ახალი ამბები

საქართველოში ნატო-ს სამეკავშირეო ოფისის ხელმძღვანელი ალექსანდრე ვინიკოვი ბათუმის შოთა რუსთაველის სახელმწიფო უნივერსიტეტის რექტორის მოადგილესთან, პროფესორ თამარ სირაძესთან ერთად, ბსუ-ს სტუდენტებს შეხვდა და საჯარო ლექცია წაიკითხა ჩრდილოატლანტიკური ალიანსის ფუნქციონირების, მიზნებისა და პრინციპების შესახებ. შეხვედრა მიზნად ისახავდა დასავლური ინტეგრაციის შესახებ ადგილობრივი ახალგაზრდების ინფორმირებულობის და ჩართულობის გაზრდის ხელშეწყობას, ნატო-საქართველოს თანამშრომლობის გაღრმავებასა და სამომავლო პერსპექტივების მიმოხილვას. საჯარო ლექციის დასრულების შემდეგ, საქართველოში ნატოს სამეკავშირეო ოფისის ხელმძღვანელმა ალექსანდრე ვინიკოვმა სტუდნეტების შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა აკადემიური საბჭოს წევრებს, ფაკულტეტის დეკანებსა და ადმინისტრაციის წარმომადგენლებს 2023 წელს გაწეული მუშაობის ანგარიში წარუდგინა. საანგარიშო პერიოდში საქმიანობა ძირითადად წარმართული იყო ბსუ-ს სტრატეგიული განვითარების და რექტორის სამოქმედო გეგმების შესაბამისად, შემდეგი მიმართულებებით: ხარისხის უზრუნველყოფა, აკადემიური მოსწრება, ელექტრონული პლატფორმის სრულყოფა, სამეცნიერო-კვლევითი მუშაობა, საერთაშორისო ურთიერთობები, სტუდენტთა მხარდაჭერა და სტუდენტური სერვისები, უნივერსიტეტის მატერიალურ-ტექნიკური ბაზის გაუმჯობესება, ბიუჯეტი და მესამე მისია - საზოგადოებასთან ურთიერთობის ხელშეწყობა.

ბსუ-ში საბუნებისმეტყველო მეცნიერებათა და ჯანდაცვის ფაკულტეტის დიპლომირებული მედიკოსის ერთსაფეხურიანი ინგლისურენოვანი პროგრამის კურსდამთავრებულთა საზეიმო გამოშვება გაიმართა. კურსდამთავრებულებს უნივერსიტეტის დასრულება მიულოცეს და კარიერული წინსვლა უსურვეს ბსუ-ს რექტორის მოადგილემ თამარ სირაძემ, საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა, დიპლომირებული მედიკოსის ერთსაფეხურიანი საგანმანათლებლო პროგრამის მართვის ცენტრის დირექტორმა მარინა ქორიძემ და პროფესორ-მასწავლებლებმა. თეთრ ხალათებში გამოწყობილმა კურსდამთავრებულებმა ტრადიციულად ექიმის ფიცი საზეიმო ვითარებაში დადეს. ბსუ-ს კურსდამთავრებულის სტატუსი 150 უცხოელ სტუდენტს მიენიჭა.

აბიტურიენტებისათვის ბათუმის შოთა რუსთაველის სახელმწიფო უნივერსიტეტმა ღია კარის დღეები დაიწყო. ბსუ-ს პროფესორ-მასწავლებლებმა და სტუდენტებმა ბათუმისა და ქობულეთის 30-მდე საჯარო და კერძო სკოლაში გამართულ საინფორმაციო შეხვედრებზე მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები, გაცვლითი პროგრამები, სიახლეები და ინფრასტრუქტურა გააცნეს. საინფორმციო შეხვედრის დასარულების შემდეგ, აბიტურიენტებს ბსუ-ს სამახსოვრო საჩუქრები გადაეცათ. 2024-2025 სასწავლო წელს, ბათუმის შოთა რუსთაველის სახელმწიფო უნივერსიტეტში 36 საბაკალავრო საგანმანათლებლო პროგრამაზე 1 590 პირველკურსელი ჩაირიცხება.

აჭარის ტურიზმისა და კურორტების დეპარტამენტის ორგანიზებით გიდების პირველი საერთაშორისო კონფერენცია გაიმართა. მეორე პანელური სესიის „ტურიზმი და მუზეუმები - მუზეუმი როგორც კულტურული მემკვიდრეობისა და ისტორიის საცავი“ მუშაობაში მონაწილეობა მიიღო ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა. რექტორმა ისაუბრა აჭარის რეგიონში ტურიზმის განვითარებაში ბათუმის შოთა რუსთველის სახელმწიფო უნივერსიტეტის შეტანილ წვლილზე, ტურიზმის ფაკულტეტის როლზე, რომელიც ტურისტული მომსახურების საერთაშორისო სტანდარტების დამკვიდრებას უწყობს ხელს და უცხოელ პარტნიორებთან ერთად ამზადებს ტურიზმისა და მასპინძლობის დარგისათვის მაღალკვალიფიციურ სპეციალისტებს. ასევე ხაზი გაუსვა ბსუ-ს მკვლევრების მონაწილეობით განხორციელებულ სამეცნიერო პროექტებს.