სტუდენტთა დახმარების პროგრამის ფარგლებში დაფინანსებას იღებენ სტუდენტები, რომლებიც სწავლობენ საქართველოს უმაღლეს საგანმანათლებლო დაწესებულებებში ბაკალავრიატის, მაგისტრატურის, მასწავლებლის მომზადების ინტეგრირებულ საბაკალავრო-სამაგისტრო, ვეტერინარიის სამაგისტრო, დიპლომირებული მედიკოსის/სტომატოლოგიის აკრედიტებულ საგანმანათლებლო პროგრამებზე და სასწავლო წლის სემესტრის განმავლობაში აქვთ 91 და მეტი ქულა.