ახალი ამბები

საქართველოს ეროვნული აკადემიის წევრის, ისტორიის მეცნიერებათა დოქტორის, ღვაწლმოსილი პროფესორის იური სიხარულიძის დაბადებიდან 85 წლისადმი მიძღვნილი ორდღიანი საიუბილეო სესია გაიმართა. პროფესორ-მასწავლებლებმა, კოლეგებმა, სტუდენტებმა და უმაღლესი სასწავლებლის 1961 წლის კურსდამთავრებულებმა იუბილარს ღირსშესანიშნავი თარიღი მიულოცეს. ხანგრძლივი ნაყოფიერი სამეცნიერო მოღვაწეობისა და კადრების მომზადებაში შეტანილი წვლილისათვის პროფესორ იური სიხარულიძეს უნივერსიტეტის რექტორმა, პროფესორმა ალიოშა ბაკურიძემ და აჭარის ღვაწლმოსილ მუშაკთა პატივმიგებისა და მადლიერების საზოგადოებამ სიგელები და სამახსოვრო საჩუქრები გადასცეს.

შოთა რუსთაველის სახელმწიფო უნივერსიტეტმა ბათუმის არქეოლოგიურ მუზეუმთან, აჭარის არ მთავრობის საქვეუწყებო დაწესებულება საარქივო სამმართველოსთან, საქართველოს კულტურული მემკვიდრეობის ეროვნული სააგენტოს გონიო-აფსაროსის არქეოლოგიურ-არქიტექტურულ მუზეუმ-ნაკრძალთან, აკაკი წერეთლის სახელობის ქალაქ ბათუმის საჯარო ბიბლიოთეკასა და ხარიტონ ახვლედიანის სახელობის აჭარის მუზეუმთან თანამშრომლობის მემორანდუმი გააფორმა. ხელშეკრულება ითვალისწინებს სტუდენტთა სასწავლო და პროფესიული პრაქტიკის გავლას, რაც ხელს შეუწყობს ახალგაზრდებში პრაქტიკული და ანალიტიკური უნარ-ჩვევების ჩამოყალიბებასა და თეორიული ცოდნის პრაქტიკული საქმიანობით განმტკიცებას

რსუ-ს სამეცნიერო ცენტრის ფიტოპათოლოგიისა და ბიომრავალფეროვნების მიმართულების ინიციატივითა და აჭარის სოფლის მეურნეობის სამინისტროსა და სურსათის უვნებლობის ვეტერინარიისა და მცენარეთა დაცვის ეროვნული სამსახურის მხარდაჭერით ბათუმის ცენტრალურ ბაზარში აქცია გაიმართა სახელწოდებით: „მცენარეთა ჯანმრთელობის კლინიკა“. სამეცნიერო ცენტრის მკვლევრებთან ერთად ინგლისელმა სპეციალისტებმა მობილური ლაბორატორიის საშუალებით მცენარეთა საანალიზო ნიმუშებზე უფასო გამოკვლევები ჩაატარეს. კვლევის შედეგები და რეკომენდაციები აქციის მონაწილეებმა რეგიონის ხუთივე მუნიციპალიტეტის ფერმერებს ადგილზევე გააცნეს. აქცია ბათუმის შემდეგ იმერეთში გაიმართება.

საგანმანათლებლო პროგრამების დახვეწას, ადამიანთა რესურსის მენეჯმენტის გაუმჯობესებასა და კულტურის სფეროს განვითარების საკითხებს მიეძღვნა სამეცნიერო-პრაქტიკული კონფერენცია თემაზე: „უმაღლესი განათლების სისტემის განვითარება სოციალური პარტნიორობის მხარდაჭერისა და ჰუმანიტარულ მეცნიერებათა კონკურენტუნარიანობის გაზრდისათვის“. კონფერენცია ტემპუსის საგრანტო პროექტ HESDeSPI- ის ფარგლებში ჩატარდა და მასში ქვეყნის სხვადასხვა უმაღლესი სასწავლებლის პროფესორ-მასწავლებლები, ხარისხის უზრუნველყოფის სამსახურის წარმომადგენლები და სტუდენტები მონაწილეობდნენ. სამეცნიერო-პრაქტიკული კონფერენცია ხუთი დღის განმავლობაში შოთა რუსთაველის სახელმწიფო უნივერსიტეტში, ხელოვნების სასწავლო უნივერსიტეტში, აჭარის ხელოვნების მუზეუმსა და აჭარის განათლების, კულტურისა და სპორტის სამინისტროში მიმდინარეობდა

საქართველოს ინტელექტუალური საკუთრების ეროვნული ცენტრის „საქპატენტის“ წარმომადგენლებმა და ინტელექტუალური სამართლის ამერიკელმა ინსტრუქტორმა ტიმოთი ტრეინერმა რსუ-ს სტუდენტებისა და პროფესორ-მასწავლებლებისათვის სემინარი ჩაატარეს თემაზე: „ინტელექტუალური საკუთრების საფუძვლები და დაცვის მექანიზმები“. ტრენინგი მიზნად ისახავდა ინტელექტუალური საკუთრების სფეროში საზოგადოებრივი ცნობადობის ამაღლებას. პროექტი საქართველოს ინტელექტუალური საკუთრების ეროვნული ცენტრის „საქპატენტისა“და აშშ-ს საერთაშორისო განვითარების სააგენტოს (USAID) ეკონომიკური აღმავლობის ინიციატივის (EPI) პროგრამის ფარგლებში ჩატარდა. ტრენინგის მონაწილეებს „საქპატენტის“ წარმომადგენლებმა სერტიფიკატები გადასცეს.