ჰუმანიტარულ მეცნიერებათა ფაკულტეტთან არსებულ ლიტერატურულ კლუბში გაიმართა ფილოსოფიის დოქტორის, პროფესორ გია ბარამიძის საჯარო ორდღიანი ლექცია თემაზე „ლიტერატურა და კინემატოგრაფი“. ლექცია მიზნად ისახავდა სიტყვას/ხმასა და გამოსახულებას შორის არსებული კავშირის ნათელყოფას, მხატვრული სახეებისა და კინემატოგრაფიული გამოსახულებების, ლიტერატურული ენისა და კინოენის თავისებურებათა გაანალიზებას. მომხსენებელმა ისაუბრა კინოს, როგორც უნივერსალური ენის, აბსტრაქციისა და უნივერსალიზაციის, გამოსახულებებისა და ნიშნების კომპოზიციის გაგებაზე; ლექცია ასევე ითვალისწინებდა იმის ახსნას, თუ რა მიმართებაშია ერთმანეთთან მხატვრული წარმოსახვა და კინემატოგრაფიული ფანტაზია; განსაკუთრებული ყურადღება დაეთმო სიუჟეტური დროისა და კინემატოგრაფიული დროის პრობლემას.

ბათუმის შოთა რუსთაველის სახელმწიფო უნივერსიტეტის 80 წლის იუბილისადმი მიძღვნილი XXXV რესპუბლიკური დიალექტოლოგიური სამეცნიერო კონფერენცია გაიხსნა შოთა რუსთაველის დარბაზში. სამეცნიერო სესია მიზნად ისახავს საქართველოში მიმდინარე საველე-შემკრებლობითი და კვლევითი საქმიანობის შედეგების შეჯამებას. ქვეყნის სხვადასხვა უმაღლესი საგანმანათლებლო დაწესებულების პროფესორ-მასწავლებლები, სამეცნიერო ინსტიტუტების მეცნიერ-თანამშრომლები და ახალგაზრდა მკვლევრები ორ სექციაში მოხსენებს წარმოადგენენ დიალექტოლოგიის აქტუალურ საკითხებზე.

სლავისტიკის დეპარტამენტის წევრები, ასოცირებული პროფესორმა ნანა ქაჯაიამ, ასისტენტ პროფესორმა დალი დობორჯგინიძემ, დოქტორანტმა მაია ბოლქვაძემ, ქართული ფილოლოგიის დეპარტამენტის წევრებმა: ასოცირებულმა პროფესორმა ინგა შამილიშვილმა და მაია კიკვაძემ მონაწილეობა მიიღეს რუსული ენისა და ლიტერატურის მასწავლებელთა საერთაშორისო ასოციაციის XIII კონგრესში „რუსული ენა და ლიტერატურა მსოფლიო კულტურის სივრცეში“. ერთკვირიანი კონფერენცია (ესპანეთი) გაიმართა, რომლის მუშაობაში მსოფლიოს 60-ზე მეტი ქვეყნის მეცნიერები იყვნენ ჩართულნი. კონგრესის მონაწილეებმა ბოლო პერიოდში განხორციელებული კვლევის შედეგები წარმოადგინეს და აქტუალურ საკითხებზე იმსჯელეს.

ბათუმის შოთა რუსთაველის სახელმწიფო უნივერსიტეტის სლავისტიკის დეპაარტამენტის ასოცირებული პროფესორი ქეთევან სვანიძე 2014-2015 სასწავლო წელს ერასმუს მუნდუსის გაცვლითი პროგრამის ფარგლებში იმყოფებოდა ვენეციის კაფოსკარის უნივერსიტეტში (Ca’Foscari University of Venice). მკვლევარმა პროფესორ პაოლო ბალბონის ხელმძღვანელობით ჩაატარა სამეცნიერო კვლევა თემაზე: “ინტერკულტურული კომუნიკაციის არავერბალური ასპექტები და კომუნიკაციის არავერბალური ნაწილის როლი ენების სწავლების პროცესში“ („Non-verbal aspects of intercultural communication and the place and role of non-verbal part of communication in the process of teaching languages“), რომლის პრეზენტაცია შედგა უნივერსიტეტის ჰუმანიტარულ მეცნიერებათა ფაკულტეტის ლინგვისტიკისა და შეპირისპირებითი კულტურული კვლევების დეპარტამენტის სხდომაზე. ასოცირებულმა პროფესორმა ქეთევან სვანიძემ ერთი სასწავლო წლის განმავლობაში კაფოსკარის უნივერსიტეტში ჩაატარა ლექციები (120 აკად. საათი) რუსულში, როგორც უცხო ენაში უნივერსიტეტის პირველი და მეორე კურსის სტუდენტებთან და მონაწილეობა მიიღო ენების საზაფხულო სკოლის მუშაობაში.

ბათუმის სახელმწიფო უნივერსიტეტი IV საერთაშორისო საზაფხულო სკოლას „დიგიტალური ჰუმანიტარია - ენისა და კულტურის ელექტრონული დოკუმენტირება“ მასპინძლობს. ათდღიანი საერთაშორისო საზაფხულო სკოლა ბათუმის შოთა რუსთაველის სახელმწიფო უნივერსიტეტისა და ფრანკფურტის გოეთეს უნივერსიტეტის ორგანიზებით მეოთხედ ტარდება და მასში საქართველოს უმაღლესი საგანმანათლებლო დაწესებულებებიდან 25 სტუდენტი მონაწილეობს. ლექციებს ბათუმის შოთა რუსთაველის სახელმწიფო უნივერსიტეტის პროფესორებთან ერთად, ივანე ჯავახიშვილის სახელობის თბილისის სახელმწიფო უნივერსიტეტის, თავისუფალი უნივერსიტეტის, ფრანკფურტის გოეთეს უნივერსიტეტისა და ჰოლანდიის ნეიმეხენის უნივერსიტეტის პროფესორები წაიკითხავენ.