ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სოციალური დეპარტამენტის პროფესორმა ეთერ ვარშანიძემ და ფსიქოლოგიის პროგრამის სტუდენტებმა ბავშვთა დაცვის დღესთან დაკავშირებით, 1-4 ივნისს, ბათუმის რესპუბლიკურ კლინიკურ საავადმყოფოში ბავშვებსა და მშობლებს უფასო კონსულტაცია გაუწიეს. კონსულტაცია ითვალისწინებდა ისეთი აქტუალური საკითხების გაცნობას, როგორიცაა: ბავშვების აღზრდა პოზიტიურად, მშობელსა და შვილს შორის არსებული კონფლიქტის მოგვარების გზები.

ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის I კურსის სტუდენტების პროექტი „ფერადი უსაფრთხოება" სტუდენტთა სამოქალაქო ჩართულობის პროექტების კონკურსის გამარჯვებულია. მომავალმა სამართალდამცავებმა წარმატებას USAID-ისა და IFES-ის მიერ მხარდაჭერილი „დემოკრატია და მოქალაქეობის’’ საუნივერსიტეტო კურსის ფარგლებში განხორციელებულ სტუდენტთა სამოქალაქო ჩართულობის პროექტების კონკურსში მოიპოვეს. მასში ქვეყნის 30-მდე უმაღლესი საგანმანათლებლო დაწესებულება მონაწილეობდა. საქართველოში საუკეთესო საზოგადოებრივი ჩართულობის პროექტი პირველკურსელმა სტუდენტებმა: ნიკა ინაიშვილმა, ცოტნე ქართველიშვილმა, ნონა კოჩალიძემ, ნიკა მამულაძემ და ხატია ლეონიძემ კარანტინის პერიოდში ბსუ-ს ლექტორის ზურა კვირკვაიას ხელმძღვანელობით განახორციელეს. „ფერადი უსაფრთხოება" მიზნად ისახავდა საგზაო უსაფრთხოების წესების დაცვის ხელშეწყობას, ცნობიერებისა და საზოგადოებრივი პასუხისმგებლობის ამაღლებას.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის დეკანმა, ასოცირებულმა პროფესორმა ლევან ჯაყელმა და სულხან-საბა ორბელიანის უნივერსიტეტის სამართლის ფაკულტეტის დეკანმა, პროფესორმა გიორგი გორაძემ თანამშრომლობის მემორანდუმს მოაწერეს ხელი.
მხარეთა შეთანხმებით, დაიგეგმა ყოველწლიური სამეცნიერო კონფერენციის ჩატარება როგორც სტუდენტებისათვის, ასევე აკადემიური პერსონალისათვის. მემორანდუმის ფარგლებში უნივერსიტეტები ითანამშრომლებენ როგორც საგანმანათლებლო ასევე კვლევითი მიმართულებით, განხორციელდება ერთობლივი სასწავლო და სამეცნიერო პროექტები.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სამართლისა და საჯარო მმართველობის დეპარტამენტის ასოცირებული პროფესორი ლევან ჯაყელი, ასოცირებული პროფესორი მალხაზ ნაკაშიძე და მოწვეული სპეციალისტი ნიკოლოზ მეგრელიშვილი ესწრებოდნენ სულხან-საბა ორბელიანის უნივერსიტეტში გამართულ ტრენინგთა ციკლს. სასწავლო კურსი მოიცავდა ანტიდისკრიმინაციული სამართალის, თანასწორობის უფლების დაცვის სამართლებრივი მექანიზმებისა და შშმ პირთა უფლებების სამართლის აქტუალურ საკითხებს. ტრენინგები ჩატარდა USAID/PROLoG-ის მიერ დაფინანსებული პროექტის ფარგლებში.

ბათუმის შოთა რუსთაველის სახელმწიფო უნივერსიტეტში „ერასმუს+“-ის ინსტიტუციური განვითარების პროექტი „ფსიქოლოგიური კონსულტაციის ცენტრების შექმნა სტუდენტებისთვის საქართველოს უმაღლეს საგანმანათლებლო დაწესებულებებში“ / E-PSY (Establishment of Psychological Counseling Centers at Georgian HEIs for Students (E-PSY) - 617980-EPP-1-GE-EPPKA2-CBHE-SP) ხორციელდება.