ბათუმის შოთა რუსთაველის სახელმწიფო უნივერსიტეტში საერთაშორისო კონფერენცია ტარდება თემაზე: ,,მთარგმნელი და თარგმანმცოდნეობა ევროინტეგრაციის კონტექსტში“. ორი დღის განმავლობაში მრგვალ მაგიდასთან ევროკომისიის თარგმანმცოდნეობის დირექტორანტის წარმომადგენლები და სხვადასხვა ქვეყნის წამყვანი უნივერსიტეტების პროფესორები განიხილავენ ახალი ევროპული სამაგისტრო პროგრამების დანერგვის, ევროპულ უნივერსიტეტებთან პარტნიორობის, საგრანტო კონკურსებში მონაწილეობის საკითხებს. საერთაშორისო კონფერენციაზე ქართველი, ინგლისელი, ბელგიელი, უნგრელი, ავსტრიელი, ლატვიელი ექსპერტები და მკვლევარები მოხსენებებს წარმოადგენენ ისეთ მნიშვნელოვან საკითხებზე, როგორიცაა: კონფერენციის სინქრონისტის ახალი პროგრამების თარჯიმნის განვითარება სამაგისტრო სწავლების საფეხურზე და მისი წინაპირობები, კონფერენციის თარჯიმანთა მომზადება, პროგრამული უზრუნველყოფა, მატერიალურ-ტექნიკური ბაზებით სტუდენტთა უზრუნველყოფის პრობლემები და მათი გადაჭრის გზები, თარგმანმცოდნეობის ინსტიტუტიონალიზაცია და მისი ზეგავლენა სამაგისტრო პროგრამებზე.

ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის ორგანიზებით ჩატარდა თურქეთის რესპუბლიკის 91 წლისადმი მიძღვნილი სტუდენტთა სამეცნიერო კონფერენცია. თურქეთისმცოდნეობის სპეციალობის სტუდენტებმა სესიაზე მოხსენებები წარმოადგინეს მუსტაფა ქემალ ათათურქზე და მის როლზე თურქეთში რესპუბლიკური მმართველობის შემოღების საკითხზე. ახალგაზრდებმა სესიაზე ისაუბრეს თურქეთში პირველი მსოფლიო ომის შემდეგ არსებულ პოლიტიკური ვითარებაზე, მეზობელი ქვეყნის ეროვნულ-განმათავისუფლებელ მოძრაობასა და იქ გატარებულ რეფორმებზე.

პროფესორმა ჯოანა შერშუნოვიჩმა ჰუმანიტარულ მეცნიერებათა ფაკულტეტის სტუდენტებისათვის ორი საჯარო ლექცია წაიკითხა თემებზე: „ეთნიკური სტერეოტიპები ფრაზეოლოგიაში (Ethnic Stereotypes Reflected in Phraseology: A Contrastive Perspective)“ და „ლაკუნარობის ფენომენის ლინგვო-კულტურული კვლევა (The Phenomenon of Lacunarity in Linguo-Cultural Research)“. პოლონეთის ბიალასტოკის უნივერსიტეტის პროფესორი ფრაზეოლოგიის საკითხებზე და კვლევის თანამედროვე მეთოდებზე მუშაობს. პოლონელი მკვლევარი ფრაზეოლოგთა საერთაშორისო საზოგადოების ევროფრაზის სამეცნიერო საბჭოს წევრი და ფრაზეოლოგიის კონტინენტშორისი სამეცნიერო გრანტის ხელმძღვანელია. პროფესორ ჯოანა შერშუნოვიჩს გამოცემული აქვს ასზე მეტი ნაშრომი, მათ შორის ორი სახელმძღვანელო.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებითა და აჭარის არ განათლების, კულტურისა და სპორტის სამინისტროს მხარდაჭერით საერთაშორისო კონფერენცია „ჰუმანიტარული მეცნიერებები ინფორმაციულ საზოგადოებაში - II“ გაიხსნა. ორდღიანი კონფერენცია 13 სექციაში იმუშავებს და მასში 350-მდე ქართველი, ინგლისელი, ფრანგი, გერმანელი, ამერიკელი, რუსი, პოლონელი, აზერბაიჯანელი, ავსტრიელი, თურქი, ირანელი პროფესორ-მასწავლებელი და მკვლევარი მოხსენებას წარმოადგენს ჰუმანიტარული მეცნიერებების აქტუალურ პრობლემებზე. საერთაშორისო სამეცნიერო სესიის მონაწილეები განიხილავენ ინფორმაციულ საზოგადოებაში ჰუმანიტარული მეცნიერებების ახალ გამოწვევებს და ბოლო პერიოდში წარმოებული კვლევის შედეგებს.

ამერიკელმა პროფესორმა ჯეიმს თორსონმა ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ინგლისური ფილოლოგიის სპეციალობის სტუდენტებისა და პროფესორ-მასწავლებლებისათვის საჯარო ლექცია ჩაატარა თემაზე: „კლასიკური ამერიკული დრამა (Classic American Drama: Eugene O’Neill, Tennessee Williams, and Arthur Miller)“. ნიუ მექსიკოს უნივერსიტეტის ემერიტუს პროფესორმა ისაუბრა ამერიკული დრამის საუკეთესო წარმომადგენლებზე იუჯინ ონილზე, ტენესი უილიამსზე და ართურ მილერზე. ლექციის დასასრულს, პროფესორმა ჯეიმს თორსონმა დასმულ შეკითხვებს უპასუხა.