ბათუმის შოთა რუსთაველის სახელმწიფო უნივერსიტეტმა თურქეთში 6 თებერვალს დამანგრეველი მიწისძვრით დაზარალებულთა დასახმარებლად ჰუმანიტარული ტვირთი გაგზავნა. საქველმოქმედო აქციაში მონაწილეობა მიიღეს ბსუ-ს პროფესორ-მასწავლებლებმა, მკვლევრებმა, ადმინისტრაციის წარმომადგენლებმა და სტუდენტებმა. აქციის ფარგლებში შეძენილია პირველადი მოხმარების ნივთები, ლეიბები, საბნები, ჰიგიენური და ბავშვის მოვლის საშუალებები.
ბათუმის შოთა რუსთაველის სახელმწიფო უნივერსიტეტის „სტუდენტთა საგანმანათლებლო, კულტურულ-შემოქმედებითი და სპორტული სახის პროექტების კონკურსი - 2023’’ დასრულდა. კონკურსში მონაწილე 12 პროექტიდან დაფინასება მოიპოვა შემდეგმა 6-მა პროექტმა: „100 წერილი ბსუ-ს“, „ასტრონომიული ობიექტების რელიეფის ელემენტების სიმაღლეების განსაზღვრა ასტრონომიული ტელესკოპი FL-80640-ის საშუალებით“, „გარემოსდაცვითი ახალგაზრდული სამიტი - Environmental Youth Summit“, „დებატ კლუბი“, „სტუდენტური მედია კლუბი (Student Media Club)“, „ბსუს მოხალისეთა კლუბი - BSU Volunteer Club“.
ბათუმის შოთა რუსთაველის სახელმწიფო უნივერსიტეტის რექტორი, მერაბ ხალვაში დელეგაციის წევრებთან ერთად, აშშ-ში სამუშაო ვიზიტის ფარგლებში, საქართველოს სრულუფლებიან და საგანგებო ელჩს დავით ზალკალიანს შეხვდა. შეხვედრაზე განიხილეს ვიზიტის მიზნები და ამ ეტაპზე მიღწეული შედეგები. ბსუ-ს დელეგაცია სამუშაო ვიზიტით აშშ-ში 6 თებერვალს გაემგზავრა სოფლის მეურნეობის ექსტენციის პროექტის ფარგლებში, რომელსაც ახორციელებს მომავლის ფერმერი აშშ-ის სოფლის მეურნეობის დეპარტამენტის (USDA) მხარდაჭერით.
USAID-ის სოფლის მეურნეობის პროგრამისა და სურსათის ეროვნული სააგენტოს მიერ დაფინანსებულ კვლევაში „ახალი ინვაზიური მავნებლები ეროვნული გამოწვევა’’ ჩართული იყვნენ ბათუმის შოთა რუსთველის სახელმწიფო უნივერსიტეტის ასოცირებული პროფესორი, პროექტის კოორდინატორი ბსუ-ში ლალი ჟღენტი, საბუნებისმეტყველო მეცნიერებათა და ჯანდაცვის ფაკულტეტის ბიოლოგიის საბაკალავრო საგანმანათლებლო პროგრამის სტუდენტები - მარიამ ბერიძე, ნანა მამულაიშვილი, ეკოლოგიის საბაკალავრო საგანმანათლებლო პროგრამის სტუდენტები - გიორგი გეგიძე, თედო დუმბაძე და ბიომრავალფეროვნების მიმართულების მაგისტრანტი სალომე კალანდაძე.
ბათუმის შოთა რუსთაველის სახელმწიფო უნივერსიტეტის ღია კარის დღეები აბიტურიენტებისთვის გრძელდება. ქობულეთის მუნიციპალიტეტის N1 საჯარო სკოლაში სხვადასხვა საჯარო სკოლის მეთორმეტე კლასის მოსწავლეებთან გამართულ შეხვედრაზე ბსუ-ს ხარისხის უზრუნველყოფის სამსახურის უფროსმა ვლადიმერ ღლონტმა და ჰუმანიტარულ მეცნიერებათა ფაკულტეტის დეკანმა თეონა ბერიძემ აბიტურიენტებს ბსუ-ს საბაკალავრო პროგრამები, საუნივერსიტეტო ცხოვრება, სტიპენდიები, გაცვლითი პროგრამები და სწავლის პირობები გააცნეს. შეხვედრა კითხვა-პასუხის რეჟიმში წარიმართა და პროფესორ-მასწავლებლებმა აბიტურიენტების შეკითხვებს უპასუხეს.
