ახალი ამბები

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის ორგანიზებით, სკოლისა და უნივერსიტეტის თანამშრომლობის კლუბის „სკოლა-უნივერსიტეტი“ ფარგლებში, მეათე სამეცნიერო კონფერენცია გაიმართა თემაზე: „სასკოლო განათლება - თანამედროვე გამოწვევები და პერსპექტივები“. კონფერენციაში უნივერსიტეტებისა და ზოგადა საგანმანათლებლო დაწესებულებების 300-ზე მეტი სტუდენტი და მოსწავლე მონაწილეობდა. სესია გახსნეს, მონაწილეებს მიესალმნენ ბსუ-ს რექტორი მერაბ ხალვაში, ზუსტ მეცნიერებათა და განათლების ფაკულტეტის დეკანი ლელა თურმანიძე, აჭარის ა.რ. განათლების, კულტურისა და სპორტის სამინისტროს განათლების დეპარატამენტის უფროსი ნაზიბროლა ბერიძე-გაბაიძე და პროფესორ-მასწავლებლები.

ბათუმის შოთა რუსთაველის სახელმწიფო უნივერსიტეტში სტუდენტებისა და პროფესორ-მასწავლებლებისათვის აშშ-ის საელჩოს საგანმანათლებლო პროგრამების პრეზენტაცია გაიმართა. საქართველოში აშშ-ის საელჩოს გაცვლითი პროგრამების კოორდინატორმა თეა კუჭუხიძემ და სახალხო დიპლომატიის გრანტების მენეჯერმა ანა ხარიბეგაშვილმა დაინტერესებულ პირებს გააცნეს საელჩოს საგანმანათლებლო და კულტურის საგრანტო პროგრამები და კონსულტაცია გაუწიეს გრანტების პროგრამულ და ტექნიკურ საკითხებზე.

5-11 ნოემბერს ბსუ-ს სტუდენტთა კარიერული განვითარების, კულტურისა და სპორტის დეპარტამენტის უფროსი ლევან ტარიელაძე და წამყვანი სპეციალისტი სალომე ჯინჭარაძე „ერაზმუს+“-ის საგრანტო პროექტის „პროფესიული განათლებისა და სტუდენტების ჩართულობის ხელშეწყობა მენტორინგისა და ტუტორინგის სისტემით უმაღლეს საგანმანათლებლო დაწესებულებებში" (PROMENT) ფარგლებში, სასწავლო ვიზიტით იმყოფებოდნენ პოლონეთში, სილეზიის ტექნოლოგიურ უნივერსიტეტში.

ბათუმის შოთა რუსთველის სახელმწიფო უნივერსიტეტში ევროკავშირის ახალგაზრდული ფორუმი ჩატარდა. საქართველოს უმაღლესი საგანმანათლებლო დაწესებულებების სტუდენტებმა ერთობლივად იმუშავეს ევროკავშირის ფორმატში, დელეგატებმა სხვადასხვა ქვეყნის სახელით დებატები გამართეს, ფორმალური და არაფორმალური მოლაპარაკებები ჩაატარეს, კოალიციები შექმნეს და შემუშავებული რეზოლუციები კენჭისყრის საფუძველზე მიიღეს. ევროკავშირის ახალგაზრდული ფორუმი ითვალისწინებდა ევროკავშირის მოდელირებასა და იმ პროცესების განხორციელებას, რომელსაც ევროკავშირი ბრიუსელში, 15 დეკემბერს, კანდიდატის სტატუსის მინიჭებასთან დაკავშირებით ჩაატარებს. ღონისძიების დასასრულს, ბსუ-ს რექტორმა მერაბ ხალვაშმა, ტურიზმის ფაკულტეტის დეკანმა ირაკლი კორძაიამ, იურიდიული და სოციალურ მეცნიერებათა ფაკულტეტის დეკანის მოადგილემ სალომე კარალიძემ ფორუმის მონაწილე სტუდენტებს სერტიფიკატები გადასცეს და მადლობა გადაუხადეს პროექტში წარმატებული მონაწილეობისათვის.

ბათუმის შოთა რუთაველის სახელმწიფო უნივერსიტეტში ადამიანის უფლებების სამართლის საუნივერსიტეტო კვირეული დასრულდა. ღონისძიების ფარგლებში, საქართველოს საკონსტიტუციო სასამართლოს მოსამართლეებმა საჯარო ლექცია წაიკითხეს და სტუდენტების მონაწილეობით საჯარო დისკუსია გაიმართა თემაზე: „გამოხატვის თავისუფლება ევროკავშირის წევრ სახელმწიფოებში“. დისკუსიაზე მოხსენება წარადგინეს იურიდიული და სოციალურ მეცნიერებათა ფაკულტეტის სამართალმცოდნეობის საბაკალავრო პროგრამის სტუდენტებმა: სანდრო კიკნაძემ, ნიკა ფარტენაძემ, ლუკა ტაკიძემ, ანა ხვედელიძემ, ნინო ლორთქიფანიძემ, დავით კახიძემ და მეგი პაქსაძე. ასევე მოეწყო საჯარო დებატები - „ამ პალატას სჯერა ევროკავშირის კანდიდატის სტატუსის“. კვირეული მიზნად ისახავდა სტუდენტებსა და ახალგაზრდებში ადამიანის უფლებების პრობლემური საკითხების შესახებ ცოდნის გავრცელებას და უნივერსიტეტების თანამშრომლობის გზით ადამიანის უფლებების სამართლის შესახებ იდეათა და მოსაზრებათა აქტიური ურთიერთგაცვლას.