ახალი ამბები

შ. ესენოვის სახელობის კასპიის (ყაზახეთი) სახელმწიფო უნივერსიტეტის პრორექტორი, ფილოლოგიის მეცნიერებათა დოქტორი, პროფესორი ჟანა ტოლისბაევა ბათუმის შოთა რუსთაველის სახელმწიფო უნივერსიტეტს ეწვია. ადმინისტრაციის ხელმძღვანელთან, რექტორის მოადგილეებთან, დეკანებთან და დეპარტამენტის ხელმძღვანელებთან გამართულ შეხვედრაზე დაიგეგმა უნივერსიტეტებს შორის თანამშრომლობის მემორანდუმის გაფორმება. მხარეებმა გაცვლითი პროგრამებისა და სასწავლო-სამეცნიერო პროექტების განხორციელების პირობებზე ისაუბრეს.

ბათუმის შოთა რუსთაველის სახელმწიფო უნივერსიტეტში ,,საქართველოს ფრანგული ინსტიტუტის კინოკლუბი“ გაიხსნა. უმაღლეს საგანმანათლებლო დაწესებულებაში თვეში ერთჯერ, ხუთშაბათობით, ფრანგული ფილმების ჩვენება შედგება. კინოკლუბი ბათუმის შოთა რუსთაველის სახელმწიფო უნივერსიტეტის, საქართველოს ფრანგული ინსტიტუტისა და ბათუმის ხელოვანთა სახლის “არგანი” ერთობლივი ძალისხმევით ამოქმედდა. 238-ე აუდიტორიაში გამართულ პრეზენტაციაზე ორგანიზატორებმა პროექტის მნიშვნელობაზე ისაუბრეს და ფრანგი რეჟისორების - კლერ ბურგერის, კოსტია ტესტუსა და პოლ კალორის ფილმები წარმოადგინეს.

შოთა რუსთაველის დარბაზში აბრეშუმის გზის VII საერთაშორისო კონფერენცია გაიხსნა თემაზე: "ევრაზიის ქვეყნების მდგრადი ეკონომიკური განვითარება: გამოწვევები და პერსპექტივები". ქართველი და უცხოელი მეცნიერები ისეთ მნიშვნელოვან საკითხებზე წარმოადგენენ მოხსენებებს, როგორიცაა ეკონომიკური პოლიტიკა, ბიზნესის განვითარება, თეორია და პრაქტიკა, საერთაშორისო თანამშრომლობა და ვაჭრობა, გლობალიზაცია და ახალი ეკონომიკა, სოციალური და გეოპოლიტიკური გამოწვევები. ექსპერტები ასევე იმსჯელებენ ტურიზმისა და ინვესტიციის შესაძლებლობებზე, ბიზნესგანათლებაზე, ისტორიასა და კულტურაზე. კონფერენცია საქართველოს შავი ზღვის საერთაშორისო უნივერსიტეტის, ბათუმის შოთა რუსთაველის სახელმწიფო უნივერსიტეტისა და საქართველოს ეკონომიკისა და მდგრადი განვითარების სამინისტროს ორგანიზებით იმართება.

საქართველოს დამოუკიდებლობის აღდგენის დღეს მიეძღვნა სტუდენტთა სამეცნიერო ცენტრის, ბიბლიოთეკის, ისტორიის, არქეოლოგიისა და ეთნოლოგიის მიერ ორგანიზებული სტუდენტთა კონფერენციები. ორი დღის განმავლობაში ბათუმის შოთა რუსთაველის სახელმწიფო უნივერსიტეტის სხვადასხვა სპეციალობის სტუდენტები ქვეყნის სახელმწიფოებრიობისა და ქართული ეკლესიის ავტოკეფალიის აღდგენის მნიშვნელობაზე მსჯელობდნენ. ახალგაზრდებმა 1918-1990 წლებში განვითარებულ ისტორიულ მოვლენებზე ისაუბრეს, ეროვნული გმირები გაიხსენეს და პატივი მიაგეს მათ ხსოვნას.

,,იყავი ბრიტანეთის ნაწილი“- ამ სახელწოდებით ინგლისური ენისა და ლიტერატურის სპეციალობის სტუდენტებმა ბრიტანული კულტურის საღამო მოაწყვეს. ახალგაზრდებმა ინგლისურ ენაზე ბრიტანეთის ისტორიის, ლიტერატურისა და კულტურის შესახებ ინტელექტუალურ-შემეცნებითი თამაშები და სლაიდშოუ წარმოადგინეს. ასევე შეასრულეს შოტლანდიური ცეკვები, ცნობილი ბრიტანული სიმღერები და თეატრალიზებული წარმოდგენები. სტუდენტური პროექტი -,,იყავი ბრიტანეთის ნაწილი“ ბათუმის შოთა რუსთაველის სახელმწიფო უნივერსიტეტის თვითმმართველობის ორგანიზებით განხორციელდა და ბრიტანული კულტურის პოპულარიზაციას ისახავდა მიზნად.