ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის სატყეო საქმის სპეციალობის სტუდენტებმა ტყის საერთაშორისო დღისადმი მიძღვნილ ღონისძიებებში მიიღეს მონაწილეობა. ახალგაზრდებისათვის ადგილობრივი ფლორისა და სელექციის განყოფილების მთავარმა სპეციალისტმა, ბიოლოგიის აკადემიურმა დოქტორმა დავით ხარაზიშვილმა სემინარი გამართა თემაზე: ,,აჭარის ტყის ეკოსისტემების მრავალფეროვნება’’. სტუდენტებს ტყის მნიშვნელობასა და ბაღის ფლორისტულ სიმდიდრეზე, ბოტანიკური ბაღის დირექტორი თამაზ დარჩიძე და მეთესლეობის სექტორის ხელმძღვანელი ჯულიეტა ჯაყელი ესაუბრა. შეხვედრის დასასრულს სტუდენტებმა ბოტანიკური ბაღის წარმომადგენლებთან ერთად ბაღის ტერიტორიაზე ხეები დარგეს.

2-8 მარტს, ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის დეკანი, პროფესორი გიზო ფარცხალაძე შვედეთის დედაქალაქ სტოკჰოლმში - სამეფო ტექნოლოგიურ უნივერსიტეტში-KTH იმყოფებოდა. ვიზიტი 530244-TEMPUS-ის პროექტ-ENGITEC - ის ფარგლებში შედგა, რომლის მიზანია უმაღლესი საინჟინრო განათლების მოდერნიზაცია საქართველოში ტექნოლოგიური გამოწვევების საპასუხოდ. პროექტის სამუშაო გეგმის შესაბამისად, სწავლების თანამედროვე მეთოდების განვითარების, კომპანიებთან თანამშრომლობის ახალი მიდგომებისა და ევროპელი პარტნიორების მიერ გამოცდილების გაზიარების გათვალისწინებით, საქართველოში უმაღლესი საინჟინრო განათლების მოდერნიზაცისათვის ტექნოლოგიური გამოწვევების საკითხები განიხილეს. ENGITEC - ის პროექტი დაფინანსებულია ევროკომისიის მიერ TEMPUS-ის პროგრამის ფარგლებში, რომლის კოორდინატორია „სამეფო ტექნოლოგიური უნივერსიტეტი-KTH“.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის დეკანი გიზო ფარცხალაძე, ,,ტელეკომუნიკაციის’’ პროგრამის მიმართულების ასისტ. პროფესორი მარინა ჩხარტიშვილი და ,,ტელეკომუნიკაციის’’ სპეციალობის სტუდენტები სტუდენტთა დასაქმების პროგრამის განხორციელების მიზნით სატელეკომუნიკაციო კომპანია „A-net”ის ტექნიკური სამსახურის დირექტორს, ბ-ნ გიგა ფირცხალაიშვილს შეხვდნენ. გასაუბრების საფუძველზე გამოვლინდა კომპანიაში არსებულ ვაკანსიაზე წარსადგენ სტუდენტთა კანდიდატურები. შეხვედრის მსვლელობისას სატელეკომუნიკაციო კომპანიაში სტუდენტთა ეტაპობრივი დასაქმების სამომავლო პერსპექტივებიც დაისახა.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის დეკანი გიზო ფარცხალაძე უმაღლესი საგანმანათლებლო დაწესებულების საგარეო ურთიერთობათა და სტრატეგიული განვითარების სამსახურის წარმომადგენლებთან ერთად, თურქეთის საავიაციო ასოციაციის უნივერსიტეტის წარმომადგენლებს შეხვდა. პროფესორებმა შუაკ კასარმა და ემინ სერინმა უნივერსიტეტის საგანმანათლებლო პროგრამებზე, მიღწევებსა და სამომავლო გეგმებზე ისაუბრეს. მხარეები შეხვედრაზე თანამშრომლობის მიმართულებებზე, გაცვლითი პროგრამებისა და სხვადასხვა სახის პროექტის განხორციელებაზე შეთანხმდნენ.