ახალი ამბები

19-21 ნოემბერს ბათუმის შოთა რუსთაველის სახელმწიფო ინივერსიტეტის რექტორმა, პროფესორმა მერაბ ხალვაშმა, ტურიზმის ფაკულტეტის დეკანმა, ასოცირებულმა პროფესორმა ირაკლი კორძაიამ, მასპინძლობის მენეჯმენტის დეპარტამენტის ხელმძღვანელმა, პროფესორმა როსტომ ბერიძემ, ტურიზმის დეპარტამენტის ხელმძღვანელმა, პროფესორმა ანზორ დევაძემ, ასოცირებულმა პროფესორმა ეკატერინე ბახტაძემ, ასისტენტ პროფესორმა თეონა ზოიძემ და ასისტენტმა ლელა დევაძემ „შატო ივერი“-ს გენერალურ მენეჯერთან, ივერი ბერიძესთან და ბრენდ შეფთან მარინე გორგილაძესთან ერთად, ბსუ-ს ტურიზმის ფაკულტეტის და არდაჰანის უნივერსიტეტის ტურიზმის ფაკულტეტის ორგანიზებულ ვორქშოპში „გასტრონომია და ტურიზმი“ მონაწილეობა მიიღეს. შეხვედრა ოფიციალურად არდაჰანის პროვინციის გუბერნატორმა ჰაირეთინ ჩიჩეკმა, უნივერსიტეტის რექტორებმა და დეკანებმა გახსნეს.

სტუდენტთა საერთაშორისო დღეს, სტუდენტური კლუბის „რუსთაველი“ წევრებმა, თავისუფალ სივრცეში რუბრიკაში - „რექტორთან ყავაზე“ სასაუბროდ ბსუ-ს რექტორი მერაბ ხალვაში მიიწვიეს. შეხვედრაზე რექტორმა სტუდენტებს კლუბის დაარსება მიულოცა და წარმატებები უსურვა. არაფორმალურ გარემოში, რექტორი სტუდენტებს ესაუბრა საქართველოს ევროკავშირში ინტეგრაციის პროცესზე, დასავლური განათლების სისტემაზე, საუნივერსიტეტო სტუდენტურ პროექტებზე, თავისუფალი სივრცეების მნიშვნელობაზე. შეხვედრა კითხვა-პასუხის რეჟიმში გაგრძელდა, რექტორმა სტუდენტების შეკითხვებს უპასუხა და საკუთარი გამოცდილება გაუზიარა.

ბსუ-ს რექტორი მერაბ ხალვაში მსოფლიოსა და ევროპის ჩემპიონ სტუდენტებს შეხვდა. რექტორმა წარმატებულ სპორტსმენებს, რომლებმაც ბოლო პერიოდში ჩვენს რეგიონს და სრულიად საქართველოს არაერთი წარმატება მოუტანეს სტუდენტთა საერთაშორისო დღე მიულოცა. რექტორმა სტუდენტებს უნივერსიტეტისა და ჯანსაღი ცხოვრების წესის პოპულარიზაციაში შეტანილი წვლილისათვის მადლობა გადაუხადა, სპორტში მიღწეული განსაკუთრებული წარმატებებისათვის სიგელები გადასცა და სწავლის გადასახადისაგან გაათავისუფლა.

ბათუმის შოთა რუსთაველის სახელმწიფო უნივერსიტეტში პროექტის „მომავლის მასწავლებელი“ სამუშაო შეხვედრა გაიმართა. პროექტს საქართველოში ამერიკის შეერთებული შტატების საელჩოს დაფინანსებით საერთაშორისო ორგანიზაცია PH International-ი ბსუ-სა და სხვა უმაღლესი საგანმანათლებლო დაწესებულებების მონაწილეობით ახორციელებს. შეხვედრაზე აშშ-ის საელჩოს საგრანტო და უმაღლესი განათლების პროგრამების კოორდინატორმა სოფიო ბზიშვილმა, PH Internationa-ის საქართველოს წარმომადგენლობის დირექტორმა ბერდია ნაცვლიშვილმა, ბსუ-ს რექტორის მოადგილემ ანზორ ბერიძემ და ხარისხის უზრუნველყოფის სამსახურის უფროსმა ვლადიმერ ღლონტმა ბსუ-ს ადმინისტრაციასთან და პედაგოგიურ მეცნიერებათა დეპარტამენტის პროფესორ-მასწავლებლებთან ერთად განიხილეს პროექტით დაგეგმილი აქტივობების მნიშვნელობა და განხორციელების გზები. 18-თვიანი პროექტი ითვალისწინებს მასწავლებლის მომზადების საგანმანათლებლო პროგრამების გაუმჯობესებას და სწავლების ინოვაციური მეთოდების დანერგვას ამერიკის უნივერსიტეტების გამოცდილების მაგალითზე.

ბათუმის შოთა რუსთაველის სახელმწიფო უნივერსიტეტში ამერიკელმა მედიაექსპერტებმა, არიზონას სახელმწიფო უნივერსიტეტის ვალტერ კრონკაიტის ჟურნალისტიკის სკოლის პროფესორებმა - ბილ სილკოკმა და კენ ფოსკეტტმა საჯარო ლექციები წაიკითხეს ტრადიციული და ციფრული მედიის გამოწვევებზე. ორი დღის განმავლობაში ამერიკელმა მედიაექსპერტებმა ბსუ-ს სტუდენტებს, პროფესორ-მასწავლებლებსა და მოქმედ ჟურნალისტებს ისეთი აქტუალური საკითხები გააცნეს, როგორებიცაა: „თავისუფალი პრესის მოდელი სამართლიანი არჩევნების გაშუქებისთვის", „დეზინფორმაცია", „სოციალური მედია ჟურნალისტიკის სწავლებაში" და „საგამოძიებო ჟურნალისტიკა". ღონისძიების ფარგლებში მოეწყო ვორკშოფი, ამერიკელმა პროფესორებმა მსმენელებს მრავალწლიანი გამოცდილება გაუზიარეს და მათ აქტუალურ შეკითხვებს უპასუხეს.