ბათუმის შოთა რუსთაველის სახელმწიფო უნივერსიტეტის თანადაფინანსებით ჰუმანიტარულ მეცნიერებათა ფაკულტეტის ასოცირებულმა პროფესორმა ხათუნა დიასამიძემ სახელმძღვანელო „ევროპისა და ამერიკის ქვეყნების ახალი ისტორია“ გამოსცა, რომელშიც წარმოდგენილია ევროპისა და ამერიკის წამყვანი სახელმწიფოების სოციალურ-ეკონომიკური და პოლიტიკური ცხოვრების მნიშვნელოვანი ასპექტები, სახელმწიფოთაშორისი ურთიერთობები და საზოგადოებრივი განვითარების დინამიკა XVII საუკუნიდან პირველ მსოფლიო ომამდე. სახელმძღვანელო განკუთვნილია სტუდენტებისა და ფართო მკითხველი საზოგადოებისთვის.

ბსუ-ს ჰუმანიტარულ მეცნიერებათა ფაკულტეტის ფილოსოფიის დეპარტამენტის ასოცირებულმა პროფესორმა ვარდო ბერიძემ გამოსცა ნარკვევების კრებული „მეცნიერება, ხელოვნება, ეთიკა“. კრებულში შესულია ავტორის მიერ სხვადასხვა დროს გამოქვეყნებული სტატიისა და კვლევის შედეგები. ავტორის პრიორიტეტულ კვლევით სფეროს წარმოადგენს მეცნიერების ფილოსოფია, ეთიკა (გამოყენებითი ეთიკა), ფილოსოფიური ანთროპოლოგია. წიგნიში ამ მიმართულებით იკვეთება მეცნიერების ფილოსოფიისა და ეთიკის კავშირის გამომხატველ საკითხთა განსხვავებულ სპექტრზე ორიენტირება, კერძოდ, მეცნიერებისა და ეთიკის, მეცნიერებისა და ხელოვნების ურთიერთმიმართების ჭრილში. ნარკვევი განკუთვნილია ფილოსოფიის მიმართულების სტუდენტებისა და ფილოსოფიის პრობლემატიკით დაინტერესებული მკითხველთათვის.

ბსუ-ში შვედური პროექტის „ბავშვები სტერეოტიპებით არ იბადებიან“ ფარგლებში, „მედიახმის“ აღმასრულებელმა დირექტორმა თეონა ცხომელიძემ ტრენინგი ჩაატარა თემაზე: „რა უნდა ვიცოდეთ შშმ პირების მედიაგაშუქებაზე?“. ტრენინგში მონაწილეობდნენ ბსუ-ს სამაგისტრო პროგრამის ციფრული მედია და ინოვაციების პროფესორ-მასწავლებლები და სტუდენტები. მოეწყო დოკუმენტური ფილმის „რამდენი მოცვია ამქვეყნად?“ ჩვენება და დისკუსია. ფილმი რეალურ ისტორიაზე, „გლადა ჰუდიკ თეატრის“ შექმნაზეა დაფუძნებული და მასში მთავარი როლების შემსრულებლები ტიპური და შეზღუდული შესაძლებლობის მქონე მსახიობები არიან. პროექტის მიზანია შეზღუდული შესაძლებლობის მქონე პირებისადმი საზოგადოებაში დამკვიდრებული სტერეოტიპული აზროვნების, ხედვისა და დამოკიდებულების შეცვლა. ტრენინგის ბოლოს მონაწილეებს გადაეცათ სერტიფიკატები.

„ერაზმუს+“-ის გაცვლითი პროგრამის ფარგლებში, 22-26 მაისს ბსუ-ს პროფესორი მაია ბარამიძე, ასისტენტ პროფესორი შოთა როდინაძე და უფროსი მასწავლებელი ნონა ნიქაბაძე აკადემიური მობილობით იმყოფებოდნენ რიზეს რეჯეფ თაიფ ერდოღანის უნივერსიტეტში (თურქეთი). პროფესორ-მასწავლებლებლებმა ლექციები წაიკითხეს და პრაქტიკული მეცადინეობა ჩაატარეს საკითხებზე: „ქართული დამწერლობა; ქართული სალიტერატურო ენა და დიალექტები“, „თემატურ-პრაქტიკული აქტივობანი არჩევნების საკითხებზე”, „შოთა რუსთაველის პოემის - „ვეფხისტყაოსნის“ თურქული თარგმანის ანალიზი“. ვიზიტის ფარგლებში გამართულ შეხვედრაზე დაიგეგმა სამომავლო თანამშრომლობის მიმართულებები.

ბსუ-ს ქედის მუნიციპალიტეტის გეგელიძეების საჯარო სკოლაში არსებული ინგლისური ენის სასკოლო კლუბის "Student`s Vision" მოსწავლეები და მასწავლებლები ეწვივნენ. კლუბის წევრებს ბსუ-ს ჰუმანიტარულ მეცნიერებათა ფაკულტეტის ასოცირებული პროფესორი გიორგი მასალკინი შეხვდა და საუნივერსიტეტო განათლების მნიშვნელობაზე ესაუბრა. შეხვედრის ფარგლებში, სტუმრებმა უნივერსიტეტის მატერიალურ-ტექნიკური ბაზა დაათვალიერეს და ბსუ-ს საგანმანათლებლო პროგრამებისა და სერვისების შესახებ დეტალური ინფორმაცია მიიღეს.