ახალი ამბები

ბსუ-ში „ერაზმუს+“-ის აკადემიური და ადმინისტრაციული პერსონალის გაცვლითი პროგრამის IV საერთაშორისო კვირეული დასრულდა. ლიეტუვას, ლატვიის, პოლონეთისა და პორტუგალიის უნივერსიტეტების პროფესორებმა ბსუ-ს სტუდენტებს ლექციები წაუკითხეს მეცნიერების სხვადასხვა მიმართულების აქტუალურ საკითხებზე, ხოლო ადმინისტრაციის წარმომადგენლებმა საინფორმაციო შეხვედრები ჩაატარეს გაცვლითი პროგრამების ეფექტურად მართვის საკითხებზე. ბსუ-ს რექტორმა მერაბ ხალვაშმა კვირეულში მონაწილე უნივერსიტეტების აკადემიურ და ადმინისტრაციულ პერსონალს მადლობა გადაუხადა აქტიური თანამშრომლობისათვის და სერტიფიკატები გადასცა.

ბათუმის შოთა რუსთაველის სახელწიფო უნივერსიტეტში, ევროპის კვირეულის ფარგლებში, სტუდენტებთან შეხვედრა გაიმართა თემაზე: „ევროკავშირი-საქართველოს თანამშრომლობა და სამომავლო პერსპექტივები“. შეხვედრა საქართველოს ეკონომიკისა და მდგრადი განვითარების სამინისტროს აკრედიტაციის ცენტრის გენერალური დირექტორის მოადგილემ გიორგი ჩიტაძემ წარმართა. ღონისძიებაზე ახალგაზრდები გაეცნენ ინფორმაციას საქართველოს ევროინტეგრაციის პროცესის დინამიკასა და არსებული შესაძლებლობების გამოყენების მნიშვნელობის შესახებ. შეხვედრა კითხვა-პასუხის რეჟიმში წარიმართა და გიორგი ჩიტაძემ სტუდენტების აქტუალურ შეკითხვებს უპასუხა. ღონისძიება ნატოსა და ევროკავშირის შესახებ საინფორმაციო ცენტრის აჭარის ბიუროს ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტში IV საერთაშორისო კვირეულის ეგიდით, განათლების საერთაშორისო დღე გაიმართა. ღონისძიება მიზნად ისახავდა ევროპული ღირებულებების პოპულარიზაციასა და ახალგაზრდებში ცნობიერების ამაღლებას. საერთაშორისო დღის ფარგლებში მოწყობილ გამოფენაში საკუთარი ქვეყნები წარმოადგინეს „ერაზმუს+“-ის გაცვლითი პროგრამის აკადემიურმა და ადმინისტრაციულმა პერსონალმა მიკოლას რომერის უნივერსიტეტიდან, ვიტაუტას მაგნუსის უნივერსიტეტიდან, დაუგავპლის უნივერსიტეტიდან, ვროცლავის უნივერსიტეტიდან, კოიმბრას პოლიტექნიკური ინსტიტუტიდან და გაცვლით პროგრამებში მონაწილე ბსუ-ს სტუდენტებმა. გამოფენაზე ასევე წარმოდგენილი იყო ნატოსა და ევროკავშირის შესახებ საინფორმაციო ცენტრის, პროგრამა „ჰორიზონტ ევროპისა“ და საერთაშორისო განათლების ფონდის კუთხეები.

საქართველოს საკონსტიტუციო სასამართლოს თავმჯდომარე მერაბ ტურავა, USAID-ის „სამართლის უზენაესობის პროგრამის" მიერ მოწვეულ ექსპერტი, ჯორჯიის შტატის მოსამართლე პეგი უოკერი ბათუმის შოთა რუსთაველის სახელმწიფო უნივერსიტეტსის იურიდიული და სოციალურ მეცნიერებათა ფაკულტეტის სამართალმცოდნეობის საბაკალავრო პროგრამის სტუდენტებს შეხვდნენ და საჯარო ლექცია წაიკითხეს თემაზე: „სამოსამართლო სამართალი და მისი როლი ქართულ და ამერიკული სამართლის პრაქტიკაში“. ლექცია ინტერაქციულ ხასიათს ატარებდა და სტუდენტებს საშუალება მიეცათ, მიეღოთ პასუხები მათთვის საინტერესო კითხვებზე, როგორც ამერიკელი სტუმრისგან, ასევე საკონსტიტუციო სასამართლოს თავმჯდომარისგან. მოსამართლის დღისადმი მიძღვნილი კვირეულის ეგიდით ბსუ-ს იურიდიული და სოციალურ მეცნიერებათა ფაკულტეტის, ევროპის იურისტთა ასოციიაცია (ელსა) ბათუმისა და USAID-ის სამართლის უზენაესობის პროგრამის თანამშრომლობის ფარგლებში გაიმართა.

ბსუ-ში „ერაზმუს+“-ის IV საერთაშორისო კვირეული გრძელდება. სტრატეგიული განვითარებისა და საგარეო ურთიერთობათა დეპარტამენტის წარმომადგენლებმა კვირეულის მონაწილეებს ბსუ-ს მატერიალურ-ტექნიკური ბაზა და ლაბორატორიები დაათვალიერებინეს, საგანმანათლებლო პროგრამები გააცნეს და ქართული კულტურისა და ენის შემეცნებით-გასართობი პრეზენტაცია წარუდგინეს. უცხოელმა პროფესორებმა ჰუმანიტარულ მეცნიერებათა, საბუნებისმეტყველო მეცნიერებათა და ჯანდაცვის, ეკონომიკისა და ბიზნესის ფაკულტეტების სტუდენტებისათვის ლექციები წაიკითხეს, ხოლო ადმინისტრაციულმა პერსონალმა პრეზენტაციები გამართა თავიანთი უნივერსიტეტებისა და ქვეყნების შესახებ.