ახალი ამბები

შოთა რუსთაველის სახელმწიფო უნივერსიტეტში მართვის ორგანოების რიგით მეორე არჩევნები ჩატარდა. აკადემიური საბჭო 8 წევრისაგან დაკომპლექტდება, თითოეული ფაკულტეტიდან არჩეული იქნება 2 წარმომადგენელი. წარმომადგენლობითი საბჭოს შემადგენლობაში 21 წევრი შევა. განათლებისა და მეცნიერებათა ფაკულტეტის ინტერესებს 7 აკადემიური პერსონალი და 5 სტუდენტი დაიცავს, აგრარული ტექნოლოგიებისა და ეკოლოგიის ფაკულტეტს - 1 აკადემიური პერსონალი და 1 სტუდენტი, საინჟინრო-ტექნოლოგიური ფაკულტეტს - 1 აკადემიური პერსონალი და 1 სტუდენტი, ხოლო სოციალურ მეცნიერებათა, ბიზნესისა და სამართალმცოდნეობის ფაკულტეტისას - 3 აკადემიური პერსონალი და 2 სტუდენტი. აკადემიური საბჭოს არჩევნებში 11 კანდიდატი, ხოლო წარმომადგენლობითი საბჭოს არჩევნებში 29 საარჩევნო სუბიქტი მონაწილეობდა.

შავი ზღვის დაცვის საერთაშორისო დღე რსუ-ს განათლებისა და მეცნიერებათა ფაკულტეტის ბიოლოგიის დეპარტამენტმა ტრადიციულად გარემოს დაცვისა და ბუნებრივი რესურსების სამმართველოსთან ერთად აღნიშნა. შავი ზღვის ეკოლოგიურ პრობლემებს მიეძღვნა სამეცნიერო კონფერენცია თემაზე: ,,შავი ზღვის ეკოლოგიური ასპექტები“. სტუდენტებმა, პროფესორ-მასწავლებლებმა, სამმართველოს წარმომადგენლებმა და ექსპერტებმა შავი ზღვის დაცვის საკითხებზე იმსჯელეს და შავი ზღვის ქვეყნებს შორის ურთიერთთანამშრომლობის პერსპექტივები განიხილეს.

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ,,სოფლის მეურნეობა და ეკოლოგიური წონასწორობა აღმოსავლეთ ევროპასთან (LOGO)“ კავშირის თავმჯდომარემ დოქტორ ჰართვიგ მენენმა ხელი მოაწერეს ურთიერთთანამშრომლობის ხელშეკრულებას. შეთანხმებისამებრ, რსუ-ს აგრარული ტექნოლოგიებისა და ეკოლოგიის ფაკულტეტის სტუდენტები გერმანიაში გაივლიან ექვსთვიან სასწავლო-საწარმოო პრაქტიკას ეკოლოგიურ მიწათმოქმედების მიმართულებით.

ცნობილ არქეოლოგს, ისტორიის მეცნიერებათა დოქტორს, შოთა რუსთაველის სახელმწიფო უნივერსიტეტის ემერიტუსს, პროფესორ ამირან კახიძეს 75 წელი შეუსრულდა. შოთა რუსთაველის დარბაზში გამართულ საიუბილეო სხდომაზე უნივერსიტეტის პროფესორ-მასწავლებლებმა, კოლეგებმა და მეგობრებმა ღვაწლმოსილი პროფესორის სამეცნიერო მიღწევებსა და საზოგადოებრივ საქმიანობაზე ისაუბრეს. ამირან კახიძის სახელს უკავშირდება სამხრეთ–დასავლეთ საქართველოში არქეოლოგიის სკოლის შექმნა და მკლევართა რამდენიმე თაობის აღზარდა. უნივერსიტეტელებმა იუბილარს ღირსშესანიშნავი თარიღი მიულოცეს და სამახსოვრო საჩუქრები გადასცეს.

პროექტის ,,ლიტვური კულტურის დღეები“ ფარგლებში შოთა რუსთაველის სახელმწიფო უნივერსიტეტს ლიტვის დელეგაცია ეწვია. საქართველოში ლიტვის საელჩოს დესპანი ლაურინკუს ტალატ-კელაშა და საზოგადოებრივი მაუწყებლის დირექტორი აუდრიუს მატონისი სტუდენტებს ორი ქვეყნის ურთიერთთანამშრომლობაზე ესაუბრენ. ვილნიუსის უნივერსიტეტის პროფესორმა ადოფრედას ბურბლაუსკასმა საჯარო ლექცია წაიკითხა თემაზე: ,,საქართველო-ლიტვის ურთიერთობები და პერსპექტივები“. ლექციას უნივერსიტეტის რექტორი, პროფესორი ალიოშა ბაკურიძე, აჭარის მთავრობის თავმჯდომარის მოადგილე ლევან ანთაძე და პროფესორ-მასწავლებლები ესწრებოდნენ.