ბათუმის შოთა რუსთაველის სახელმწიფო უნივერსიტეტის თარგმანისა და ინტერდისციპლინური კვლევების ცენტრის სამეცნიერო კომისიაში მონაწილეობით, ბათუმის შოთა რუსთაველის სახელმწიფო უნივერსიტეტი 2024 წლის 23-25 სექტემბერს უმასპინძლებს რიგით მე-7 საერთაშორისო კონფერენციას თარგმანი გარდამავალ პარადიგმაში 7 (ინგლისურ ენაზე: Translation in Transition 2024, Seventh edition); საერთაშორისო კონფერენციების სერია დამკვიდრებულია ემპირიული მთარგმნელობითი კვლევების სფეროში მკვლევართა ცენტრალური შეხვედრის ადგილად; კონფერენციას ორგანიზებას გაუწევს ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტი, თარგმანისა და ინტერდისციპლინური კვლევების ცენტრი და სტრატეგიული განვითარებისა და საგარეო ურთიერთობათა დეპარტამენტი.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის საერთაშორისო სამეცნიერო ელექტრონულ ჟურნალ „აღმოსავლეთმცოდნეობის მაცნეს“ (E-ISSN 2720-8168; ISSN 2587-490X) საერთაშორისო სამეცნიერო ინდე-ქსირების (ISI)/International Scientific Indexing ბაზაში მიენიჭა იმპაქტ ფაქტორის - 1.668 კოეფიციენტი (2023-2024). საერთაშორისო სამეცნიერო ჟურნალი აღმოსავლეთმცოდნეობის მაცნე დაარსდა 2018 წელს ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ბაზაზე.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ჟურნალისტიკის საბაკალავრო საგანმანათლებლო პროგრამამ სრული აკრედიტაცია წარმატებით გაიარა. ვულოცავთ სტუდენტებსა და პროფესორ-მასწავლებლებს ამ მნიშვნელოვან გამარჯვებას და წარმატებებს ვუსურვებთ.

ფრანკოფონული საუნივერსიტეტო სააგენტოს (AUF) მხარდაჭერით, ტუნისის ბიზნესის უმაღლესი სკოლის პროფესორმა იმენ ხანჩელმა 13-15 დეკემბერს, ბათუმის შოთა რუსთაველის სახელმწიფო უნივერსიტეტში სხვადასხვა ფაკულტეტის სტუდენტებისათვის ტრენინგი ჩაატარა თემაზე: „კომუნიკაცია“. ტრენინგი ითვალისწინებდა პრაქტიკულ სავარჯიშოებს, რაც დაეხმარა სტუდენტებს განხილული თემატიკის გათავისებასა და ეფექტიანი კომუნიკაციის უნარების გაუმჯობესებაში. სასწავლო კურსის მიზანი იყო ეფექტიანი კომუნიკაციისათვის საჭირო ცოდნის შეძენა და შესაბამისი უნარების განვითარება, რაც ხელს უწყობს ინტერპერსონალური ურთიერთობების წარმატებით განხორციელებას. ტრენინგი ჩატარდა ფრანგულ ენაზე და მონაწილეობა მიიღო სხვადასხვა საფეხურისა და ფაკულტეტის სტუდენტმა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და საქართველოს საგარეო საქმეთა სამინისტროს საქართველოს საერთაშორისო ხელშეკრულებათა თარგმნის ბიუროს დირექტორმა ნიკოლოზ მემანიშვილმა მემორანდუმს მოაწერეს ხელი. ხელშეკრულება ითვალისწინებს თანამშრომლობას სამეცნიერო, კვლევით და მთარგმნელობით სფეროებში. მემორანდუმის მიზანია ერთობლივი პროექტების დაგეგმვა და შესრულება სახელმწიფო ენის კონსტიტუციური სტატუსის დაცვის, სახელმწიფო ენის ფლობის დონის ამაღლებისა და საჯარო სივრცეში მისი სრულფასოვანი მიმოქცევის უზრუნველსაყოფად; ასევე დაიგეგმა თანამშრომლობა საქართველოს საერთაშორისო ხელშეკრულებების უცხოენოვანი ტექსტების თარგმნის, დარგობრივი ტერმინოლოგიის დამუშავებისა და დარგობრივი თარგმანის ხარისხის გაუმჯობესების მიმართულებით.