ახალი ამბები

უნივერსიტეტის სააქტო დარბაზში ცნობილი მწერლის, კრიტიკოსის, პუბლიცისტისა და საზოგადო მოღვაწის რევაზ მიშველაძის 70 წლისადმი მიძღვნილი საიუბილეო საღამო გაიმართა. შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს თავმჯდომარემ მიხეილ მახარაძემ, პროფესორ-მასწავლებლებმა, სტუდენტებმა, კოლეგებმა და საზოგადოების წარმომადგენლებმა მწერალს იუბილე მიულოცეს, მის შემოქმედებაზე ისაუბრეს, სამახსოვრო საჩუქრები გადასცეს და წარმატებები უსურვეს.

შოთა რუსთაველის სახელმწიფო უნივერსიტეტის აკადემიურმა საბჭომ ექსეტერის უნივერსიტეტის (დიდი ბრიტანეთი) პროფესორს, შავი ზღვის ისტორიის მკვლევარს, ქართველოლოგს დევიდ ბრაუნდს საპატიო დოქტორის წოდება მიანიჭა. მსოფლიოში აღიარებული ანტიკური ხანის მკვლევარი უკვე 25 წელია ნაყოფიერად მუშაობს საქართველოს ისტორიის საკითხებზე. დევიდ ბრაუნდი ავტორია 110 ნაშრომისა და 10-ზე მეტი მონოგრაფიისა. საპატიო დოქტორმა თავისი მონოგრაფიით ,,საქართველო ანტიკურ ხანაში“ სათანადოდ შეაფასა საქართველოს როლი მსოფლიო ისტორიაში.

რეგიონული თანამშრომლობის პოლიტიკურ-სოციალურ-ეკონომიკურ და კულტურულ ასპექტებს მიეძღვნა რესპუბლიკური სამეცნიერო კონფერენცია თემაზე: ,,სამხრეთ კავკასია: რეგიონული თანამშრომლობის პრობლემები და პერსპექტივები“. შოთა რუსთაველის სახელმწიფო უნივერსიტეტისა და ილიას უნივერსიტეტის პოლიტოლოგიის ინსტიტუტის მიერ ორგანიზებული კონფერენცია შოთა რუსთაველის დარბაზში ჩატარდა. კონფერენცია სამ სექციაში მუშაობდა და მასში ქვეყნის სხვადასხვა უმაღლესი სასწავლებლის პროფესორ-მასწავლებლები და სამეცნიერო-კვლევითი დაწესებულების მკვლევრები მონაწილეობდნენ.

შოთა რუსთაველის სახელმწიფო უნივერსიტეტში მართვის ორგანოების რიგით მეორე არჩევნები ჩატარდა. აკადემიური საბჭო 8 წევრისაგან დაკომპლექტდება, თითოეული ფაკულტეტიდან არჩეული იქნება 2 წარმომადგენელი. წარმომადგენლობითი საბჭოს შემადგენლობაში 21 წევრი შევა. განათლებისა და მეცნიერებათა ფაკულტეტის ინტერესებს 7 აკადემიური პერსონალი და 5 სტუდენტი დაიცავს, აგრარული ტექნოლოგიებისა და ეკოლოგიის ფაკულტეტს - 1 აკადემიური პერსონალი და 1 სტუდენტი, საინჟინრო-ტექნოლოგიური ფაკულტეტს - 1 აკადემიური პერსონალი და 1 სტუდენტი, ხოლო სოციალურ მეცნიერებათა, ბიზნესისა და სამართალმცოდნეობის ფაკულტეტისას - 3 აკადემიური პერსონალი და 2 სტუდენტი. აკადემიური საბჭოს არჩევნებში 11 კანდიდატი, ხოლო წარმომადგენლობითი საბჭოს არჩევნებში 29 საარჩევნო სუბიქტი მონაწილეობდა.

შავი ზღვის დაცვის საერთაშორისო დღე რსუ-ს განათლებისა და მეცნიერებათა ფაკულტეტის ბიოლოგიის დეპარტამენტმა ტრადიციულად გარემოს დაცვისა და ბუნებრივი რესურსების სამმართველოსთან ერთად აღნიშნა. შავი ზღვის ეკოლოგიურ პრობლემებს მიეძღვნა სამეცნიერო კონფერენცია თემაზე: ,,შავი ზღვის ეკოლოგიური ასპექტები“. სტუდენტებმა, პროფესორ-მასწავლებლებმა, სამმართველოს წარმომადგენლებმა და ექსპერტებმა შავი ზღვის დაცვის საკითხებზე იმსჯელეს და შავი ზღვის ქვეყნებს შორის ურთიერთთანამშრომლობის პერსპექტივები განიხილეს.