ბათუმის შოთა რუსთაველის სახელმწიფო უნივერსიტეტის, ფრანგული ენის მასწავლებელთა ასოციაციის და ბათუმის ბულვარის ორგანიზებით საფრაგეთის ეროვნული დღესასწაული სხვადასხვა აქტივობებით აღინიშნა. ღონისძიება ბსუ-ში საქართველოში საფრანგეთის ელჩმა პასკალ მენიემ, უნივერსიტეტის რექტორმა მერაბ ხალვაშმა და ქალაქ ბათუმის მერმა ლაშა კომახიძემ გახსნეს. უნივერსიტეტის ფოიეში მოეწყო ფაბლაბ ბსუ-ს ნამუშევრების გამოფენა, ძველი ბულვარის ამსახველი ექსპოზიცია, ქართულ-ამერიკულმა სკოლამ და სკოლამ „ევრო 2000“ ფრანგული ლიტერატურის პერსონაჟები გააცოცხლეს და მოსწავლეების ნახატები გამოფინეს. ღონისძიება მუსიკალურად გააფორმა უნივერსიტეტის ბენდმა, ასევე შესრულდა მელოდიები აკორდეონით და კლასიკური მუსიკალური ნომრები ფორტეპიანოზე.

ბსუ-ში შოთა რუსთაველის პოემის „ვეფხისტყაოსნის“ მრავალენოვანი ონლაინპორტალის წარდგენა ჩატარდა. ონლაინპორტალი ბსუ-სა და ფრანკფურტის უნივერსიტეტს შორის დადებული მემორანდუმის საფუძველზე იხსნება და იგეგმება ერთობლივი საერთაშორისო სამეცნიერო პროექტის ფარგლებში „ვეფხისტყაოსნის“ თარგმანების სრული ვერსიის პარალელური კორპუსის შექმნა. პოემა მსოფლიოს 55 ენაზეა ნათარგმნი, რაც არაჩვეულებრივი რესურსია მრავალენოვანი პარალელური კორპუსის შესაქმნელად.

ბათუმის სახელმწიფო უნივერსიტეტის ჰუმანიტარულ მეცნიერებათა ფაკულტეტთან არსებული „არაფორმალური განათლების ცენტრის“ პროექტის - „უნივერსიტეტი-სკოლას“ - მონაწილეთა შეხვედრა გაიმართა. პროექტის ფარგლებში სტუდენტები ეროვნული გამოცდებისათვის მზადებაში ეხმარებიან სკოლის მოსწავლეებს ზოგად უნარებში, ქართულ ენასა და ლიტერატურაში, ისტორიაში. მოსწავლეებს მიესალმნენ და პროექტის მიმდინარეობა შეაფასეს ჰუმანიტარულ მეცნიერებათა ფაკულტეტის დეკანმა მარინე გიორგაძემ და არაფორმალური განათლების ცენტრის ხელმძღვანელმა ლალი ანთიძემ.

თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტში გამართულ V ყოველწლიური სტუდენტური კონფერენციის „ანტიკურობის თანამედროვეობა“ მუშაობაში თბილისის სახელმწიფო უნივერსიტეტისა და ქუთაისის აკაკი წერეთლის სახელმწიფო უნივერსიტეტის სტუდენტებთან ერთად, მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებთა ფაკულტეტის სტუდენტებმა, თათია დავითაძემ და ელზა სურმანიძემ. თათია დავითაძემ სესიაზე მოხსენება წარადგინა თემაზე: „მედეა - <<კოლხეთი მეფის ბრძენი ასული>> - მანანა ჩიტიშვილის პოეზიაში“, ხოლო ელზა სურმანიძემ ნაშრომი - „ცოდნისა და ზნეობის მიმართება სოკრატესთან“. კონფერენციის მონაწილეებს გადაეცათ სერტიფიკატები. სესია მიეძღვნა აკადემიკოს თინათინ ყაუხჩიშვილის დაბადებიდან 100 წლის იუბილეს.

8-9 ივნისს ფილოლოგიის მეცნიერებათა დოქტორმა, რიტორიკის სკოლის დირექტორმა ცირა ბარბაქაძემ ბსუ-ს ჰუმანიტარულ მეცნიერებათა ფაკულტეტის სტუდენტებისა და პროფესორ-მასწავლებლებისათვის ტრენინგი - მულტისემიოტიკური პრეზენტაციის უნარები - ჩაატარა. სწავლება მიზნად ისახავდა მულტისემიოტიკური პრეზენტაციის უნარები განვითარებას, რაც გულისხმობს მოხსენების, სადოქტორო ნაშრომის, სტატიის, ეფექტურად, თანამედროვე ტექნოლოგიების გათვალისწინებით წარდგენას.