ახალი ამბები

შოთა რუსთაველის სახელმწიფო უნივერსიტეტის რექტორმა, პროფესორ-მასწავლებლებმა და სტუდენტებმა პატივი მიაგეს 1989 წლის 9 აპრილს მთავრობის სასახლის წინ დაღუპულ მამულიშვილებს და ზღვისპირა პარკში მემორიალი ყვავილებით შეამკეს.

საქართველოს დამოუკიდებლობის აღდგენის დღეს მიეძღვნა სოციალურ მეცნიერებათა, ბიზნესისა და სამართალმცოდნეობის ფაკულტეტთან არსებული ფოტო და ვიდეო სტუდიის (ხელმძღვანელი გივი ნახუცრიშვილი) მიერ მომზადებული ფილმი: „მტერნი არ შეგვიბრალებენ, ტირილითა და ვიშითა“. ჩვენების შემდეგ, მოეწყო დისკუსია, რომელშიც მონაწილეობა მიიღეს როგორც უნივერსიტეტის პროფესორ-მასწავლებლებმა და სტუდენტებმა, ასევე 9 აპრილის მოვლენების უშუალო მონაწილეებმა.

„სტუდენტური თვითმმართველობის თასის“ გადაცემით დასრულდა ფინალური შეხვედრა ფეხბურთში რსუ ფაკულტეტებს შორის. ღონისძიება აქციის სახეს ატარებდა და უნივერსიტეტში ის ყოველწლიურად „სტუდენტები ჯანსაღი ცხოვრებისათვის“ ფარგლებში იმართება.

სტუდენტთა დასაქმების პროგრამა წელს გაცილებით ადრე 25 აპრილიდან დაიწყება და ერთი თვის განმავლობაში იმუშავებს. მასში მონაწილეობას მიიღებენ ბათუმის სახელმწიფო უნივერსიტეტის, საზღვაო აკადემიისა და დამოუკიდებელი უნივერსიტეტის 400 სტუდენტი. აქცენტი ძირითადად სოციალურად დაუცველი ოჯახების წევრებზე გაკეთდება. სამუშაოების დასრულების შემდეგ სტუდენტები ანაზღაურებას 200 ლარს მიიღებენ. მსურველთა რეგისტაცია 7-დან 20 აპრილამდე №231 კაბინეტში (სტუდენტთა მომსახურებისა და მხარდაჭერის სამსახური) იწარმოებს.

USAID-ის ენერგეტიკის შესაძლებლობების გაუმჯობესების პროექტი საქართველოში (ECI) აცხადებს საგრანტო კონკურსს საქართველოს უმაღლესი საგანმანათლებლო დაწესებულებებისათვის სამაგისტრო პროგრამების შექმნისათვის ენერგეტიკის სფეროში.