ახალი ამბები

ცნობილ მეცნიერსა და საზოგადო მოღვაწეს, ისტორიის მეცნიერებათა დოქტორს, შოთა რუსთაველის სახელმწიფო უნივერსიტეტის ემერიტუსს, ქრისტიანული კულტურის კვლევის სამეცნიერო ცენტრის ხელმძღვანელს, პროფესორ ბიჭიკო დიასამიძეს 70 წელი შეუსრულდა. შოთა რუსთაველის სახელმწიფო უნივერსიტეტის პროფესორ-მასწავლებლებმა, კოლეგებმა და სტუდენტებმა საიუბილეო სხდომაზე ღვაწლმოსილი პროფესორის ცხოვრებასა და სამეცნიერო-საზოგადოებრივ საქმიანობაზე ისაუბრეს. პროფესორ ბიჭიკო დიასამიძის სამეცნიერო ინტერესის სფეროა საქართველოს მართლმადიდებლური ეკლესიის ისტორია და სტუდენტთა მსოფლმხედველობის ფორმირების საკითხები, რომელთაც მკვლევარმა 70-ზე მეტი სამეცნიერო ნაშრომი და 10 მონოგრაფია მიუძღვნა

იშვიათი დაავადებების თანამედროვე მართვის პრობლემებს მიეძღვნა სამეცნიერო-პრაქტიკული კონფერენცია თემაზე: ,,იშვიათი დაავადებების მართვის ოპტიმიზაციის საკითხები საქართველოში". პროფესორ-მასწავლებლებმა და პრაქტიკოსმა ექიმებმა იშვიათი დაავადებების დიაგნოსტიკისა და სწორი მკურნალობის მნიშვნელობაზე იმსჯელეს. ჰოლანდიელმა ექსპერტმა ელიზაბეტ სიბერიუსმა ქართველ კოლეგებს სხვადასხვა ქვეყნის იშვიათ დაავადებათა მართვის გამოცდილება გაუზიარა. კონფერენციის მონაწილეებმა შეიმუშავეს მეთოდი, რაც ხელს შეუწყობს საინფორმაციო ბანკის შექმნასა და დაავადებულთა დროულ გამოვლენას.

შოთა რუსთაველის სახელმწიფო უნივერსიტეტში შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო პროექტების წარდგინება გაიმართა. პროექტების ხელმძღვანელებმა სამეცნიერო ფონდის მონიტორინგის სამსახურის წარმომადგენლებს წარმოებული კვლევა-ძიების შედეგები გააცნეს. უმაღლესი სასწავლებლის პროფესორ-მასწავლებლები და მკვლევრები მეცნიერების სხვადასხვა მიმართულებაში 5 სამეცნიერო პროექტზე მუშაობენ.

სოციალურ მეცნიერებათა, ბიზნესისა და სამართალმცოდნეობის ფაკულტეტის იურიდიული დეპარტამენტის, იურიდიული კლინიკისა და ნატო-ს საინფორმაციო ცენტრის ორგანიზებით პროექტის ,,უნივერსიტეტის სადისკუსიო კლუბის“ ფარგლებში შეხვედრა გაიმართა თემაზე: "კრიმინალური მენტალიტეტი". ახალგაზრდებმა პროფესორ-მასწავლებლებთან და ექსპერტებთან ერთად კრიმინალური მენტალიტეტის პრობლემაზე ფილმები: ,,დავსაჯოთ თუ შევიწყალოთ“ და ,,საპყრობილეები“ განიხილეს. სტუდენტებში იურიდიული ცნობიერების ამაღლების მიზნით მომავალში ნაფიც მსაჯულთა იმიტირებული სასამართლო პროცესების მოწყობაც იგეგმება.

შოთა რუსთაველის სახელმწიფო უნივერსიტეტში სტუდენტური თვითმმართველობის რიგით მეოთხე არჩევნები ჩატარდა. სტუდენტთა უმაღლესი წარმომადგენლობითი ორგანო 68 წევრით დაკომპლექტდა. საარჩევნო პროცედურას არასამთავრობო ორგანიზაციების ,,ახალი თაობის“, ,,ბორჯღალოსა“ და სტუდენტური თვითმმართველობის წევრობის კანდიდატების წარმომადგენლები აკვირდებოდნენ. არჩევნებში სულ 1477 სტუდენტმა მიიღო მონაწილეობა.