ახალი ამბები

ბსუ-ში ევროპის დღისადმი მიძღვნილი კვირეული სტუდენტთა ინტელექტუალური ტურნირით "რა, სად, როდის?" – თემაზე "ევროპა და ევროკავშირი" დაიწყო. ტურნირში სხვადასხვა ფაკულტეტის სტუდენტებისგან დაკომპლექტებული 33 გუნდი მონაწილეობდა. პირველ ადგილზე გავიდა გუნდი - „ვენი, ვიდი, ვიცი“, ხოლო მეორე ადგილი გადაინაწილეს გუნდებმა: „უქიმერიონი" და ფენიქსი“. გამარჯვებულ გუნდებს ტურნირის ორგაზატორებმა - ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსმა მარინე გიორგაძემ და ნატოსა და ევროკავშირის შესახებ საინფორმაციო ცენტრის რეგიონულმა წარმომადგენელმა, ირმა გაბინაშვილმა სამახსოვრო საჩუქრები გადასცეს.

ბათუმის შოთა რუსთაველის სახელმწიფო უნივერსიტეტმა ხელვაჩაურის მუნიციპალიტეტის სხვადასხვა საჯარო სკოლის მოსწავლეებს უმასპინძლა. აბიტურიენტებს ბსუ-ს რექტორი მერაბ ხალვაში შეხვდა, უნივერსიტეტში სწავლის პირობები, საგანმანათლებლო პროგრამები გააცნო და მომავალ სტუდენტებს წარმატებები უსურვა. აბიტურიენტებმა ასევე, უმაღლესი საგანმანათლებლო დაწესებულების მატერიალურ-ტექნიკური ბაზა, კაბინეტ-ლაბორატორიები დაათვალიერეს და დეტალური ინფორმაცია მიიღეს საუნივერსიტეტო ცხოვრების შესახებ. შეხვედრის ფარგლებში, სკოლის მოსწავლეებმა პროფესორ-მასწავლებლებთან და სტუდენტებთან ერთად, სადემონსტრაციო ცდები ჩაატარეს იმუნოგენეტიკის, ქიმიის, კრიმინალისტიკისა და სინქრონული თარგმანის ლაბორატორიებში. ღონისძიება ხელვაჩაურის ახალგაზრდული ცენტრის პროექტის „აირჩიე შენი მომავალი პროფესია“ ფარგლებში გაიმართა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ორგანიზაცია „ვემსახურები საქართველოს“ თავმჯდომარემ მარინე საბიაშვილმა თანამშრომლობის მემორანდუმს მოაწერეს ხელი. დოკუმენტი მიზნად ისახავს სტუდენტების ცნობიერების ამაღლებას სამხედრო-სამოქალაქო თავდაცვით საკითხებში, სახელმწიფოებრივი და ეროვნული აზროვნების განვითარებას, სამოქალაქო თვითშეგნებისა და პასუხისმგებლობის ამაღლებას. მემორანმდუმის ფარგლებში სტუდენტები მონაწლეობას მიიღებენ ორგანიზაცია „ვემსახურები საქართველოს“ მიერ დაგეგმილ წვრთნებსა და სწავლებებში.

ბსუ-ში UNICEF-ის საგრანტო პროექტის „უნივერსიტეტის შესაძლებლობის გაძლიერება ინკლუზიური სკოლამდელი და ზოგადი განათლების მხარდასაჭერად“ შემაჯამებელი ღონისძიება გაიმართა. პროექტის კოორდინატორმა, ზუსტ მეცნიერებათა და განათლების ფაკულტეტის დეკანმა, პროფესორმა ლელა თურმანძემ, ასოცირებულმა პროფესორებმა - ნანი მამულაძემ და ნატო შეროზიამ პროექტის შედეგები შეაჯამეს. პროფესორმა ლელა თავდგირიძემ და ლალი ჯაფარიძემ ბსუ-სა და მახინჯაურის სკოლის ბავშვთა უფლებების ცოდნის ცენტრების საქმინობაზე, განხორციელებულ პროექტებსა და სამომავლო გეგმებზე ისაუბრეს, ხოლო ასიტენტ პროფესორებმა ნინო სამნიძემ და დიანა ახვლედიანმა წიგნის „ინოვაციური მეთოდების გამოყენება ადრეული განათლების კვლევაში, ტრადიციულის მიღმა“ ქართული თარგმანის პრეზენტაცია გამართეს.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტთა აქტიური მონაწილეობით პროექტი „სათემო რეინჯერის პროგრამა’’ განხორციელდა. პროგრამის შემაჯამებელ შეხვედრაზე პროექტის ხელმძღვანელმა, სახეობათა კონსერვაციის სამეცნიერო კვლევითი ცენტრი ნაკრესის სამცხე-ჯავახეთის პროგრამის დირექტორმა ნათია მულაძემ, დაცული ტერიტორიების სააგენტოს დაგეგმვისა და განვითარების სამსახურის უფროსმა ნატო სულთანიშვილმა და კავკასიის ბუნების ფონდის აღმასრულებელმა დირექტორმა თობიას მიუნხმაიერმა პროექტის შედეგები შეაჯამეს, სტუდენტების მონაწილეობა შეაფასეს და ახალგაზრდებს სერტიფიკატები გადასცეს. პროექტი მიზნად ისახავდა გარემოსდაცვითი ცნობიერების ამაღლებას ახალგაზრდების ჩართულობით დაცული ტერიტორიების საქმიანობაში.