ჰუმანიტარულ მეცნიერებათა ფაკულტეტის პროფესორი ნატალია სურგულაძე ერთთვიანი ვიზიტით ერასმუს მუნდუს პროგრამის ფარგლებში საფრანგეთის ქალაქ პუატიეს უნივერსიტეტს ეწვია. პრორექტორთან, საგარეო ურთიერთობათა განყოფილების ხელმძღვანელთან და ადმინისტრაციის წარმომადგენლებთან გამართულ შეხვედრაზე მკვლევარმა ბათუმის შოთა რუსთაველის სახელმწიფო უნივერსიტეტის საგანმანათლებლო პროგრამები, სწავლებისა და შეფასების წესები წარადგინა. ვიზიტის ფარგლებში პროფესორი ნატალია სურგულაძე დაესწრო საერთაშორისო სამეცნიერო კოლოკვიუმს: “Amérindianités&Savoirs” (19/03/2014-21/03/2014), სამეცნიერო კვლევითი ლაბორატორიის საბჭოს სხდომას და მოისმინა უნივერსიტეტის პროფესორ-მასწავლებელთა მოხსენებები პოიტიეს უნივერსიტეტში 2013-14 სასწავლო წლების 1 და 2 სემესტრების კვლევითი შედეგების შესახებ. ასევე გაეცნო მაგისტრატურისა და ლისანსის (ბაკალავრიატის) სასწავლო პროგრამებს, გამოცდის ჩატარების, სწავლების მეთოდებსა და შეფასების კრიტერიუმებს. გარდა ამისა, დაესწრო ლექციებს შემდეგ დისციპლინებში: Expressionecrite, Expressionorale, Comprehensionecrite, Comprehensionorale, Grammaire, Dossier, Atelier poesie, Niveaux B2, C1, C2.

ბათუმის ილია ჭავჭავაძის მუზეუმში 9 აპრილისადმი მიძღვნილი სტუდენტთა კონფერენცია გაიმართა თემაზე: „9 აპრილი - სისხლით დამძიმებული თავისუფლება“. სესიაზე ისტორიის სპეციალობის II კურსის სტუდენტებმა მოხსენებები წარმოადგინეს ისეთ აქტუალურ საკითხებზე, როგორიცაა: ეროვნული ცნობიერების განვითარება და გაძლიერება, ანტისაბჭოთა განწყობილებების ზრდა, კომუნისტური იდეოლოგიის კრახი, პარტიული ნომენკლატურის დეგრადაცია, 1989 წლის 9 აპრილი, საქართველოს სუვერენიტეტის აღდგენა. კონფერენციის დასასრულს, ახალგაზრდებმა დაგმეს 25 წლის წინ, 8-9 აპრილს განვითარებული მოვლენები და პატივი მიაგეს თავისუფლებისათვის დაღუპული გმირების ხსოვნას.

ჰუმანიტარულ მეცნიერებათა ფაკულტეტისა და განათლების ფაკულტეტის პროფესორ-მასწავლებლებმა ბულგარეთში, ველიკო ტირნოვოში გამართულ მეთერთმეტე საერთაშორისო სიმპოზიუმში - МАПРЯЛ 14 - მიიღეს მონაწილეობა. ოთხდღიანი სიმპოზიუმი რუსული ენის თეორიულ-პრაქტიკულ შესწავლასა და მის შედარებით-ტიპოლოგიურ აღწერას მიეძღვნა. თარგმანის თეორიული და პრაქტიკული ასპექტების სექციის ხელმძღვანელმა, სლავისტიკის დეპარტამენტის პროფესორმა მარინე აროშიძემ მოხსენება წარადგინა თემაზე: „მეტაფორული სახეების თარგმნის პრობლემები“, სლავისტიკის დეპარტამენტის ასისტენტ პროფესორმა დალი დობორჯგინიძემ „ენების ინტერფერენცია პოლიკულტურულ სივრცეში“ და პედაგოგიკურ მეცნიერებათა დეპარტამენტის პროფესორმა ლელა თავდგირიძემ „უცხო ენების ფლობის შეფასების თანამედროვე ტექნოლოგიები“.

ფრანკოფონია 2014-ის ფარგლებში ბათუმის სახელმწიფო მუსიკალურ ცენტრში დასკვნითი საღამო და თეატრალიზებული წარმოდგენა ,,პარიზის ღვთისმშობლის ტაძარი“ გაიმართა. კონკურსის ,,bonjour la Franca” გამარჯვებულებსა და კონფერენციის მონაწილეებს ბსუ-ს ჰუმანიტარულ მეცნიერებათა ფაკულტეტის დეკანმა მარინა გიორგაძემ და თბილისის ფრანგული ინსტიტუტის დირექტორმა ჟილ კარასომ სერტიფიკატები და საჩუქრები გადასცეს. ფრანგული ენის დონის შესამოწმებელ ტესტირებაზე პირველი ადგილი დაიკავეს: ბსუ ფრანგული ფილოლოგიის III კურსის სტუდენტმა სოფიო ფურკაძემ -(B1) და ბსუ ინგლისური ფილოლოგიის II კურსის სტუდენტმა გვანცა თოფურიამ - (A2).

2014 წლის 2 აპრილს მშვიდობის კორპუსის მოხალისეებისა და საერთაშორისო განათლების ცენტრის ორგანიზებით უნივერსიტეტში ჩატარდა შემოქმედებითი წერის კონკურსი ინგლისურ ენაში. მასში მონაწილეობა მიიღეს ინგლისური ენის სპეციალობის პირველი–მეოთხე კურსების სტუდენტებმა და 50-მა მაგისტრანტმა. მათ ერთი საათის განმავლობაში უნდა დაეწერათ ესე გარკვეულ თემაზე. ეს კონკურსი ჩატარდა საქართველოს სხვადასხვა რეგიონულ უნივერსიტეტში. კონკურსის შედეგად გამოვლინდნენ გამარჯვებულები რეგიონის და ქვეყნის მასშტაბით. მათ გადაეცემათ სერტიფიკატები, საჩუქრები – წიგნების სახით და მაისში ჩაუტარდებათ ტრენინგი შემოქმედებით წერაში.