ახალი ამბები

მაქს ვებერის ფონდის ხელმძღვანელი საქართველოში ანდრეას ჰილგერი და ფონდის მენეჯერი დავით ჯიშკარიანი ბათუმის შოთა რუსთველის სახელმწიფო უნივერსიტეტს ეწვივნენ. ბსუ-ს რექტორთან, პროფესორ მერაბ ხალვაშთან გამართულ შეხვედრაზე ანდრეას ჰილგერმა საქართველოსა და გერმანიას შორის არსებულ ურთიერთობებსა და სამომავლო თანამშრომლობის მიმართულებებზე ისაუბრა. ბსუ-ს რექტორმა მერაბ ხალვაშმა სტუმრებს გააცნო უნივერსიტეტში გერმანიის მხარდაჭერით განხორციელებული და მიმდინარე სამეცნიერო-საგანმანათლებლო პროგრამები. მხარეთა შეთანხმებით, დაიგეგმა ერთობლივი პროექტების განხორციელება, გაცვლითი პროგრამების შემუშავება და თანამშრომლობის მემორანდუმის გაფორმება.

ბსუ-ს „სტუდენტთა საგანმანათლებლო, კულტურულ-შემოქმედებითი და სპორტული სახის პროექტების კონკურსი“ დასრულდა. 2023 წლის ნოემბერ-დეკემბერში სტუდენტური საგანმანათლებლო, კულტურულ-შემოქმედებითი და სპორტული სახის პროექტების კონკურსში გამარჯვებულად გამოვლინდა შემდეგი 6 პროექტი: „ევროკავშირის ახალგაზრდული ფორუმი“, „თავისუფალი მსმენელი/Free listener“, „საქმიანი ვიზიტები“, „სტუდენტური ახალი წელი (საახალწლო ღონისძიებები)”, „ინოვაციური პროექტების შესწავლის კურსი“ და „ტაო-კლარჯეთი ჩვენი შთაგონება“. ბსუ სტუდენტებს ულოცავს კონკურსში გამარჯვებას და უსურვებს წარმატებებს.

24-25 ნოემბერს, ბათუმის შოთა რუსთაველის სახელმწიფო უნივერსიტეტში, სხვადასხვა ფაკულტეტის სტუდენტებისათვის ტრენინგი ჩატარდა თემაზე: „დისკურსის ხელოვნება, როგორც საზოგადოებაზე ზემოქმედების ეფექტური იარაღი’’. ტრენინგს უძღვებოდა ფრანკოფონიის სააგენტოს ტრენერი, სამეცნიერო ექსპერტი, გრიგოლ რობაქიძის სახელობის უნივერსიტეტის ასოცირებული პროფესორი თამარ გაგოშიძე. სტუდენტები გაეცნენ ზეპირი თუ წერითი დისკურსების ზემოქმედების საკითხს, დისკურსის ხელოვნების, როგორც სამეცნიერო დარგის გაჩენისა და განვითარების ისტორიას, მოისმინეს ცნობილი პოლიტიკური, მენეჯერული და კინომატოგრაფიული დისკურსები; ახალგაზრდებმა ასევე იმსჯელეს ყურადღების მოსაზიდ სარეკლამო-მარკეტინგულ და ჟურნალისტურ ხერხებზე, რის შედეგადაც, ტრენერის მიერ მიწოდებული ამოცანის მიხედვით, შექმნეს და დამსწრე აუდიტორიას წარუდგინეს საკუთარი გამოსვლები.

ბათუმის შოთა რუსთაველის სახელმწიფო უნივერსიტეტში ცნობილ ქართველ პოეტ ტარიელ ხარხელაურთან შეხვედრა გაიმართა. საღამოზე ავტორმა ბსუ-ს სტუდენტების, პროფესორ-მასწავლებლებისა და საზოგადოების წარმომადგენლებისათვის საკუთარი ლექსები წაიკითხა და მათი შექმნის ისტორიები გაიხსენა. შეხვედრა კითხვა-პასუხის რეჟიმში წარიმართა და პოეტმა ტარიელ ხარხელაურმა სტუდენტების შეკითხვებს უპასუხა. ღონისძიება სტუდენტური კლუბის „რუსთაველი“ ორგანიზებით პროექტ „თავისუფალი მსმენელის” ფარგლებში გაიმართა.

ბათუმის შოთა რუსთველის სახელმწიფო უნივერსიტეტის პროფესორ-მასწავლებლებმა, მკვლევრებმა და სტუდენტებმა შოთა რუსთაველის საქართველოს ეროვნული სამეცნიერო ფონდის 2023 წლის საგამომცემლო სახელმწიფო სამეცნიერო გრანტი, ახალგაზრდა მეცნიერთა კვლევების გრანტი და მაგისტრანტთა სასწავლო-კვლევითი პროექტების გრანტი მოიპოვეს. ბსუ პროფესორ-მასწავლებლებს, მკვლევრებსა და სტუდენტებს ულოცავს მნიშვნელოვან გამარჯვებას და წარმატებებს უსურვებს.