საერთაშორისო არასამთავრობო ორგანიზაციის „ქართველ სტუდენტთა მსოფლიო გაერთიანების“ თავმჯდომარე ნინო შარაშიძე ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებს შეხვდა და პროექტები წარუდგინა. ახალგარზდები ეკონომიკური ფორუმით დაინტერესდნენ, რომელიც 5-12 ივლისს ბრიუსელში, ლუქსემბურგსა და პარიზში გაიმართება. ფორუმში მონაწილეობა ითვალისწინებს ინტენსიურ სასწავლო-სამეცნიერო ტურს ევროინსტიტუტებში, საერთაშორისო ორგანიზაციებსა და კომპანიებში.

ეკონომიკისა და ბიზნესის ფაკულტეტის ,,მენეჯმენტის“ სპეციალობის II კურსის სტუდენტებმა სასწავლო კურსის ,,პროექტების მართვა“ ფარგლებში პროექტების წარდგინება გაიმართა. სტუდენტების მიერ სოციალური სფეროებში განხორციელებული პროექტები მიზნად ისახავდა ჯგუფური მუშაობის პრაქტიკული პრინციპებით განხორციელებას, მენეჯერული უნარ-ჩვევების გამოვლენასა და ჩამოყალიბებას. სასწავლო კურსებს ასოცირებული პროფესორი ირმა ჩხაიძე ხელმძღვანელობდა.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის პროფესორ-მასწავლებლებისა და დამსაქმებლების მორიგი შეხვედრა გაიმართა. უმაღლესი საგანმანათლებლო დაწესებულების აკადემიურმა პერსონალმა ღონისძიებაზე ბაკალავრიატის საგანმანათლებლო პროგრამების (ეკონომიკა, მარკეტინგი, მენეჯმენტი, საბუღალტრო და საგადასახადო საქმე, ფინანსები) მიზანი, ამოცანები და სწავლის შედეგები განიხილა. სხვადასხვა კომპანიისა და ორგანიზაციის წარმომადგენლებმა მოსაზრებები წარმოადგინეს სწავლის შედეგების პრაქტიკასთან კიდევ უფრო დაახლოების თვალსაზრისით და დაიგეგმა შემდგომი თანამშრომლობის მიმართულებები.

ეკონომიკისა და ბიზნესის ფაკულტეტის სტუდენტთა სამეცნიერო კონფერენცია გაიმართა. საკონკურსო ჟიურიმ (ასოცირებული პროფესორი ლელა ონიანი, ასოცირებული პროფესორი ბადრი გეჩბაია, მოწვეული მასწავლებელი, დოქტორანტი ჯემალ ანანიძე, ასისტენტ პროფესორი ნანული მახარაძე და სტუდენტი გიორგი ბაგრატიონი) შვიდ ნაშრომს შორის საუკეთესო მოხსენებები გამოავლინა. პირველი ადგილი საუკეთესო ნაშრომის ავტორმა, მენეჯმენტის III კურსის სტუდენტმა სოფო კეკელიძემ დაიკავა თემით: „დროის განაწილება სტუდენტებში“, ხელმძღვანელი პროფესორი ასიე ცინცაძე. მეორე ადგილი მოიპოვა მარკეტინგის III კურსის სტუდენტმა დავით ფარტენაძემ ნაშრომით: „მარკეტინგი 21-ე საუკუნის საქართველოში“, ხელმძღვანელი ასისტენტ პროფესორი ნანული მახარაძე და მესამე ადგილი მენეჯმენტის II კურსის სტუდენტმა ნათია კონცელიძემ ნაშრომით: „ადგილობრივი თვითმართველობის გარანტიებისა და მოსახლეობის რეალურ საჭიროებებს შორის შესაბამისობის პრობლემა“, ხელმძვანეკლი პროფესორი გელა მამულაძე.

უკრაინის ქალაქ პოლტავაში ვაჭრობისა და ეკონომიკის უნივერსიტეტეტში გაიმართა მენეჯმენტის კათედრის 20 წლის იუბილესადმი მიძღვნილი საერთაშორისო-სამეცნიერო პრაქტიკული კონფერენცია თემაზე: „სოციალურ-ეკონომიკური განვითარების სისტემების მენეჯმენტი ახალ ეკონომიკაში“. კონფერენციაზე ეკონომიკისა და ბიზნესის ფაკულტეტის ბიზნესის ადმინისტრირების დეპარტამენტის ხელმძღვანელმა, ასოცირებულმა პროფესორმა ბადრი გეჩბაიამ პლენარულ სხდომაზე მოხსენება წარადგინა თემაზე: „გადაწყვეტილებების მიღების პროცესები თანამედროვე მენეჯმენტში“. სამეცნიერო სესიის ფარგლებში ასოცირებულმა პროფესორმა ბადრი გეჩბაიამ მენეჯმენტის სპეციალობის სტუდენტებისათვის საჯარო ლექცია წაიკითხა თემაზე: „ბიზნესის ქსელური ორგანიზაცია: კლასტერული მენეჯმენტი და მათი ინტეგრაციული პროცესები“.