კომერციულ საბანკო სისტემის გამართული ფუნქციონირება მნიშვნელოვან როლს თამაშობს ტრანსფორმირებადი ეკონომიკის პირობებში სახელმწიფოს განვითარებაზე და პირიქით, ქვეყნის ეკონომიკური ზრდის ტემპი თავისთავად მოქმედებს საბანკო სექტორის სტაბილურობაზე. კომერციული ბანკებისა და საფინანსო სექტორის სხვა სუბიექტების პრობლემები მომენტალურად აისახება ეკონომიკის სხვა სფეროებზე.

ქვეყნის ეკონომიკაში, სოციალურ თუ სხვა სფეროებში არსებული ვითარების გამოსწორება მოითხოვს ქვეყნის სამეწარმეო პოტენციალის შეფასებას. მისი დაჩქარება დღის წესრიგში დგას საწარმოო ძალებისა და სიმძლავრეების აქტიური ტრანსფორმაციის პროცესის ოპტიმიზაციის აუცილებლობაც. აღნიშნულის მიღწევის ერთ-ერთი მთავარი მექანიზმია ბიზნესის (საწარმოთა) სრულყოფილი შეფასება, რომელიც სამწუხაროდ ჩვენს ქვეყანაში არაერთი ხარვეზით ხასიათდება, ან საერთოდ უგულვებელყოფილია.
აღსანიშნავია ისიც, რომ ბიზნესის ღირებულების შეფასების მართვის სტრატეგიისა და ფინანსური მენეჯმენტისგან განცალკევებით განხილვა არ იძლევა მთლიანი ანალიზის შესახებ სრულყოფილ სურათს. სწორედ ამ პრობლემების გაანალიზებას შევეცდებით ჩვენს მიერ წარმოდგენილ სტატიაში, სადაც განხილული იქნება ბიზნესის ღირებულების შეფასების მიდგომები და მეთოდები, მათი დადებითი და უარყოფითი მხარეები, გამოყენების და განვითარების შესაძლებლობები.

ტურიზმი აჭარის ავტონომიური რესპუბლიკის ეკონომიკის ერთ-ერთ პრიორიტეტულ სექტორს წარმოადგენს რომლის განვითარება გარკვეული გამოწვევების წინაშეც დგას. ქვეყანაში ტურიზმის განვითარების ხელშეწყობის მნიშვნელოვანი საკანონმდებლო ნორმატიული ბაზა არსებობს. სტატიაში განხილულია ტურისტული საწარმოს საწარმოს სტატუსის მინიჭების, ფუნქციონირებისა და გაუქმების წესის დამტკიცების შესახებ საქართველოს მთავრობის 2015 წლის დადგენილება, რომლის საშეღავათო ინიციატივები საქართველოს საგადასახადო კოდექსზეა დაფუძნებული.

ქვეყნის სტაბილიზაციაზე უდიდეს გავლენას ახდენს მისი საგარეო ვაჭრობის სფეროში არსებული პრობლემების გამოვლენა და მათი გადაჭრის ღონისძიებათა სწორი მენეჯმენტი. ჩვენი ქვეყნის საგარეო ვაჭრობის სტრუქტურაში მრავალი დისბალანსი არსებობს. ესენია: სავაჭრო ბალანსის ქრონიკული დეფიციტი, დიდი მოცულობის საგარეო ვალი, პირდაპირ უცხოურ ინვესტიციებზე დამოკიდებულების მაღალი დონე, სავალუტო კურსის გაუფასურების ტენდენცია, მოსახლეობის მსყიდველუნარიანობის ვარდნა, იმპორტისადმი ზღვრული მიდრეკილების მაღალი დონე და ა. შ. საგარეო ვაჭრობის სწორი მენეჯმენტის მიზნით საჭიროა ისეთი ინსტრუმენტების გამოყენება, როგორიცაა: სავაჭრო, შემოსავლების განაწილების, ფულად–საკრედიტო, საბიუჯეტო–საგადასახადო, და სავალუტო პოლიტიკა. ამ ინსტ-რუმენტების სწორად გამოყენება არის ქვეყნის სტაბილიზაციის საშუალება.

ეკონომიკური სიტუაციის გაუმჯობესებისათვის, ასევე სოციალური პრობლემების მოგვარებისა და ეროვნული ვალუტის კურსის სტაბილიზაციის შენარჩუნებისათვის, ერთ-ერთ ღონისძიებას წარმოადგენს ქვეყნის საექსპორტო პოტენციალის ამაღლება. მით უმეტეს, რომ საქართველოსა და ევროკავშირს შორის არსებობს შეთანხმება ასოცირების შესახებ, რომელიც მოიცავს ყოვლისმომცველი თავისუფალი სავაჭრო სივრცის (DC FTA) კომპონენტს. გარდა ამისა, 2000 წლის 14 ივნისიდან, საქართველო გახდა მსოფლიო სავაჭრო ორგანიზაციის (WTO) 137-ე წევრი. უნდა აღინიშნოს, რომ საქართველო სრულფასოვნად ვერ იყენებს ვერც ერთ იმ შეღავათს, რომელიც დაწესებულია როგორც ასოცირების ხელშეკრულების მიხედვით, ისე მსოფლიო სავაჭრო ორგანიზაციის წესდებით. ვერ ვიტყვით, რომ 2015 წლის შემდეგ (როცა საქართველომ დადო ხელშეკრულება ევროკავშირთან), საექსპორტო მაჩვენებელი ევროკავშირის მიმართულებით რადიკალურად გაიზარდა.