ბსუ-ს ზუსტ მეცნიერებათა და განათლების ფაკულტეტთან არსებული ბავშვთა უფლებების ცოდნის ცენტრის ორგანიზებით, ფოტო-ნახატების გამოფენა „ბავშვები იცავენ თავიანთ უფლებებს“ გაიმართა. ბავშვის უფლებათა ცოდნის ცენტრის მიზანია, ხელი შეუწყოს შესაძლებლობების განვითარებასა და ინოვაციური მიდგომების დანერგვას ინკლუზიური და ბავშვთა უფლებების დაცვის პრინციპებზე დაფუძნებულ განათლებას. ღონისძიებაზე აჭარის, თბილისის, გურიის საჯარო, კერძო და ინკლუზიური სკოლების მოსწავლეებმა ნამუშევრები წარმოადგინეს თანასწორობაზე, მეგობრობაზე, ერთიანობასა და მრავალფეროვნებაზე. გამოფენაში ასევე ჩაერთნენ სპეციალური საგანმანათლებლო საჭიროების მქონე მოსწავლეები კერამიკის საამქროდან, რომლებმაც ღონისძიების მონაწილეებს გააცნეს, თუ როგორ ქმნიან ნაკეთობებს, როგორ ხატავენ და როგორ ნათელ ფერებში ხედავენ სამყაროს.

პლაგიატის პრევენციის საერთაშორისო დღე აღინიშნა ბათუმის შოთა რუსთაველის სახელმწიფო უნივერსიტეტში. ზოგადსაგანმანათლებლო სკოლების მოსწავლეებისთვის ჩატარდა ვებინარი თემაზე: „ერთად ვებრძოლოთ პლაგიატს“. ღონისძიების ფარგლებში წარმოდგენილი იყო აკადემიური კეთილსინდისიერების დაცვის ძირითადი სტრატეგიები, ტექსტის შექმნის პრინციპები და პლაგიატის წინააღმდეგ ბრძოლის მექანიზმები. მოსწავლეებმა მონაწილეობა მიიღეს ვიქტორინაში და ნახეს პლაგიატის პრევენციის შესახებ „Erasmus+“-ის პროექტის ფარგლებში „აკადემიური კეთილსინდისიერება ხარისხიანი სწავლისა და სწავლებისათვის ქართულ უმაღლეს საგანმანათლებლო დაწესებულებებში (INTEGRITY)“ მომზადებულ ვიდეორგოლები.

„ჰორიზონტი 2020“ ფარგლებში დაფინანსებული პროექტის „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით“ პერსონალმა ონლაინ სამუშაო შეხვედრა გამართა აჭარის რეგიონის 5 ზოგადსაგანმანათლებლო საჯარო სკოლის დირექტორებთან. შეხვედრის მონაწილეებმა შეაჯამეს პროექტის ფარგლებში 2021 წელს განხორციელებული აქტივობების შედეგები, განიხილეს ციფრული ინოვაციების მიმართულებით სკოლებში არსებული მდგომარეობა და სკოლებთან თანამშრომლობის ფარგლებში დაგეგმილი სამომავლო ღონისძიებები - სკოლების საჭიროებების იდენტიფიცირება და პედაგოგთა კომპეტენციები ციფრული ინოვაცოების გამოყენების კუთხით, სკოლებში მენტორინგის მოდელის პილოტირების პროცესი.

ბსუ-ს ზუსტ მეცნიერებათა და განათლების ფაკულტეტის ენებისა და საინფორმაციო ტექნოლოგიების ცენტრის ასოცირებულმა პროფესორმა ნელი ახვლედიანმა მიუნსტერის გერმანისტიკის ინსტიტუტში ლექციების კურსი წაიკითხა გერმანულის, როგორც უცხო ენის, მეთოდიკა-დიდაქტიკის მიმართულებით. ნელი ახვლედიანი მიუნსტერში მიწვეული იყო 2021 წლის 29 ნოემბრიდან 21 დეკემბრამდე მიუნსტერისა და ბათუმის შოთა რუსთაველის სახელმწიფო უნივერსიტეტებს შორის არსებული თანამშრომლობის მემორანდუმის საფუძველზე, „ერაზმუს+“-ის გაცვლითი პროექტის ფარგლებში.

საქართველოში გაეროს ბავშვთა ფონდის წარმომადგენელი ღასან ხალილი ბათუმის შოთა რუსთაველის სახელმწიფო უნივერსიტეტის რექტორს, პროფესორ მერაბ ხალვაშს და ზუსტ მეცნიერებათა და განათლების ფაკულტეტის დეკანს ლელა თურმანიძეს შეხვდა. შეხვედრაზე მხარეებმა საერთაშორისო კონფერენციის „ადრეული განათლება და ზრუნვა“ საორგანიზაციო საკითხები განიხილეს.