„წითელი ჯვრის“ ბათუმის ფილიალის მოხალისეებმა და ტრენერებმა ბათუმის შოთა რუსთაველის სახელმწიფო უნივერსიტეტის სტუდენტებს ტრენინგი ჩაუტარეს პირველადი სამედიცინო დახმარების თემაზე. სწავლება მიზნად ისახავდა პირველადი დახმარებისათვის აუცილებელი უნარ-ჩვევების ჩამოყალიბებასა და გადაუდებელი სიტუაციების შემთხვევაში პირველადი სამედიცინო დახმარების გაწევისათვის საჭირო ცოდნის მიღებას. პროექტის ფარგლებში ბათუმის შოთა რუსთაველის სახელმწიფო უნივერსიტეტის იურიდიულ და სოციალურ მეცნიერებათა ფაკულტეტის ბაკალავრიატის პირველი საფეხურის სტუდენტთა ინიციატივით, უნივერსიტეტის ყველა კორპუსსა და სართულზე თებერვალში მოეწყობა პირველადი სამედიცინო დახმარების კუთხეები.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის IV კურსის სტუდენტი გიორგი მახარაძე საქართველოს პარლამენტის იურიდიულ საკითხთა კომიტეტის მიერ გამოცხადებული კონკურსის გამარჯვებულია. გიორგი მახარაძემ შეიმუშავა კანონპროეტი „საქართველოს კანონი კომუნალური მიწისზედა ტრანსპორტით (ავტობუსი, ტროლეიბუსი, ტრამვაი, სამარშრუტო სატრანსპორტო საშუალება) მოსარგებლე მგზავრთა მომსახურების შესახებ“, რომლის მიზანია სამგზავრო სტანდარტების დამკვიდრება. კანონპროექტი ხელს შეუწყობს, ხარისხიან, უსაფრთხო, კომფორტულ მომსახურებას და მგზავრის, გადამზიდავის უფლებების დაცვას.

ბათუმის შოთა რუსთაველის სახელმწიფო უნივერსიტეტში გაეროს ბავშვთა ფონდის კონსულტანტი მაგული შაღაშვილმა საჯარო ლექცია წაიკითხა თემაზე: „სოციალური მუშაობის როლი პირველად ჯანდაცვაში“. ღონისძიება პროექტის „თანამშრომლობა შეზღუდული შესაძლებლობების მქონე პირთა ჩართულობის მხარდამჭერი ეფექტიანი პოლიტიკის ფორმირებისათვის აჭარაში“ ფარგლებში გაიმართა. პროექტის მიზანია, შეზღუდული შესაძლებლობების მქონე პირთა სამედიცინო და სოციალური საჭიროებების მხარდამჭერი გარემოს შექმნის ხელშეწყობა. პროგრამას „საქართველოს სოციალურ მუშაკთა ასოციაცია“ „საერთაშორისო განათლების ცენტრთან’’ ერთად, „ფონდ ღია საზოგადოების‘’ მხარდაჭერით ახორციელებს.

უნივერსიტეტში საქართველოს ახალგაზრდა იურისტთა ასოციაციის ანგარიშის - „სისხლის სამართლის საქმეთა სასამართლო მონიტორინგის ანგარიში №12“ წარდგენა გაიმართა. ასოციაციის წარმომდგენლებმა იურიდიული და სოციალურ მეცნიერებათა ფაკულტეტის სტუდენტებს სისხლის სამართლის სასამართლო პროცესების მონიტორინგის შედეგები გააცნეს. ანგარიშში გაანალიზებულია სასამართლოსა და პროკურატურის მიდგომები აღკვეთის ღონისძიების შერჩევასთან, საქმის სასამართლოში განხილვის სხვა ეტაპებთან და ოჯახურ, ნარკოტიკულ დანაშაულებთან დაკავშირებით. შეხვედრაზე მომავალი სამართალდამცავები ასევე გაეცნენ იმ სასამართლო პროცესების ანალიზს, სადაც იკვეთება სასამართლო კონტროლის პრაქტიკაში არსებული პრობლემები და საკანონმდებლო ხარვეზები.

საქართველოს იურიდიული ფირმების ასოციაციის პროექტის „იურიდიული კლინიკების გაძლიერება უმაღლეს განათლებაში“ ფარგლებში ბათუმის შოთა რუსთაველის სახელმწიფო უნივერსიტეტში შეხვედრა გაიმართა. ასოციაციის აღმასრულებელმა დირექტორმა თინათინ შუღაროვამ და პროექტის ექსპერტმა, პროფესორმა ნინო ბოგვერაძემ იურიდიული და სოციალურ მეცნიერებათა ფაკულტეტის იურიდიული კლინიკის სტუდენტებს საქართველოში არსებული იურიდიული კლინიკების კვლევის შედეგებთან ერთად სწავლების მეთოდოლოგია გააცნო და საერთაშორისო პრაქტიკა გაუზიარა. შეხვედრის ფარგლებში პროფესორმა ნინო ბოგვერაძემ მომავალ სამართალდამცავებს ხელშეკრულების შედგენის მეთოდიკის მოკლე კურსი ჩაუტარა.